Եթե մեզ պատերազմ պարտադրեն, պատրաստ ենք պատվով պայքարել. Սեյրան Օհանյան

«Մայիսյան տոների և հատկապես՝ Սարդարապատում, Բաշ-Ապարանում և Ղարաքիլիսայում հայ ժողովրդի տարած հաղթանակները խորհրդանշանական են, դրանք հերոսապատումներ են, որոնք ուժ են տվել հետագայում պայքարելու համար և մեր բոլոր արարումներում: Այս հերոսամարտերի ժամանակ դրսևորվեց բոլոր շերտերի միասնականությունը՝ մանուկից մինչև ծեր: Այդ ամենը ևս մեկ անգամ ապացուցում է, որ այսօր մեր երկրի դեմ ագրեսիայի, հարաբերական խաղաղության խաթարման դեպքում պետք է միասնաբար պայքարենք: Օրվա խորհուրդը շատ մեծ է, այն է՝ յուրաքանչյուրս պետք է պատասխանատվությամբ և շատ զգուշորեն վերաբերենք մեր պարտականություններին»,- Սարդարապատի հուշահամալիրում լրագրողների հետ ճեպազրույցին շեշտեց ՀՀ պաշտպանության նախարար Սեյրան Օհանյանը:

Դիտարկմանը՝ այսօր զինված ուժերն ի զորո՞ւ են դիմակայել ցանկացած ագրեսիայի և կերտել մեծագույն հաղթանակներ, Սեյրան Օհանյանը հիշեցրեց Արցախյան գոյամարտում մեր զինուժի տարած հաղթանակները և սահմանների ներկա պաշտպանության գործում արձանագրվող ձեռքբերումները, այլ կերպ՝ ՀՀ ԶՈՒ-ն իր պատերազմական քննությունը լավ է հանձնել և այսօր էլ լավ է հանձնում. «Ամեն օր շարունակում են հանձնել՝ ապահովելով Արցախի բնակչության անվտանգությունը: Զինված ուժերի ղեկավարությունը և երկրի Գերագույն հրամանատարն իրենց գնահատականներն են տալիս մեր զինուժի պատրաստականությանը: Մենք քանակի հետևից չենք վազում, մենք որակյալ մարտական պատրաստության կողմնակիցն ենք: Մենք յուրաքանչյուր զինվորի և ստորաբաժանման պատրաստվածության և պատրաստակամության աստիճանի ներդաշնակության հետևից ենք ընկնում և բարոյահոգեբանական վիճակի: Այսօր մեր զինված ուժերի գործունեությունը բարձր են գնահատում նաև միջազգային կառույցները՝ հաշվի առնելով միջազգային բոլոր միջոցառումներում Հայաստանի զինված ուժերի դրսևորած ռազմական գիտելիքներն ու մարտական պատրաստվածությունը: Այնպես, որ մենք ամեն օր պատրաստվում են պատերազմի: Իհարկե, մենք պատերազմ չենք ուզում, բայց եթե այն ամեն դեպքում պարտադրեն մեզ, պատրաստ ենք պատվով պայքարել հանուն մեր Հայրենիքի»:

Անդրադառնալով ՌԴ ԱԳ նախարարի ադրբեջանցի գործընկերոջ հետ հանդիպմանն արած հայտարարությանը, թե ստատուս-քվոյի պահպանումը ձեռնտու չէ ոչ իրենց և ոչ էլ կողմերին, Հայաստանի պաշտպանական գերատեսչության ղեկավարը նկատեց, թե ԵԱՀԿ Մինսկի խմբի շրջանակում ընթացող ղարաբաղյան հակամարտության կարգավորման բանակցային գործընթացը ժամանակ առ ժամանակ դադարներ է ունենում, բայց այնուամենայնիվ, այն կարողանում է պահպանել հարաբերական խաղաղությունը.

«Կարծում եմ, որ հակամարտող կողմերը լիարժեք չեն օգտագործել իրենց բոլոր հնարավորությունները, բայց նրանք փորձում են կառուցողական մոտեցումներ ցուցաբերել, որպեսզի հարցը խաղաղ ճանապարհով կարգավորվի»,- հավելեց նա:

Haynews.am