Ռմբարկուական պայքարն ավարտվեց. Խորեն Զարգարյանը` իր հաղթանակի մասին (տեսանյութ)

Հայաստանի ֆուտզալի առաջնության ռմբարկուական պայքարն ավարտվեց Հայաստանի ֆուտզալի ազգային հավաքականի և «Թալգրիգի» խաղացող Խորեն Զարգարյանի հաղթանակով: Լուրեր.com-ը զրուցեց ֆուտբոլիստի հետ:

Նշենք, որ Զարգարյանը ճանաչվել է այս մրցաշրջանի լավագույն ռմբարկու՝ 14 խաղում հեղինակելով 22 գոլ: Ռմբարկուական պայքարում նա մեկ հանդիպում պակաս և մեկ գնդակ ավել է հեղինակել երկրորդ տեղում ընթացող Էդգար Կիրակոսյանից («Շահումյան») և Արմեն Ղազարյանից («Շիրակ»). վերջիներս 15 խաղում հեղինակել են 21 գոլ: Շրջանի լավագույն ռմբարկուն անվանակոչվել է ի պատիվ Խորեն Հովհաննիսյանի, և Լուրեր.com-ի հետ զրույցում նա նշեց, որ իր անվան հանդեպ ունի պատասխանատվություն և սիրում է այն:

-Խորե՛ն, որքա՞ն ժամանակ է, ինչ զբաղվում եք ֆուտզալով:

-Ֆուտզալով զբաղվում եմ 2006 թվականից մինչ այսօր:

-Այս տարիների ընթացքում ի՞նչ ձեռքբերումներ եք ունեցել այս ոլորտում:

-Երբ 2006-ին տեղափոխվեցի ֆուտզալ, ընդամենը 6 ամիս հետո ընդգրկվեցի ազգային հավաքականում: Ամենամեծ ձեռքբերումն ինձ համար դա է եղել:

-Վերջին տարում դուք ճանաչվեցիք նաև լավագույն ռմբարկու, ինչպիսի՞ն են ձեր զգացողություններն ու պատասխանատվությունը:

-Ֆուտբոլում պատասխանատվությունը ինձ համար միշտ եղել է կարևորագույնը: Իսկ լավագույն ռմբարկու դառնալը ավելի լավ պատրաստվելու արդյունքն է:

-Ի՞նչ է տալիս լավագույն ռմբարկու լինելը:

-Ես երբեք չեմ մտածել շատ գոլ խփելու կամ ռմբարկու դառնալու մասին: Ավելի շատ մտածում եմ խաղամակարդակս բարելավելու մասին, քան գոլ խփելու, քանի որ ֆուտբոլը թիմային խաղ է:

-Գիտենք, որ զբաղվել եք նաև ֆուտբոլով. ո՞րն էր պատճառը, որ այն փոխեցիք ֆուտզալով:

-Փոփոխությունը ակամա է ստացվել: Ես չեմ որոշել, պարզապես այդպես ստացվեց: 8 տարեկանից զբաղվել եմ ֆուտբոլով: Մարզվել եմ «Փյունիկում» մինչև 2006-ը, ապա` որոշակի խնդիրների պատճառով ստացվեց այնպես, որ տեղափոխվեցի հենց «Փյունիկի» ֆուտզալի թիմը: Հետո «Փյունիկի» ֆուտզալի թիմը լուծարվեց, բայց ես շարունակեցի կարիերաս:

-Մեծ ֆուտբոլ վերադառնալու մտադրություն ունե՞ք:

-Մեծ ֆուտբոլ վերադառնալու մտադրություն չունեմ, որովհետև այստեղ ինձ ավելի լավ եմ զգում, և այստեղ հաջողություններս ավելի ճիշտ եմ կարողանում գրանցել, քան այնտեղ:

-Ձեր ամենասիրելի ֆուտբոլիստը:

-Ռոնալդինյո, Մեսսի:

-Ի՞նչ նպատակներ ունեք առաջիկայում` կապված ֆուտզալի հետ:

-Նպատակ ունեմ ավելի շատ առաջ գնալու, արտերկրում հանդես գալու և հավաքականում ելույթներս շարունակելու:

Նշենք, որ Խորենից հետաքրքրվեցինք նաև, թե Չեմպիոնների լիգայի եզրափակչում ում է ֆավորիտ համարում, ինչին ի պատասխան` վերջինս ասաց. «Ընդհանրապես գերմանական թիմեր չեմ սիրում, բայց կարծում եմ, որ «Բավարիան» ավելի շատ հնարավորություն ունի, քան «Բորուսիան»:

Փաստորեն, Խորենի կանխատեսումն իրականացավ` Չեմպիոնների լիգայի եզրափակչում հաղթանակ տոնեց հենց մյունխենյան թիմը:

Լիանա Թորոսյան