Զարուհի Բաբայանը բանակի կողքին

Երգչուհի Զարուհի Բաբայանը մայիսի 29-ին պատրաստվում է համերգ տալ «Զարուհի Բաբայանը բանակի կողքին» խորագրով: Այս համերգը դեռևս անցյալ տարվա աշնանը երգչուհու պատրաստած նախագծի տրամաբանական ավարտն է: «Սկիզբը դրվեց մեր բանակի տարեդարձին նվիրված տեսահոլովակով: Հետո մենահամերգներ եղան Սոֆի Դևոյանի «Պարի և հոգու» թատրոնի աղջիկների հետ ինչպես Հայաստանի Զինված ուժերում, այնպես էլ Արցախի Պաշտպանության բանակի զորամասերում»:

Մայիսի 29-ին ևս լավ պատրաստված մենահամերգ է սպասվում, որը կազմակերպվել է ՀՀ պաշտպանության նախարարության աջակցությամբ: ArmStar.am-ը հետաքրքրվեց, թե հյուրեր լինելու՞ են: «Համերգի ընթացքում միայն մեկ հյուր է լինելու՝ երգիչ Արսեն Սաֆարյանը, ով կատարելու է իր արդեն սիրված երգերից մեկը, որը նույնպես նվիրված է բանակին: Այդ երգն առաջին անգամ հնչել է «Հատուկ նշանակության երգեր» համերգի ժամանակ»: Խոսքը Արսեն Սաֆարյանի «Սպասի՛ր ինձ» երգի մասին է: «Արսենը բեմում լինելու է իմ երգի ստուդիայի սաների հետ: Երգն այդ օրը մատուցելու ենք մի փոքր այլ մեկնաբանությամբ»: ArmStar.am-ի հետ զրույցի ընթացքում Զարուհին նշեց, որ համերգի ընթացքում զինվորական, բանակային ոգի է տիրելու: «Համերգային ծրագրի իմաստն այսպիսին է. կա մի զինվոր, որը սիրում է, սիրահարված է, և սիրած աղջիկը ճանապարհում է նրան բանակ: Այդ զինվորն ականատես է լինում պատերազմի և, Փառք Աստծո, վերադառնում է, ընտանիք է կազմում»: Այսինքն համերգային ծրագրի գիծն է՝ սեր, ընտանիք, խաղաղություն, և իհարկե, Հայաստան:

ArmStar.am-ը տեղեկացավ նաև, որ հնչելու է զինվորական օրհներգը, հանդես է գալու Պատվո պահակախումբը, ելույթ են ունենլու նաև պարային համույթը, թատրոնը և Զարուհի Բաբայանի երգի ստուդիայի սաները:

ArmStar.am-ի այն հարցին, թե համերգի ընթացքում առաջնաելույթներ (պրեմիերաներ) լինելու՞ են, երգչուհին խոստացավ. «Այո լինելու են այն երգերը, որոնք իմ վերջին ձայնասկավառակի մեջ են եղել: Այդ սկավառակի մեջ կան երգեր, որոնք արդեն շատ սիրված են, բայց կան երգեր նաև, որոնք դեռ չեմ կատարել և հնչելու են հենց այս համերգի ընթացքում»:

Մենահամերգի տոմսերը որևէ տեղ չեն վաճառվում, քանի որ այն բարեգործական նպատակներով է կազմակերպված: «Համերգին կլինեն ՀՀ պաշտպանության նախարարության պատվավոր հյուրեր և շատ այլ մարդիկ, ում կհետաքրքրի այն, ինչ մենք կազմակերպել ենք»: Հրավիրվածների շարքում լինելու են նաև զինվորներ:

Ի տարբերություն նման թեմատիկայով այլ համերգների, որտեղ գրեթե բոլորը ներկայանում են զինվորական համազգեստով, երգչուհին ասաց, որ հատուկ այս համերգի համար զգեստներ է պատվիրել: «Իմ բոլոր հագուստները դիզայներ մոդելավորող Լիլիթ Մարգարյանի ձևավորումով են կարված: Առաջին անգամ այդ հագուստներով հանդես կգամ այս համերգի ընթացքում: Զինվորական հագուստ չեմ կրելու, բայց կրելու եմ բեմական մի հագուստ, որը զինվորական էլեմենտներով ու գույներով է»:

Սպասվող համերգի զգեստների մասին փորձեցինք ստանալ նաև դրանց հեղինակի՝ Լիլիթ Մարգարյանի մեկնաբանությունը, ով ArmStar.am-ի հետ զրույցում նշեց, որ կատարվել է շատ մանրակրկիտ աշխատանք, հաշվի է առնվել միջոցառման սցենարը և յուրաքանչյուր երգի բովանդակությունը: «Շատ ու շատ մտահղացումներ ենք փորձել իրականացնել, փորձել ենք համապատասխանեցնել զգեստները համերգի ընթացքին: Հաշվի ենք առել նաև շոուն, ձգտել ենք ներդաշնակություն ստեղծել: Բոլոր 4 զգեստները ընտրված են ըստ համերգի ընթացքի՝ սկզբում ավելի ներկայանալի ու շքեղ, այնուհետ՝ ավելի ռոմանտիկ ու զգացմունքային, երրորդ զգեստը հարմարեցված է ավելի ռիթմիկ ու դինամիկ երգերին, որոնք ուղեկցվելու են նաև պարային համարներով, իսկ կեզրափակենք խաղաղություն խորհրդանշող սպիտակ զգեստով: Շնորհակալ եմ Զարուհուն մեր հերթական համագործակցության և այն բանի համար, որ նա ինձ թույլ էր տվել լիարժեք ազատ ստեղծագործել ու իրականություն դարձնել իմ մտքերը»:

Զրուցեց Աշխեն Մնացականյանը/ ArmStar.am/