Գործարարի կողմից ծեծի ենթարկված Ռ. Թոփալյանը դիմել է նախագահին, վարչապետին, ոստիկանապետին

Մայիսի 3-ին՝ ժամը 14:00-ի սահմաններում, հայտնի գործարար Կարեն Շահմուրադյանը, ով ավելի շատ հայտնի է Շախտի Կարեն մականվամբ, Մաշտոցի անվան պողոտայում՝ «Մալիբու» սրճարանի հարևանությամբ գտնվող շինհրապարակում, իր՝ թիկնապահի և երկու աշխատակիցների հետ ծեծի է ենթարկել ՀՀ դիզայներների միության փոխնախագահ Ռուբեն Թոփալյանին: Ծեծկռտուքի պատճառը եղել է այն, որ Կարեն Շահմուրադյանը շենք կառուցելու համար դիզայներական աշխատանքներում օգտվել է Ռ. Թոփալյանի ծառայությունից:

Ըստ Ռուբեն Թոփալյանի՝ երբ եկել է վճարելու ժամանակը, Շահմուրադյանն արհեստականորեն ձգձգել է վճարման ժամանակը, որից էլ առաջացել է կոնֆլիկտը:

Lurer.com-ի թղթակցի հետ զրույցում Ռուբեն Թոփալյանը ասաց, որ ինքը հարվածներ չի հասցրել և չէր էլ կարող չորս հոգու հետ ծեծկռտուք սկսել, և հերքեց այն տեղեկությունները, որ ինքն է հարվածել Կարեն Շահմուրադյանին:

Վերջինս տեղեկացրեց նաև, որ դատաբժշկական փորձաքննության եզրակացության համաձայն՝ ստացել է թեթև մարմնական վնասվածք, ինչը չի համապատասխանում իրականությանը, քանի որ վերջինս դեպքից հետո երկար ժամանակ գտնվել է հիվանդանոցում, կոտրված է եղել նրա քիթը:

«Հույս ունեմ, որ քննչական վարչությունում գործի նախաքննությունը օբյեկտիվ կընթանա: Դիզայներների միությունը նամակ է ուղարկել նախագահին, վարչապետին, ոստիկանապետին, որ վերահսկողության տակ լինի այս գործը, որպեսզի հնարավորինս օբյեկտիվ քննություն անցկացվի: Պատասխան նամակներ արդեն իսկ ստացել եմ, խոստացել են աջակցել ինձ, որ վարույթն արդար ընթացք ունենա»,-ասաց Ռուբեն Թոփալյանը: