«Անծանոթը» հեռուստասերիալից Գնել Սարգսյանն ընդհարվել է «Շանթ»–ի հետ

Շատերն են ճանաչում դերասան Գնել Սարգսյանին, բայց քչերը գիտեն, որ բացի դերասանական գործունեությունից Գնելը նաև ստեղծագործում է: Գրական կեղծանուն ստեղծելու համար նա միավորել է իր և հոր անունները՝ Գնել Նորայր Սարգսյան: Մեր զրույցի առաջին իսկ րոպեներից պարզ դարձավ, որ Գնելի ներաշխարհը խորապես հարուստ է, այն նաև տոգորված է հայրենասիրությամբ: Նա այն հազվագյուտ դերասաններից է, ով աչքի է ընկնում մտավորականին հարիր զարգացածության բարձր մակարդակով: Ինչո՞ւ հազվագյուտ, որովհետև դերասանների օրվա ծանրաբեռնվածությունը հաճախ խոչընդոտ է դառնում ինքնազարգացման, կրթման ճանապարհին: Ինչևէ, ArmStar.am-ը հիացած է Գնել Նորայր Սարգսյան բանաստեղծին բացահայտելով: «Ես գրում եմ վաղուց, իսկ երբ արդեն բավական շատ գործեր էին հավաքվել, որոշեցի տպագրել, իհարկե ոչ բոլորը, որովհետև ինքս ինձ քննադատաբար եմ մոտենում»:

Երբ որոշել է տպագրել իր ստեղծագործությունները, Գնելը դիմել է Գրողների միություն՝ Լևոն Անանյանին՝ պետպատվերով դրանք տպագրելու համար: Սակայն այդ հարցն այնքան է ձգձգվել, որ նա որոշել է դիմել գրող Հովհաննես Մելքոնյանին: «Ես առհասարակ չեմ սիրում մարդկանց հիշեցնել, որ կատարեն իրենց խոստումները, ինչևէ, երբ հանդիպեցի Հովհաննես Մելքոնյանին, ով հրաշալի անձնավորություն է, մենք տպագրեցինք իմ առաջին գիրքը՝ «Վերջը սկսվում է»:

Գնելը նաև իր ներդրումն է ունեցել Հոլանդիայում հայկական գրադարանի ստեղծման գործում: «Մենք հավաքեցինք մի քանի հարյուր գիրք՝ ժամանակակից գրողների և դասականների ստեղծագործություններ, ինչպես նաև այբբենարաններ և հիմնեցինք Հոլանդիայի հայկական գրադարանը»: Դա տեղի է ունեցել Հայաստանի համար դժվարին օրերին: Ի դեպ, Գնելի առաջին գիրքը ևս ուղարկվել է Հոլանդիա:

Դերասան-ստեղծագործողի համար առանձնահատուկ ներշնչանքի աղբյուր է լուսինը: Իր երկրորդ ժողովածուում, որը վերնագրված է «Քայլ արևին» (տպագրվել է 2009թ. ԱՄՆ-ում), նա մենախոսում է լուսնի հետ: «Արևն ունի իր տիեզերական դիրքը, իր կարևորությունը, բայց մեկ էլ տեսնում ես, որ պակաս կարևոր չէ մի փոքրիկ կաթնագույն մարմին, որը կատարում է լուրջ ֆունկցիա՝ երկիր մոլորակին կյանք մատակարարելու համար: Մի տարբերություն էլ կա. արևին չենք կարող նայել, իսկ լուսնին կարող ենք, հակառակ դեպքում գուցե հենց արևով էլ զմայլվեի (ծիծաղում է)»:

Գնելն ունի ուրույն արժեքային համակարգ, որում յուրահատուկ տեղ ունի իր ընտանիքը: «Շատ եմ սիրում կնոջս անունը՝ Անահիտ: Հետաքրքիրն այն է, որ որոշել էի աղջիկ ունենալու դեպքում նրան Անահիտ անվանակոչել: Քանի որ կնոջս իր հարազատները Աննա էին կոչում, չգիտեի, որ անձնագրային անունը Անահիտ է, ու երբ զագսում դա պարզեցի, շատ ուրախացա»,-ծիծաղելով պատմում էր Գնելը: «Մոտ հինգ տարի ամուսնացած էինք, երբ ծնվեց մեր հրաշք բալիկը՝ Ալեքը: Երեխայի անունը միասին ենք որոշել»: Թեև Գնելը նշեց, որ երեխայի անունը կնոջ հետ միասին են որոշել, այնուամենայնիվ, նշեմ, որ դեռևս վաղ երիտասարդության տարիներին, երբ դեռ ամուսնացած չէր, մի բանաստեղծություն է ձոնել իր ապագա որդուն՝ Ալեքին, այսինքն՝ տղայի անունը կանխորոշված էր: «Որդիս մեծացել է հայկական օրորոցային երգերի ներքո ու հիմա էլ, երբ հեռուստատեսությամբ զուռնայի ձայն է լսում, խաղալիքները թողնում ու վազում է լսելու»: Դերասանը իր ու կնոջ հարաբերություններում շատ կարևորում է փոխադարձ սերն ու հարգանքը: «Կարևորն այն է, որ մենք առանց իրար չենք կարող ապրել ու չենք էլ ուզում պատկերացնել նման բան: Մենք չենք զգում, թե ինչպես է ժամանակն անցնում, ասեմ ավելին, մեր տանն ընդհանրապես ժամացույց չկա: Ինձ շատերն ասում են՝ ո՞նց, գոնե հյուրասենյակում ժամացույց չլինի՞: Ասում եմ՝ «Մենք մարդ ու կնիկ չենք զգում ժամանակը ոնց ա անցնում»»,- պատմում էր Գնելը:

Որպես հայր Գնելը կարևորում է երեխաների ինքնուրույնությունը. «Անգամ երբ տղաս փորձում է բազմոցին բարձրանալ, ես նրան չեմ օգնում, հետևից ձեռքս պահում եմ, որ չընկնի, բայց չեմ օգնում, թո՛ղ սովորի ինքնուրույն հաղթահարել դժվարությունները: Ես երբեք չեմ հասկացել այն ծնողներին, ովքեր ամեն ինչ անում են իրենց երեխաների փոխարեն»:

ArmStar.am-ի այն հարցին, թե ինչպես իրեն կբնութագրի Գնելը մի քանի բառով, դերասանը պատասխանեց. «Ես էմոցիոնալ եմ, պահպանողական, ազնիվ, հայրենասեր»: Մենք էլ մեր կողմից հաստատում ենք նշվածը՝ հավելելով, որ հազվադեպ են պատահում Գնել Սարգսյանի նման անկեղծ, հաճելի, զարգացած մարդիկ, ովքեր հպարտ են իրենց ազգությամբ, իրենց գործած ու չգործած սխալներով:

Ինչ վերաբերվում է մերօրյա սերիալների որակին, ապա ըստ Գնելի, այսօր սերիալները չեն կատարում իրենց վերադաստիարակչական գործառույթը: «Ինձ հաճախ բաժին են ընկնում բացասական կերպարներ, որոնք ես սիրով եմ մարմնավորում ու խաղում եմ այնպես, որ յուրաքանչյուրը հասկանա, որ դա իրականում իմ սրտով չէ: Ես մեծ սիրով կխաղայի թուրքի դեր ու այնպես կխաղայի, որ այսօր էլ ոչ ոք չէր լսի այդ թուրքական երգերը, յուրաքանչյուրի մեջ ատելություն կառաջացնեի նրանց նկատմամբ»,-ցասումով լցված խոսում էր դերասանը:

Գնել Սարգսյան դերասանն արդեն սիրված ու համակրելի է դարձել: Այդ մասին վկայում են հեռուստադիտողների արձագանքները: «Երբ նկարահանվում էր առաջին հայկական սերիալը՝ «Դժբախտ երջանկությունը», ես առաջարկ ստացա մարմնավորելու Մանչի դերը: Թեև այն ստվերային կերպար էր, բայց շատ սիրեց հեռուստադիտողը»: Հետո Գնելը նկարահանվել է «Վերջին ցանկություն», «Ուր է իմ տղամարդը», «Տիեզերքի գաղտնիքներ», «Անծանոթը» հեռուստասերիալներում: ArmStar.am-ին հետաքրքրեց, թե «Անծանոթը» սերիալում ինչո՞ւ այդքան անսպասելի մահացավ Գնելի մարմնավորած հերոսը՝ Վահանը: «Ես ընդհարում եմ ունեցել «Շանթ» հեռուստաընկերության աշխատակազմի անդամների հետ և, հավանաբար, նրանց հետ էլ երբեք չաշխատեմ, քանի դեռ այդ ընկերության ղեկավարությունում կան մարդիկ, ում հետ աշխատելը տհաճ է ինձ թե՛ պրոֆեսիոնալ, թե՛ մարդկային առումով: Եվ հենց այդ ընդհարումն էր պատճառը, որ մեր համագործակցությունը դադարեցվեց և այդքան հանկարծակի մահացավ Վահանը: Այդ հերոսը մահացավ, որովհետև ես չեմ գնացել նկարահանման, ինձ էլ չեն կանչել ու հիմա «Շանթի» հետ դատական գործընթաց ենք ծավալել իրար դեմ»:

Զրուցեց՝ Աշխեն Մնացականյանը /ArmStar.am/