Հայաստանի Առաջին Հանրապետության տոնի առթիվ նախագահի նստավայրում տեղի է ունեցել պարգևատրման արարողություն

Նախագահ Սերժ Սարգսյանի հրամանագրերով Հանրապետության տոնի առթիվ պետական պարգևներ և կոչումներ են շնորհվել գիտության, կրթության, մշակույթի, առողջապահության ոլորտների մի խումբ ներկայացուցիչների: Սերժ Սարգսյանը շնորհավորել է պարգևատրվածներին Հանրապետության տոնի ու պետական բարձր պարգևներին և կոչումներին արժանանալու առթիվ և Նախագահի նստավայրում այսօր կազմակերպված պարգևատրման արարողության մասնակիցներին հանձնել պարգևները:

Իր շնորհավորական խոսքում նախագահն անդրադարձել է տոնի խորհրդին, նշել, որ 1918թ. մեր ժողովրդի բոլոր խավերի մասնակցությամբ մայիսյան հերոսամարտերը կռեցին նոր բանակ, նոր պետություն: Սերժ Սարգսյանն ընդգծել է, որ մենք բոլորս մեծ հաշվով ունենք մեկ ընդհանուր նպատակ, որի անունն է Հայաստանի Հանրապետության առաջընթաց: Պետական բարձր պարգևների արժանացածները, Հանրապետության Նախագահի համոզմամբ, այն մարդկանցից են, ովքեր իրենց աշխատանքով ընդհանուր նպատակի՝ այսինքն, հայոց առաջընթացի մաս են կազմում: «Այսօր այս դահլիճում իմաստուն ձևով երկու բառով նկարագրվեց տեղի ունեցածը և մեր անելիքը՝ գոյամարտ և հատուցում: Այո՛, կյանքի և մահվան պայքար էր. պայքարում էինք ապրելու համար և այսօր մենք մեր երախտագիտությունը մեր հայրենիքը պահպանողների հանդեպ պետք է արտահայտենք կոնկրետ գործերով: Ժամանակ է պահանջվում, և ես վստահ եմ, որ տասնամյակներ անց մեր սերունդները գնահատելու են ձեր աշխատանքը, գնահատելու են նույն երախտագիտությամբ և նույն ակնածանքով»,-ասել է նախագահ Սերժ Սարգսյանը:

Հայաստանի իշխանությունների և ժողովրդի անունից նախագահը շնորհակալություն է հայտնել պարգևատրվածներին վաստակի և նվիրումի համար՝ ընդգծելով, որ որքան շատ լինեն նրանց նմանները մեր հասարակության մեջ, այնքան ավելի հարուստ ու հագեցած կլինի մեր հասարակական ու մշակութային կյանքը, այնքան ավելի ուժեղ երկիր կունենանք:

Մայիսի 28-ի քաղաքական քայլով հայրենաբնակ հայը, նախագահի խոսքով, մեծ ընդմիջումից հետո հռչակվում էր հայկական պետության քաղաքացի, և նա պետք է լիներ որակապես նոր մարդ, դրսևորեր նոր հասարակական վարքագիծ: Տոնի առիթով Հանրապետության նախագահը մաղթել է, որ մենք բոլորս հպարտությամբ կրենք Հայաստանի Հանրապետության քաղաքացու անձնագիրը և իսկապես դրսևորենք ազատ ու անկախ պետության քաղաքացուն վայել վարք:

Սերժ Սարգսյանն ընդգծել է, որ ազգային միասնությունը, ամուր պետականությունը և քաղաքացիական հստակ դիրքորոշումը հաջողության վճռորոշ նախապայմաններ են, և դա է մեզ հուշում Մայիսի 28-ը կերտած մեր նախնիների փորձը: Այս հիմքերի վրա էլ, ըստ Նախագահի, միասին բարձրացնում ենք հայոց պետականությունը նոր աստիճանի:

***

Նախագահ Սերժ Սարգսյանի հրամանագրերով, Հանրապետության տոնի առթիվ ՀՀ շքանշանով և մեդալներով են պարգևատրվել.

Սուրբ Մեսրոպ Մաշտոցի շքանշանով`

Երևանի Գ. Սունդուկյանի անվան ազգային ակադեմիական թատրոնի դերասանուհի Վարդուհի Կարապետի ՎԱՐԴԵՐԵՍՅԱՆԸ,

«Հայրենիքին մատուցած ծառայությունների համար» 1-ին աստիճանի մեդալով՝

Երևանի Հ. Պարոնյանի անվան երաժշտական կոմեդիայի պետական թատրոնի դերասան Քաջազուն Հակոբի ԳՅՈՒՐՋՅԱՆԸ, Խ. Աբովյանի անվան հայկական պետական մանկավարժական համալսարանի կուլտուրայի ֆակուլտետի դասախոս, պարուսույց Արտյուշա Հակոբի ԿԱՐԱՊԵՏՅԱՆԸ, դուդուկահար Գեորգի Վարդանի ՄԻՆԱՍՅԱՆԸ, «Երևանի մաթեմատիկական մեքենաների գիտահետազոտական ինստիտուտ» ՓԲԸ-ի գլխավոր տնօրենի տեղակալ, ՀՀ ԳԱԱ ակադեմիկոս Արման Թագվորի ՔՈՒՉՈՒԿՅԱՆԸ,

«Հայրենիքին մատուցած ծառայությունների համար» 2-րդ աստիճանի մեդալով՝

Հայ-ռուսական (Սլավոնական) համալսարանի հայոց լեզվի և գրականության ամբիոնի վարիչ, բանասիրական գիտությունների դոկտոր, պրոֆեսոր Ազատ Կոմունարի ԵՂԻԱԶԱՐՅԱՆԸ, գրող Լևոն Վանիկի ԽԵՉՈՅԱՆԸ, Ա. Սպենդիարյանի անվան օպերայի և բալետի պետական ակադեմիական թատրոնի մեներգչուհի Անահիտ Հարությունի ՄԽԻԹԱՐՅԱՆԸ, բարերար (ԱՄՆ) Բաբկեն ՄԿՐՅԱՆԸ,

Մխիթար Գոշի մեդալով`

Հալեպում Հայաստանի Հանրապետության գլխավոր հյուպատոս Կարեն Լևոնի ԳՐԻԳՈՐՅԱՆԸ, Սիրիայի Արաբական Հանրապետությունում Հայաստանի Հանրապետության արտակարգ և լիազոր դեսպան Արշակ Պողոսի ՓՈԼԱԴՅԱՆԸ,

Մխիթար Հերացու մեդալով`

Հայաստանի մանուկների հիմնադրամի հիմնադիր և խորհրդի նախագահ (ԱՄՆ) Կարո ԱՐՄԵՆԸ, ՀՀ ԱՆ գլխավոր անեսթեզիոլոգ-ռեանիմատոլոգ, «Նաիրի» բժշկական կենտրոն» ՓԲԸ-ի վերակենդանացման և անզգայացման ծառայության ղեկավար Անատոլիյ Սերգեյի ԳՆՈՒՆԻՆ, «Ուրոլոգիայի կենտրոն» ՓԲԸ-ի գիտապրակտիկ ղեկավար, բժշկական գիտությունների թեկնածու, դոցենտ Յուրի Գևորգի ԶՈՀՐԱԲՅԱՆԸ, «Թիվ 3 կլինիկական հիվանդանոց» ՓԲԸ-ի գլխավոր տնօրեն Սամվել Մելիքի ՀԱՐՈՒԹՅՈՒՆՅԱՆԸ, Երևանի «Էրեբունի» պետական բժշկական քոլեջ» ՊՈԱԿ-ի տնօրեն, բժշկական գիտությունների դոկտոր Ալինա Մաքսիմի ՔՈՒՇԿՅԱՆԸ, հասարակական-պետական գործիչ Խաժակ Անդրանիկի ԴՐԱՄՓՅԱՆԸ, Կ. Ստանիսլավսկու անվան ռուսական պետական դրամատիկական թատրոնի գեղարվեստական ղեկավար, Երևանի թատրոնի և կինոյի պետական ինստիտուտի պրոֆեսոր Ալեքսանդր Սամսոնի ԳՐԻԳՈՐՅԱՆԸ,

Անանիա Շիրակացու մեդալով`

աստղագետ (ՖՐԱՆՍԻԱ) Հակոբ ԹԵՐԶՅԱՆԸ, ՀՀ էկոնոմիկայի նախարարի առաջին տեղակալ Կարինե Աղասու ՄԻՆԱՍՅԱՆԸ, ՀՀ տնտեսական մրցակցության պաշտպանության պետական հանձնաժողովի նախագահ, տնտեսագիտության թեկնածու, դոցենտ Արտակ Գևորգի ՇԱԲՈՅԱՆԸ, «Երևաննախագիծ» ՓԲԸ-ի ճարտարապետ Էդուարդ Արամի ՍԱՖԱՐՅԱՆԸ, «Պրոլայթինգ» ընկերության հիմնադիր Ռուբեն Զորիկի ՏՈՆԻԿՅԱՆԸ,

Մովսես Խորենացու մեդալով`

Երևանի պետական համալսարանի բանասիրության ֆակուլտետի նոր գրականության ամբիոնի պրոֆեսոր, բանասիրական գիտությունների դոկտոր Կիմ Բագրատի ԱՂԱԲԵԿՅԱՆԸ, «Մեր հաղթանակը» հաղորդաշարի գլխավոր խմբագիր Ամիրան Արտավազդի ԳԱԼՍՏՅԱՆԸ, գրող (ԻՍՊԱՆԻԱ) Գոնսալո ԳՈՒԱՐՉԸ, «Համո Սահյան գիտամշակութային կենտրոն» հասարակական կազմակերպության նախագահ Շչորս Բագրատի ԴԱՎԹՅԱՆԸ, Հայկական բարեգործական ընդհանուր միության նախագահի խորհրդական (ԱՄՆ) Փանոս ԹԻԹԻԶՅԱՆԸ, փիլիսոփա, հայագետ (ԴԱՆԻԱ) Հենինգ ԼԵՀՄԱՆԸ, ՀՀ ԳԱԱ հնագիտության և ազգագրության ինստիտուտի առաջատար գիտաշխատող, պատմական գիտությունների թեկնածու Ժորես Դավթի ԽԱՉԱՏՐՅԱՆԸ, Ցյուրիխի երաժշտանոցի դասախոս (ՇՎԵՅՑԱՐԻԱ) Դավիթ Մարատի ՀԱԼԱՋՅԱՆԸ, հրապարակախոս Հրանտ Հովհաննեսի ՂԱԶԱՐՅԱՆԸ, սաքսոֆոնահար, Երևանի Կոմիտասի անվան պետական կոնսերվատորիայի պրոֆեսոր Ալեքսանդր Գրիգորի ՄԱՆՈՒԿՅԱՆԸ, Մ. Մկրտչյանի անվան արտիստական թատրոնի դերասան, փոխտնօրեն Մակիչ Շաքարի ՄԱՐԳԱՐՅԱՆԸ, «Խոսնակ» ամսագրի գլխավոր խմբագիր (ԼԻԲԱՆԱՆ) Համբիկ ՄԱՐՏԻՐՈՍԵԱՆԸ, «Դար ալ Մուրադ» հրատարակչատան գլխավոր տնօրեն (ԼԻԲԱՆԱՆ) Միշել ՄՈՒՐԱԴԸ, Բոստոնի «Երևան» երգչախմբի և նվագախմբի գեղարվեստական ղեկավար (ԱՄՆ) Կոնստանտին Հրանտի ՊԵՏՐՈՍՅԱՆԸ, Երևանի Գ. Սունդուկյանի անվան ազգային ակադեմիական թատրոնի դերասան Տիգրան Բաբկենի ՆԵՐՍԻՍՅԱՆԸ, դերասան Մուրադ Վահրամի ՋԱՆԻԲԵԿՅԱՆԸ, թատրոնի զգեստների նկարիչ Մերի Սերգեյի ՍԱՐԳՍՅԱՆԸ:

Հայաստանի Հանրապետության պետական պահպանության ծառայության աշխատակիցներ՝ ՀՀ ՊՊԾ գնդի հրամանատար, գնդապետ Արթուր Սերյոժի ԲԱՂԴԱՍԱՐՅԱՆԸ, ՀՀ ՊՊԾ ավագ թիկնապահ, մայոր Արա Մարտինի ՇԱՀԲԱԶՅԱՆԸ, ՀՀ ՊՊԾ վաշտի հրամանատարի տեղակալ, մայոր Կարեն Սերգոյի ՊՈՂՈՍՅԱՆԸ պարգևատրվել են Մարտական ծառայության մեդալով:

***
Հանրապետության տոնի առթիվ ՀՀ պատվավոր կոչումներ են շնորհվել.

Գիտության վաստակավոր գործչի՝

Երևանի պետական համալսարանի ռոմանոգերմանական բանասիրության ֆակուլտետի անգլիական բանասիրության ամբիոնի վարիչ, բանասիրական գիտությունների դոկտոր, պրոֆեսոր Սեդա Քերոբի ԳԱՍՊԱՐՅԱՆԻՆ, ՀՀ ԳԱԱ բնական գիտությունների բաժանմունքի ակադեմիկոս-քարտուղար Վիլեն Պարույրի ՀԱԿՈԲՅԱՆԻՆ, Հայաստանի պետական ճարտարագիտական համալսարանի ֆիզիկայի ամբիոնի պրոֆեսոր, ֆիզիկամաթեմատիկական գիտությունների դոկտոր Ժոզեֆ Ռեթևոսի ՓԱՆՈՍՅԱՆԻՆ,

Ժողովրդական արտիստի`

քանոնահարուհի, Երևանի Կոմիտասի անվան պետական կոնսերվատորիայի դասախոս Հասմիկ Արարատի ԼԵՅԼՈՅԱՆԻՆ,

Ժողովրդական նկարչի՝

գեղանկարիչ, Երևանի գեղարվեստի պետական ակադեմիայի գեղարվեստի ամբիոնի վարիչ, պրոֆեսոր Անատոլի Հակոբի ԳՐԻԳՈՐՅԱՆԻՆ,

Վաստակավոր արտիստի՝

Երևանի կամերային պետական թատրոնի դերասան Գրիգոր Ստեփանի ԲԱՂԴԱՍԱՐՅԱՆԻՆ, Համազգային թատրոնի դերասանուհի Նարինե Կառլենի ԳՐԻԳՈՐՅԱՆԻՆ, դաշնակահար Հայկ Ավետիքի ՄԵԼԻՔՅԱՆԻՆ, Կ. Ստանիսլավսկու անվան ռուսական պետական դրամատիկական թատրոնի դերասանուհի Աննա Վլադիմիրի ՇԱՄՑՅԱՆԻՆ (ԲԱԼԱՆԴԻՆԱ), Ազգային կինոկենտրոնի Հ. Մալյանի անվան կինոդերասանի թատրոնի տնօրեն Վարդուհի Հրաչիկի ՌՈՒՇԱՆՅԱՆԻՆ, Ա. Սպենդիարյանի անվան օպերայի և բալետի ազգային ակադեմիական թատրոնի մենապարուհի Ժակելինա Սամվելի ՍԱՐԽՈՇՅԱՆԻՆ, Երևանի Գ. Սունդուկյանի անվան ազգային ակադեմիական թատրոնի դերասան Ալբերտ Անուշավանի ՍԱՖԱՐՅԱՆԻՆ,

Վաստակավոր նկարչի՝

Փ. Թերլեմեզյանի անվան գեղարվեստի քոլեջի դասախոս Վոլոդյա Սմբատի ԱԲՐԱՀԱՄՅԱՆԻՆ, Երևանի Մ. Մկրտչյանի անվան արտիստական թատրոնի գլխավոր նկարիչ Աշոտ Հովհաննեսի ՀԱՄԲԱՐՁՈՒՄՅԱՆԻՆ, Ք. Քուշնարյանի անվան դպրոցի գեղարվեստի բաժնի ղեկավար Աննա Համլետի ՀԱՐՈՒԹՅՈՒՆՅԱՆԻՆ, գեղանկարիչ Ռաֆայել Արմենի ՄԵԼԻՔՅԱՆԻՆ,

Արվեստի վաստակավոր գործչի՝

Երևանի Կոմիտասի անվան պետական կոնսերվատորիայի թիվ 1 վոկալ ամբիոնի վարիչ, պրոֆեսոր Սուսաննա Արամի ՄԱՐՏԻՐՈՍՅԱՆԻՆ, Երևանի Գ. Սունդուկյանի անվան ազգային ակադեմիական թատրոնի գլխավոր ռեժիսոր Տիգրան Սերգեյի ԳԱՍՊԱՐՅԱՆԻՆ,

Մշակույթի վաստակավոր գործչի՝
Վանաձորի «Հորովել» երգի-պարի անսամբլի գեղարվեստական ղեկավար և տնօրեն Գարեգին Խաչատուրի ԱՆԱՆՅԱՆԻՆ, «Ակունք» ազգագրական համույթի երգիչ Սարգիս Եղիազարի ԲԱՂԴԱՍԱՐՅԱՆԻՆ, Հանրային հեռուստատեսության երաժշտական խմբագիր Քնարիկ Անդրանիկի ՓԻԼՈՍՅԱՆԻՆ: