Գյումրվա կլկլան բաժակ ու հայկական կոնյակ՝ լեհ քաղաքապետին (ֆոտոշարք)

Գյումրու քաղաքապետ Սամվել Բալասանյանի հրավերով երկօրյա այցով այսօր Գյումրի էին ժամանել Լեհաստանի 11-րդ քաղաքի՝ Բելաստոկի քաղաքապետ Տադեուշ Տրուսկոլասկին եւ նույն քաղաքի ռազմավարության եւ զարգացման բաժնի տնօրեն Պրզեմիսլավ Տուչլինսկին: Հյուրերը նախանձելի փաստեր ներկայացրեցին իրենց քաղաքի մասին. մասնավորապես ասացին, որ Լեհաստանի հյուսիս-արեւմուտքում գտնվող ու 350 հազար բնակիչ ունեցող այս քաղաքի բյուջեն բավականին զգալի գումար է մտնում Եվրամիությունից: «2004 թվականից, երբ Լեհաստանը դարձավ Եվրամիության անդամ, 500 միլիոն եվրո Բրյուսելի բյուջեից փոխանցվեց Լեհաստանին, որից 50 միլիոնը՝ Բելաստոկին», - aravot.am-ի հետ զրույցում ասաց լեհ քաղաքապետը:

Լեհ պաշտոնյայի այս խոսքերը դարձան գյումրեցի լրագրողների քննարկան թեման, ովքեր նախանձով նշում էին. «Պատկերացրեք Բելաստոկը 11-րդ քաղաքն է, ու էդքան ուշադրություն, բա որ երկորդը լիներ, ի՞նչ կլիներ: Իսկ մեր Գյումրիի հետ էնպես են վարվում, կարծես երկրորդական քաղաք կլինի»: Սամվել Բալասանյանը հյուրերին խոստացավ տանել նաեւ Երեւան՝ մայրաքաղաքին ծանոթացնելու համար: Այնուհետ ասելով, որ Գյումրին «ջիգյարով մարդկանց քաղաք է», պարոն Բալասանյանը խորհրդանշական նվերներ փոխանցեց հյուրերին՝ «Գյումրի» վերնագրով գիրք, որը մշակութային մայրաքաղաքի մասին հրատարակված առաջին գիրքն է, ու ըստ Սամվել Բալասանյանի, լրագրողներն անգամ չէին տեսել այն, քաղաքը պատկերող գեղանկար, հայկական կոնյակ, ու Գյումրվա մուշուրբա՝ կլկլան բաժակ: «Սա Գյումրու խորհդանիշն է, հայերեն՝ կլկլան բաժակ, եթե ինչ-որ բան խմես, զրնգում է, մի խոսքով սա երգող բաժակ է», ռուսերենով ասաց Գյումրու քաղաքապետը: Հյուրերը եւս խորհրդանշական նվերներ փոխանցեցին: Վաղը 3՝ մշակութային, սպորտային ու տնտեսական կետերից բաղկացած նախնական համաձայնագիր կստորագրվի երկու քաղաքապետերի միջեւ: Ի դեպ, հյուրերը, փայլուն տիրապետելով ռուսերենին, խոսում էին անգլերեն: Բելաստոկի քաղաքապետը, լրագրողների հետ խոսեց ռուսերեն, երբ մնաց առանց թարգմանչի: Նա իր հարցազրույցում ասաց, որ իրենք հպարտանում են, որ Բելաստոկը կանաչ քաղաք է, իրենց շրջանում զարգացած է գյուղատնտեսությունը, ունեն հատուկ տնտեսական գոտի, մեկ ամսից ձգտում են ստեղծել տեխնոպարկ, բիզնես անել: Այն նաեւ ակադեմիական քաղաք է՝ շատ բուհեր կան այնտեղ, իսկ ամենահայտնին ու ուժեղը՝ բժշկական համալսարանն է: Նշենք, որ Սամվել Բալասանյանին սեպտեմբերին հրավիրեցին Լեհաստան՝ մասնակցելու գիտաժողովի՝ ՏԻՄ թեմայով:

Նունե Արևշատյան