«Առաջին սիրո երգը» 55 տարեկան է, իսկ ֆիլմի երգերի կատարող Սերգեյ Դավիդյանը կդառնար 90 տարեկան (տեսանյութ)

Երգիչ Սերգեյ Դավիդյանը ծնվել է 1923 թ. 26 մայիսի 26-ին:

1952թ. ավարտել է Մոսկվայի կոնսերվատորիան: Երգել է Տաշքենդի և Պերմի օպերային թատրոններում: 1953թ-ից եղել է Մոսկվայի «Մոսհամերգ» միավորման մեներգիչ: 1958թ. կատարել է «Առաջին սիրո երգը» ֆիլմի երգը: 1960թ. նկարահանվել է «Ծնված ապրելու համար» ֆիլմում: 1979-83թթ դասավանդել է Ալժիրի կոնսերվատորիայում, 1985թ-ից` Մոսկվայի Կուլտուրայի ինստիտուտում (դոցենտ` 1989թ.): Մահացել է 1996 թ. հունվարի 22-ին, Մոսկվայում:

Ստորև ձեզ ենք ներկայացնում «Հայաստանի զրուցակից» թերթից «Առաջին սիրո երգը» 55 տարեկան է» հոդվածը:

1958 թվականին նկարահանված «Առաջին սիրո երգը» ֆիլմն իսկույն դարձավ Հայաստանի այցետոմսը: Այն հանդիսատեսի շրջանում մեծ ճանաչում է ստացել ոչ միայն դերասանների հիանալի խաղի, այլև ֆիլմում հնչող երգերի շնորհիվ: Ասվածն իրենց գնահատականներով շտապեցին հաստատել նաև կինոգետները` ֆիլմը համարելով բացառիկ ստեղծագործություն, որի հաջողությանը մեծապես նպաստել են այնտեղ հնչող ինքնատիպ երգերը` նույնքան ինքնատիպ կատարմամբ: «Առաջին սիրո երգի» հեղինակը Առնո Բաբաջանյանն է: Իսկ ո՞վ է այդքան վարպետորեն կատարում երգը: Ո՞ւմ ձայնն է, որ անտարբեր չի թողնում ոչ ոքի: Շատերն են վստահ, որ երգը կատարում է հենց ինքը` Խորեն Աբրահամյանը: Մինչդեռ այդ հզոր ու գեղեցիկ ձայնը պատկանում է ՀՀ վաստակավոր արտիստ, տաղանդավոր երգիչ Սերգեյ Դավիդյանին: Գարեգին Նժդեհի թոռ Վազգեն Տեր-Հարությունյանը, ով բարեկամական կապեր ունի նաև Դավիդյանի հետ, «Արձագանք» ռադիոկայանին խնդրել է հնչեցնել «Առաջին սիրո երգը» և հարցում անել, թե ով է կատարողը: «Պատասխանները սխալ էին, բոլորը համոզված էին` Խորեն Աբրահամյանը», մեզ հետ զրույցում նշեց Վազգեն Տեր-Հարությունյանը: Ցավոք, այսօր էլ` ֆիլմի ստեղծումից 55 տարի անց, քչերը գիտեն երգը հնչեցնողի անունը:

2001-ին Գարեգին Նժդեհի 115-ամյակի կապակցությամբ կազմակերպված տոնակատարության ժամանակ Զորի Բալայանը Վազգեն Տեր-Հարությունյանին տեղեկացնում է, որ Նժդեհի թոռներից ևս մեկը բնակվում է Մոսկվայում, նա հայտնի գործարար Լևոն Հայրապետյանն է: Վ. Տեր-Հարությունյանը գտնում է Լևոն Հայրապետյանին, մտերմանում նրա և ընտանիքի հետ: Որոշ ժամանակ հետո պարզում է, որ հայտնի գործարարը Սերգեյ Դավիդյանի զարմիկն է: Լ. Հայրապետյանի ընտանիքի անդամներից նյութեր քաղելով Դավիդյանի մասին` Վ. Տեր-Հարությունյանը որոշում է այդ ամենը մատուցել նաև հանրությանը: Սերգեյ Դավիդյանին հասարակությանն ավելի ճանաչելի դարձնելու համար Վազգեն Տեր-Հարությունյանն օրեր առաջ կազմակերպել էր հուշ երեկո` նվիրված ֆիլմի 55-ամյակին և տաղանդավոր երգչի 90-ամյակին: Երեկոյին ներկա էին ֆիլմի բազմաթիվ սիրահարներ: Հնչեցին ռոմանսներ, օպերային թատրոնի երգիչների կատարումներ: Իսկ Ստանիսլավսկու անվան ռուսական պետական թատրոնի գլխավոր ադմինիստրատոր Անժելա Շողերյանը հանդիսատեսի ուշադրությանը հանձմեց Սերգեյ Դավիդյանի մասին կենսագրական հետաքրքիր դրվագներ: Ս. Դավիդյանը ծնվել է 1923-ին` Օրջոնիկիձե քաղաքում: Գեղեցիկ ձայներ ընտրելու նպատակով Օրջոնկիձե է գալիս պրոֆեսոր Բելանսկին: Լսելով Սերգեյ Դավիդյանին` պրոֆեսորը նրան հրավիրում է Մոսկվա` կոնսերվատորիայում սովորելու: Կոնսերվատորիան ավարտելուց հետո Դավիդյանը երգել է ջազ նվագախմբում, այնուհետև սկսվում են արտասահմանյան հյուրախաղերը, համերգային լեփլեցուն դահլիճների շրջանը:

Ինչպես երգը գտավ իր կատարողին Առնո Բաբաջանյանն իր այդ գործը կատարելու համար փնտրել է համապատասխան ձայն և մի անգամ ներկա է եղել Սերգեյ Դավիդյանի համերգներից մեկին: Նրան շատ է դուր եկել Դավիդյանի դրամատիկական-լիրիկական տենորը: Բաբաջանյանը նրան հրավիրել է Երևան` ձայնագրության: Ի դեպ ասում են` Սերգեյ Դավիդյանն արտաքնապես շատ նման է եղել Խորեն Աբրահամյանին: Այսինքն համապատասխանել է նաև Արսենի կերպարին:
«Մինչ օրս ոչ ոք չի կարողացել «Առաջին սիրո երգը» կատարել այնպես, ինչպես Սերգեյ Դավիդյանը», հուշ երեկոյում հայտարարեց երգիչ Էդվարդ Կարապետյանը:

Կինոգետների կարծիքով եթե չլինեին Ս. Դավիդյանի ձայնը և դերասանների խաղը` կինոնկարն այդքան մեծ ազդեցություն չէր ունենա:
Այս հրաշալի կինոնկարի ստեղծմանը մասնակցել է մի ամբողջ աստղաբույլ`  սցենարի հեղինակներ` Ժիրայր Հակոբյան, Յակոբ Վոլչեկ, բեմադրիչներ` Լաերտ Վաղարշյան, Յուրի Երզնկյան, օպերատոր` Արտաշես Ջալալյան, կոմպոզիտորներ` Առնո Բաբաջանյան, Ղազարոս Սարյան, դերասաններ` Հրաչյա Ներսիսյան, Վաղարշ Վաղարշյան, Խորեն Աբրահամյան, Էլեոնորա Սուդակովա, Օլգա Գուլազյան, Վերջալույս Միրիջանյան, վերջապես` տաղանդաշատ երգիչ Սերգեյ Դավիդյան: Աստղաբույլից այսօր ոչ ոք ողջ չէ: Փոխարենը կենդանի է այդ բացառիկ անհատականությունների համատեղ աշխատանքի արդյունքը` անմահ «Առաջին սիրո երգը» ֆիլմը:

Աղբյուրը`  «Հայաստանի զրուցակից»

Նյութը պատրաստեց` Ք. Ա-ն