Դավիթ Հարությունյանը «տեղը դրեց» կառավարությանը

Ազգային ժողովում այսօր էլ շարունակվեցին պետբյուջեի կատարողականի հաշվետվությունները: Զեկուցումների շարքը սկսվեց նախագահականից: Աշխատակազմի ղեկավար Վիգեն Սարգսյանն ավարտեց ծախսերի ներկայացումը, նիստը վարողը պատգամավորներին հրավիրեց հարց ուղղել զեկուցողին, որին, բնականաբար, պատգամավորներն արձագանքեցին խիստ պատասխանատու պահվածքով և զերծ մնացին նախագահի ներկայացուցչին բան ասելուց: Հայաստանի Հանրապետությունում նախագահի հետ կապված հարց լինել չի կարող...

Համեմատաբար անխոչընդոտ ընթացակարգ ունեցավ նաև ԱԺ բյուջեի կատարողականի ընդունումը: Պատգամավորներից միայն Գագիկ Ջհանգիրյանը չդիմացավ և վրդովվեց այն բանի վրա, որ բյուջեի տեքստի մեջ էլի մտցրել են «ԱԺ պատգամավորների և աշխատակազմի պահպանման ծախսեր արտահայտությունը»: «Պատգամավորին պահպանելը ո՞րն ա»,- հակադարձեց պատգամավորը՝ խնդրելով գոնե մյուս տարի իրեն «չպահպանել»:

Քանի որ 2012թ. կառավարության բյուջեի վերահսկողությունը Դավիթ Սարգսյանի վրա էր եղել, բայց քանի որ վերջինս արդեն այլ պաշտոնի էր, իսկ աշխատակազմի նոր ղեկավար Վաչե Գաբրիելյանն էլ, ըստ երևույթին, չէր կարող հաշվետու լինել իր չարածի համար, խորհրդարան էր եկել աշխատակազմի ղեկավարի տեղակալը: Տիգրան Գևորգյանը, նախորդների հաշվետվության հեզասահ ընթացքից գոտեպնդված, բավական ինքնագոհ տեսքով տեղավորվեց զեկուցողի բազկաթոռի մեջ, երկու նախադասություն արտաբերեց, թե՝ «Ձեզ բաժանված է, էլ թվեր չասեմ, թե հարցեր ունեք՝ տվեք»-ի կարգի և, երևի թե, արդեն պատրաստվում էր վեր կենալ, երբ Դավիթ Հարությունյանը որոշեց դաս տալ կառավարության ներկայացուցչին և ընդհանրապես՝ կառավարությանը:

- Ինչու՞ այս կամ այն ծրագրով էական թերակատարում է եղել, մեկ այլ ծրագրով՝ էական գերակատարում: Ինձ թվում է, որ մեր ապագա աշխատանքի համար կես էջում տեղավորել պատասխանը, ճիշտ չի: Դուք գրում եք՝ պայմանավորված է ծրագրերի առանձնահատկությամբ, որոշակի փոփոխություններով... Սա Ազգային Ժողովի ու կառավարության համատեղ աշխատանքի լավագույն ձևը չի: Ի վերջո, այս բյուջեի հաշվետվությունները նրա համար չեն, որ մեկը գա թվեր ասի՝ էսքան տոկոս, ու գնա:

Կառավարության ներկայացուցիչն ինչ-որ պատասխան քրթմնջաց, ըստ երևույթին, «իրենն առավ», հայտնեց, որ «կուղղվի», էլի մի քանի հարց լսեց, որից հետո օրենսդիրն արձակեց գործադիրին:

Ի դեպ, այսօր ևս նիստի կեսից էլի ընդամենը մեկ-երկու պատգամավոր էին ներկա պետական գերատեսչությունների զեկույցների ժամանակ՝ դատախազություն, Հատուկ քննչական ծառայություն, Վերահսկիչ պալատ, Քաղաքացիական ծառայության խորհուրդ, Կենտրոնական ընտրական հանձնաժողով, իսկ մի երկու զեկույցի ներկա միակ օրենսդիրը Խոսրով Հարությունյանն էր, որ իր ներկայացրած կառույցի կենդանությունը ցույց տալու համար բոլորին անխտիր հարց էր ուղղում:

Լուսինե Կեսոյան