Վերահսկիչ պալատն արձանագրել է խայտառակություն. դադարեցվել է «Հյուսիս-հարավ»-ի ողջ շինարարությունը

Այսօր՝ հունիսի 1-ին, Ազգային ժողովում տեղի է ունեցել ՀՀ Վերահսկիչ պալատի խորհրդի նիստ, ինչից հետո կայացավ ՀՀ վերահսկիչ պալատի նախագահ Իշխան Զաքարյանի մամլո ասուլիսը: Նիստի ժամանակ քննարկվել է «Հյուսիս-հարավ» ճանապարհի շինարարության և գործող գներով շինարարական աշխատանքների արժեքի հաշվարկման գործընթացի օրինականության և արդյունավետության նկատմամբ իրականացված վերահսկողության արդյունքների վերաբերյալ ընթացիկ հաշվետվությունները:

Հիշեցնենք, որ ճանապարհի շինարարությունն իրականացնում է իսպանական «Իզոլյուքս կորսան» ընկերությունը, իսկ տեխնիկական վերահսկողության պատասխանատուն ֆրանսիական «Սոֆեժ» ընկերությունն է:

Իշխան Զաքարյանը հայտնեց, որ Վերահսկիչ պալատի՝ ապրիլի 16-ի, մայիսի 14-ի ու մայիսի 17-ի ուսումնասիրությունները ցույց են տվել, որ «Հյուսիս-հարավ» ճանապարհի շինարարության ժամանակ չեն պահպանվել բետոնի պահանջվող հաստությունը, բետոնի որակը ցածր է, ինչպես նաև շինարարությունն իրականացվել է տեխնիկական թերություններով: Վերահսկիչ պալատի արած ստուգումները խայտառակ պատկեր են արձանագրել:

Վերահսկիչ պալատի նախագահի խոսքերով՝ ճանապարհի որոշ հատվածներում ջրահեռացումը պատշաճ չի իրականացվել, առաջացել է ջրագոյացում: «Ամբողջ ճանապարհին այդ խայտառակ վիճակն է»,-շեշտել է պարոն Զաքարյանը:

«Վերահսկիչ պալատն օպերատիվ հսկողության ընթացքում արձանագրել է, որ տեխնիկական հսկողություն իրականացնող ընկերությունը չի կատարել համաձայնագրով իրեն վերապահված պարտավորությունները: Արձանագրված խախտումների և թերացումների մասին զեկուցվել է ՀՀ նախագահին. արդյունքում` ծրագրերի իրականացման տնօրենն ազատվել է աշխատանքից»,- ասել է Զաքարյանը:

Զաքարյանը նշեց նաև, որ այսօրվա խորհրդի նիստում որոշում է կայացվել առաջարկել կառավարությանը՝ միջոցներ ձեռնարկել մեկամսյա ժամկետում շտկելու իրավիճակը, իսկ եթե ոչ, լուծարել պայմանագիրը և հայտարարել նոր մրցույթ: