Հասմիկ Կարապետյանն ու Աննա Խաչատրյանը՝ իրենց ուշացած ամուսնության մասին

Տասնյակ տարիներ առաջ և հիմա բարքերը բավական տարբեր են եղել: Հնում 23-24 տարեկանից արդեն աղջիկը համարվել է «տանը մնացած», եթե այդ տարիքում ընտրյալ չի ունեցել, արդեն ամբողջ ցեղը սկսել է անհանգստանալ, որ տանը կմնա, իսկ հարևաններն էլ մտածել են, թե ուրեմն ինչ-որ «այիբ» ունի:

Այս երևույթն այժմ ինչ-որ չափով պահպանվել է մարզերում, քաղաքում սա որոշակի վերապահումով է ընդունվում: Հաճախակի մարդիկ նստում ու «բամբասում» են այս կամ այն հայտնի անձի մասին: ArmStar.am-ն իր այս անդրադարձը նվիրում է հայկական շոու բիզնեսի այն ներկայացուցիչներին, ում ամուսնությունն ըստ «շոուբիզնեսասերների» ուշացել է։

Հարցումների շարքում ամենից շատ հնչող անուններից երգչուհի Հասմիկ Կարապետյանի անունն էր: Ժամանակին երգչուհին մեծ աղմուկ էր բարձրացել իր ու Հայկոյի երբեմնի սիրավեպով: Այժմ անձնական կյանքի նորություններով հանդես չի գալիս, ինչն այնքա~ն սպասելի է իր լսարանի կողմից: Հարցումների ընթացքում անգամ բարեմաղթանքներ հնչեցին երգչուհու հասցեին. «Ցանկանում ենք, որ շուտափույթ դուրս գա «տանը մնացածների» ցուցակից»,- ժպիտով ասաց Հասմիկի երկրպագուներից Լիլիթը: Ինչ վերաբերում է Հասմիկ Կարապետյանի արձագանքին, ապա պետք է նշել, որ երգչուհին հումորով վերաբերվեց նշածին ու պատասխանեց. «Ես կարծում եմ, որ դա բնական է, որ իմ երկրպագուներն ու ինչ-որ մարդիկ հետաքրքրված են իմ անձնական կյանքով, որովհետև իրենց միշտ հետաքրքիր և քննարկելի է հայտնիների անձնական կյանքն ու ամուսնությունը»:

Հասմիկն այսպես ձևակերպեց իր սփոփիչ խոսքը երկրպագուներին. «Սիրելինե’րս, ես շատ գնահատում եմ, որ դուք անհանգստացած եք ու սպասում եք իմ ամուսնությանը՝ երջանիկ ընտնիքի ներքո, ես դա շատ գնահատում եմ, սակայն ուշացման հետ կապված համաձայն չեմ, քանի որ կարծում եմ, որ յուրաքանչյուր մարդ ամուսնության համար ունի իրեն հարմար ժամանակը: Արվեստի բնագավառի մարդկանց համար չի կարող ամեն ինչ լինել ստանդարտ: Ես ստանդարտ կին չեմ, այդ իսկ պատճառով ինձ մոտ չէր կարող լինել դպրոց, ԲՈՒՀ և ամուսնություն ու հարսանիք: Այդ կարծրատիպը ինձ համապատասխան չէ»: Հասմիկն ArmStar.am-ին պատմեց նաև, թե ինչպիսի տղամարդ է տեսնում իր կողքին: «Իմ կողքին պիտի լինի ոչ ստանդարտ տղամարդ, նա կարող է լինել հայ, բայց գուցե մտածելակերպով պիտի տարբերվի: Ես պիտի լինեմ այնպիսի տղամարդու կողքին, ում կողքին պիտի լինեմ ես՝ առանց ձևականությունների, առանց բարդույթների և կեղծիքերի»,-պատասխանեց Հասմիկը:

Ավելի հաճախ հնչած հաջորդ անունը Աննա Խաչատրյանի անունն է: «Դե արդեն ինքն էլ ա մեծ, լավ կլիներ մտածեր ամուսնանալու մասին: Հետո էլ չգիես ինչու մեր աղջիկներն էլ չեն մտածում, որ պիտի հասցնեն երեխա ունենան, Աննա ջան, խորհուրդ ենք տալիս ամուսնանաս, մայրանաս»,-ArmStar.am-ի ձայնագրիչին իր խոսքն ուղղեց քառասուներկու ամյա, երեք երեխաների մայր տիկին Սեդան: ArmStar.am-ը Աննա Խաչատրյանի հետ փոքրիկ զրույց ունեցավ՝ պարզելու, թե երբ է երգչուհին պատրաստվում իրականացնել իր երկրպագուների սպասելիքները.

«Դեռ չեմ պլանավորում ոչ մի բան (ծիծաղում է): Այն, որ ամուսնությունս ուշացել է, գուցե ընդունված նորմերի համաձայն ուշացել է, բայց կարծում եմ, որ ամեն մարդու համար ժամանակը տարբեր է լինում: Ես դեռ չեմ հանդիպել այն տղամարդուն, ում հետ կցանկանայի անցկացնել կյանքիս մնացած տարիները: Այնպես որ, այս առումով դեռ չեմ կարող ուրախացնել երկրպագուներիս ու հանդիսատեսիս»: Աննան մեջբերեց. «Ցավոք դեռ ոչինչ չեմ պլանավորում, չնայած միանշանակ ասել չեմ կարող: Ամուսնությունն այնպիսի բան է, որ կարող է երկու շաբաթից մեկին հանդիպես, երկու ամիս հետո ամուսնանաս և այլն: Մեկ-մեկ ամուսնությունները շատ անսպասելի ու պատահական են ստացվում»,-ավելացրեց երգչուհի Աննա Խաչատրյանը:

Հայկական շոու բիզնեսի ցանկալի հարսնացուներից կարելի է առանձնացնել նաև դերասանուհի Անի Պետրոսյանին և Նազենի Հովհաննիսյանին, ովքեր նույնպես հաճախ լսում են «բա ինչու՞ չես ամուսնանում» արտահայտությունը:

ArmStar.am-ը երջանկություն է մաղթում բոլոր աղջիկներին՝ ինչպես շոու բիզնեսի, այնպես էլ ցանկացած ոլորտի ներկայացուցիչ:

Ներկայացրեց Աշխեն Մնացականյանը

Լուսանկարները՝ Աննա Խաչատրյանի, Հասմիկ Կարապետյանի, Նազենի Հովհաննիսյանի և Անի Պետրոսյանի ֆեյսբուքյան էջերից