Այսօր մեծանուն դիրիժոր Միքայել Թավրիզյանի ծննդյան օրն է

Մեծանուն դիրիժոր Միքայել Թավրիզյանը ծնվել է 1907թ. մայիսի 27-ին (14)՝ Բաքվում: 1923-26թթ. սովորել է տեղի Կոնսերվատորիայում: 1932թ. ավարտել է Լենինգրադի Կոնսերվատորիայի ալտի, իսկ 1934թ.` դիրիժորական բաժինները։ 1935թ-ից եղել է Երևանի օպերայի և բալետի թատրոնի դիրիժոր, 1938թ-ից` գլխավոր դիրիժորը, իսկ 1946թ-ից` գեղարվեստական ղեկավարը:

Մաեստրոյի շնորհիվ էր, որ 1933-57թթ. մեր օպերային թատրոնի խաղացանկը հարստացավ հայ, ռուս եւ արևմտաեվրոպական օպերային գրականության գլուխգործոցներով: Ղեկավարել է Գլինկայի «Իվան Սուսանին», Ռիմսկի-Կորսակովի «Թագավորի հարսնացուն», Չայկովսկու «Պիկովայա դամա», «Իոլանտա», Վերդիի «Տրավիատա», «Ռիգոլետտո», «Աիդա», «Օթելլո», Մեյերբերի «Հուգենոտներ» և այլ օպերաներ, իրականացրել Տիգրանյանի «Անուշ», «Դավիթ Բեկ», Չուխաճյանի «Արշակ Բ», Ստեփանյանի «Լուսաբացին», Այվազյանի «Թափառնիկոս», Բաբաևի «Արծվաբերդ» օպերաների առաջին բեմադրությունները:

1946թ. և 1951թ. եղել է ԽՍՀՄ Պետական մրցանակակիր:

1956թ. արժանացել է ԽՍՀՄ ժողովրդական արտիստի կոչմանը:

1948թ. հանդես է եկել Մոսկվայի Մեծ թատրոնում («Ռիգոլետտո», «Իոլանտա»):

Թավրիզյանի կատարմանը բնորոշ էին ռոմանտիկական ոգեշնչվածությունը, մեղեդիական ճկունությունը և ռիթմի սուր զգացողությունը:

Հանդես է եկել նաև որպես սիմֆոնիկ դիրիժոր: Նա կարողացել է իր ետեւից տանել ստեղծագործական մի ամբողջ կոլեկտիվ, ձգտել է հասնել պրոֆեսիոնալ բարձր մակարդակի, որն ընդունակ է յուրաքանչյուր ներկայացման հետ կապված իր հույսերն ու ձգտումները դարձնել թատերախմբի սեփականությունը ու նրանց օգնությամբ կերտել ստեղծագործական ռեալ իրականություն:

1954-58թթ եղել է ԽՍՀՄ, իսկ 1947-55թթ` ՀԽՍՀ Գերագույն խորհրդի պատգամավոր:

Մահացել է 1957թ. հոկտեմբերի 7-ին՝ Երևանում:

Թավրիզյանի անունով կոչվել է երաժշտական դպրոց Երևանում: