«Դժվար ապրուստից» Ժաննա Բուտուլյան. Վերջին զանգի օրը ինձ չէի կարող թույլ տալ լաց լինել

«Դժվար ապրուստ» հեռուստասերիալից անկրկնելի Սյուզկան՝ Ժաննա Բուտուլյանը լավ է հիշում դպրոցի իր ավարտական երեկոն:

Դա այնքան էլ վաղուց չէր՝ 2004 թվականին: Շատ աղջիկներ իրենց «Վերջին զանգին» հուզվում են, արտասվում, բայց Ժաննան այդ աղջիկների թվին չի պատկանում: «Ես տխուր էի ավարտելու նախորդ օրը, երբ դասարանցիներով միմյանց բարեմաղթանքներ էինք գրում հուշատետրերի մեջ: Բայց «Վերջին զանգիս» օրը ինձ չէի կարող թույլ տալ տխրել, առավել ևս լաց լինել, որովհետև առավոտյան մեր ավարտական ներկայացումն էր, իսկ հետո՝ ավարտական երեկոն: Պետք էր թե՛ ներքուստ, թե՛ արտաքուստ ապահովել տոնական տրամադրություն»,-նշեց Ժաննան:

ArmStar.am-ի հետ զրույցի ընթացքում Ժաննան նշեց, որ իրականում այդ օրը տխուր էլ չէր: «Մի քանի ամիս անց նոր գիտակցեցի, որ մի փուլ ավարտվեց իմ կյանքում և, որ շատ եմ կարոտելու այդ ամենը»: Ժաննան այնքան լավ հիշողություններ ու հաճելի պահեր է ապրել դպրոցում, որ ավարտելուց հետո երկար ժամանակ չի կարողացել հաշտվել այն մտքի հետ, որ դպրոց էլ չի գնալու:

«Այդ ժամանակ տխրել եմ շատ, նույնիսկ գիշերները արթնանում էի այս մտքով. «Մի՞թե էլ չենք վերադառնալու դպրոց»»,-ժպիտով ու քաղցր հիշողություններով պատմեց դերասանուհին: Ժաննան իր կարոտը հագեցնելու համար ավարտելուց հետո մի քանի անգամ այցելել է դպրոց, սիրելի ուսուցիչներին: «Մի քանի անգամ դասարանցիներով այցելել ենք դպրոց, ամեն տարի դասղեկին այցելում ենք: Դպրոցական ընկերուհիներիս հետ էլ կապը կա: Մինչ օրս հանդիպում ենք տարբեր առիթներով: Ոմանք արդեն իրենց բալիկների հետ են գալիս հանդիպումների (ծիծաղում է): Ինձ համար շատ թանկ են այն մարդիկ, ում հետ ընկերություն եմ անում մանկուց»,- ավելացրեց Ժաննան:

Հիշողությունները գրառեց Աշխեն Մնացականյանը (ArmStar.am)