Ինչի՞ց է վախենում և ամաչում Հովիկ Աբրահամյանը (տեսանյութ)

«Կենտրոն» հ/ը «Հայելու առաջ» հաղորդաշարի հյուրը Ազգային ժողովի նախագահ Հովիկ Աբրահամյանն է:

Բլից հարցեր՝ ԱԺ նախագահին.

-Ես վախենում եմ... ինչի՞ց…

-Անարդարությունից:

-Կա՞ մի բան, ինչի համար ամաչում եք…

-Ամաչում եմ իմ չարածների համար:

-Ափսոսում եմ...ինչի՞ համար…

-Ափսոսում եմ, որ մենք այս տարիներին ավելի շատ բան կարող էինք անել, ես կոնկրետ ավելի լավ կարող էի աշխատել, ավելի շատ խնդիրներ լուծել, որ չեմ արել:

-Մարդ, որ ամենամեծ ազդեցությունն է թողել Ձեզ վրա…

-Իմ ընտանիքն է, իմ ծնողներն են, իմ երեխաներն են:

-Ասում են` կյանքը ունի երեք աստիճան. կյանքը` ինձ համար, կյանքը`մարդկանց համար, կյանքը` Աստծո առաջ…Եթե մեկ բառով գնահատեք, Ձեզ համար ինչպե՞ս եք ապրել՝ մարդկանց`համար ինչպես, Աստծո առաջ` ինչպես:

-Աստծո առաջ ես շատ արդար եմ, ոչ մի անգամ իմ կյանքում ոչ մեկին չեմ դավաճանել, չեմ շողոքորթել, ոչ մեկի վրա ստվեր չեմ գցել, որ ինձ վստահել են մի գործ, մի պաշտոն, մի հարց: Ես կարող էի այս տարիների ընթացքում ավելի շատ անել անձնապես իմ համար, բայց ես գտնում եմ, որ ավելի շատ բան պիտի անեմ ժողովրդի, պետության, տնտեսության համար: Եվ չկա մի քաղաքացի, որ ասի՝ Աբրահամյան Հովիկի հետ պայմանավորվել եմ մի հարց, և ինքը ստել է, և ասել է փող տվե՛ք, որ հարցը լուծեմ, որ ինձնից կաշառք է ուզել:

Ձեզ համար ինչպե՞ս եք ապրել:

-Շատ լավ, նորմալ: Չեմ փորձել իմ ժամանակը իմ ընտանիքի վրա օգտագործել, քան պաշտոնիս: Առաջին կարևոր հարցը ինձ համար, որ չկա մի մարդ, որ տեսնեմ, գլուխս կախեմ: Սա մեծ ձեռքբերում եմ համարում:

-Կյանքում ստացած ամենամեծ ծանր հարվածը:

-Երբ իմ հարազատը, իմ գործընկերը, իմ թիմակիցը ինձ դավաճանում է:

-Հաճա՞խ է դա լինում:

-Շատ քիչ է եղել, ի դեպ, վերջին այս տարիներին է եղել, նախկինում չի եղել:

-Իմ թույլ կողմերն են…

-Իմ խիղճը, քանի որ ես շատ եմ տեսել խնդիրները, ու երբ մարդը սկսում է պատմել իր խնդիրները, ես այդ մարդու խնդիրներով սկսում եմ մտածել, խիղճս տանջում է: Մտածում եմ` ինչի մեր երկրում նման մարդիկ կան, ինչո՞ւ լավ չենք աշխատում, որ գոնե այդպիսի մարդիկ քիչ լինեն:

-Ես ուժեղ եմ... ինչո՞վ…

-Ուժեղ եմ իմ անկեղծությամբ, իմ ազնվությամբ, իմ ընտանիքով, ամուր` իմ ընկերներով, իմ թիմով:

-Եվ հավատում եմ... ինչի՞ն…

-Հավատում եմ Աստծուն, հավատում եմ իմ ուժերին, հավատում եմ իմ փորձին, իմ ապրած տարիներին և համոզված եմ, որ մենք այս խնդիրները միասին լուծելու ենք:

Հովիկ Աբրահամյանը պատասխանել է նաև ՀՀ ներքաղաքական իրավիճակին վերաբերող տարբեր հարցերի: Մանրամասները` տեսանյութում.