Փաստաբանները գործադուլ կհայտարարեն՝ ընդդեմ Վճռաբեկ դատարանի

Հունիսի 11-ին և 12-ին մոտ 50 փաստաբան գործադուլ կանեն: Նրանք այդ օրերին չեն մասնակցի որևէ քննչական գործողության, չեն ներկայանա դատական նիստերին: Այս մասին այսօր՝ լրագրողների հետ հանդիպմանը հայտարարեցին փաստաբաններ Նարինե Ռշտունին, Հայկ Ալումյանը, Գևորգ Դավթյանը և Արա Զաքարյանը:

Գոծադուլի մասին հայտարարության տակ ստորագրած փաստաբանների հիմնական դժգոհությունը կապված է Վճռաբեկ դատարանի գործողությունների հետ: Ըստ փաստաբանների՝ Վճռաբեկ դատարանի գործողություններն անկանխատեսելի են, նրանք չգիտեն՝ գործը կվերցվի վարույթ, թե՝ ոչ, շատ և անհարկի ուշացնում է բողոքների քննումը։

«Եթե Վճռաբեկ դատարանը սկսի լուրջ վերաբերվել գործին, ապա Եվրոպական դատարանից դատական ակտեր չենք ստանա՝ ի վնաս ՀՀ-ի: Այսօր դատական համակարգը հիվանդ է, իշխանությունն է պետք է միջոցներ ձեռնարկի խնդրի լուծման համար»,- ասուլիսի ընթացքում ասաց փաստաբան Հայկ Ալումյանը:

Փաստաբանները հույս ունեն, որ իրենց գործադուլին դեռևս միացողներ կլինեն: