Ինքնախաբեության հիմունքները

ԱԺ-ում Տիգրան Սարգսյանը, պարզվում է, դեռևս քննարկում է այն հաջողությունները, որն իր կառավարությունը ձեռք է բերել նախորդ տարիների ընթացքում, մասնավորապես՝ այս անգամ Տիգրան Սարգսյանը որոշել էր խոսել 2012 թվականի բյուջեի կատարողականի մասին: Բանից պարզվեց՝ որքան էլ դա դեմ է բնության և ֆիզիկայի, տրամաբանության և էթիկայի օրենքներին, միևնույն է, տնտեսության նախորդ տարվա ծրագիրը արդարացում է ապրել, քանի որ գործընկեր երկրներում, ի տարբերություն մեր երկրի, գրանցվել է տնտեսական ոչ բարձր աճ: Դե ինչ, պարզվում է՝ մենք մի քանի գլուխ բարձր ենք մեր գործընկեր երկրներից, չէ՞ որ մեզ մոտ՝ Հայաստանում, ընդհանուր առմամբ, 7.2% տնտեսական աճ է գրանցվել: Եվ այս պարագայում հատկանշականն այն է, որ նորից ամեն ինչ կապվում է 2009 թվականի ֆինանսատնտեսական ճգնաժամի հետ և շեշտվում, որ այս դեպքում մենք, ասել է թե՝ Հայաստանը, հասել է իր առջև դրված նպատակներին:
Բայց Տիգրան Սարգսյանի հերթական փորձը՝ կարևորելու իր և կառավարության դերը Հայաստանի Հանրապետության բարգավաճման գործում, ոչ մի կերպ չէր տարբերվում նախորդներից, դա հասկանալու համար կարելի է ուշադրություն դարձնել այն լղոզված տեքստերին, որոնցով Տիգրան Սարգսյանը՝ ՀՀ վարչապետը, ելույթ է ունենում և ներկայացնում ձեռքբերումներն ու Հայաստանի հեռանկարները:

Ոչ մի գործընկեր երկրի անուն, ոչ մի թիվ, ոչ մի փաստ՝ միայն գործընկեր երկրներում, ի տարբերություն մեր երկրի, գրանցվել է տնտեսական ոչ բարձր աճ, և սա ասում է երկրի վարչապետն ու փորձում գաջել այն գաղջ վիճակը, որն այսօր ստեղծվել է կառավարությունում: Ջանք ու եռանդ չխնայելով՝ Տիգրան Սարգսյանը կարկուտից տուժած գյուղացիների խնդիրների ֆոնին ևս մեկ անգամ դիմեց երեսփոխանի հատկություններին և շարադրեց այն բոլոր մտքերը, որոնք հնարավոր էր գյուղացուն մեղմելու ու իրենց դեմ՝ կառավարության դեմ չլարվելու համար.

գյուղացիների աշխատանքը խրախուսելու և նրանց հոգսը թեթևացնելու նպատակով տրվել են վարկեր մատչելի՝ 8-10 տոկոս տոկասադրույքով: Բավականին արդյունավետ պայմանագրով գյուղացիներին տրվել է նաև ցորենի՝ բարձր արդյունավետություն ապահովող սերմացու, պարկը ընդամենը 6 հազար դրամով՝ ազոտական պարարտանյութ, ինչպես նաև՝ դիզվառելիք: Գյուղատնտեսության արտադրման համախառն ներքին արդյունքում 2009 թվականից հետո արձանագրվել է 19 տոկոս աճ: Ծառայությունների համախառն ներքին արդյունքում գրանցվել է 40 տոկոս աճ:

Իսկ այսօր ծայրահեղ ծանր վիճակում են գտնվում հենց այն նույն գյուղացիները, որոնց մասին խոսում էր Տիգրան Սարգսյանը, որոնց տրամադրվում են մատչելի՝ 8-10 տոկոս տոկոսադրույքով վարկեր, որոնց 6.000 դրամով պարարտանյութ էր բաժանվել, իսկ իրականում՝ գյուղ չկա որ վարկերի տակ գյուղի կեսը արտագաղթած չլինի Ռուսաստան, գյուղ չկա որ գյուղի կեսը խոպանի ճանապարհը բռնած չլինի:

Ի՞նչ է, ինքնախաբեությո՞ւն, իլյուզիա՞, ո՞ւմ համար, քաղաքացիների՞, գյուղացիների՞, մի՞թե առաջին հանրապետությունից երրորդ հանրապետություն հասնելու ընթացքում կենսափորձի ձեռքբերումը միայն հետընթաց է ապրել, մի՞թե այդ տարիների ընթացքում սեփական սխալների վրա չի սովորել կառավարությունը, իհարկե ոչ։ Այժմ այն, ինչ կատարվում է ԱԺ–ում, կառավարությունում, այն բառերը, որոնք դուրս ենք գալիս գործիչների շուրթերից, հեռու են իրականությունից, քանի որ այսօր յուրաքանչյուրը իր խնդրի տերն է, և եթե արտագաղթում են գյուղերից, և դա երկրի նախագահի խնդիրը չէ, ապա ի՞նչ պահանջել վարչապետից, առավել ևս՝ ԱԺ-ից:

Իհարկե, սպասել, ակնկալել նվազագույնը՝ կարելի է, սակայն ռադիկալ փոփոխությունների այսօր ո՛չ քաղաքացիներն են սպասում, ո՛չ էլ գյուղացիները, նրանք լռելյայն թողնում հեռանում են, ոմանք՝ միայնակ, ոմանք՝ ընտանիքներով:

Իսկ այն փոփոխությունները, իսկ այն աճերն ու զարգացումները, որոնք այսօր Տիգրան Սարգսյանը ցիտում է տարբեր բեմերից՝ կառավարությունից մինչև ԱԺ, միայն փոշի են, հասարակությունը վաղուց տեղյակ է այդ մասին, հետևաբար, այս բոլոր գործընթացները միայն ֆեյքության գրավական են:

Գևորգ Ավետիսյան