Ճանաչված հայրիկներից Հովոն և Արմենը խոստովանում են... (լուսանկարներ)

Քանի որ երեկ Հայաստանում նշվում էր Երեխաների պաշտպանության օրը, պահպանելով օրվա դրական տրամադրությունը՝  Lurer.com-ը փորձեց պարզել, թե ինչ հարաբերությունների մեջ են ճանաչված հայրիկները իրենց փոքրիկների հետ և ինչպես են նրանց հետ անցկացրել երեկվա տոնը: 

Ինչպես պարզվեց, հումորիստ, դերասան Արմեն Պետրոսյանը նկարահանումների պատճառով երեկ չի հասցրել իր երեք զավակների հետ ժամանակ անցկացնել, դրա փոխարեն` երեխաների տոնը անմոռանալի են դարձրել նրանց մայրիկն ու տատիկը:

Իսկ առհասարակ, Արմենն աշխատում է հնարավորինս շատ ժամանակ անցկացնել իր երեխաների հետ, քանի որ ինքն էլ եղել է այն երջանիկներից, ով հիշարժան և լավ մանկություն է ունեցել:

Ինչ վերաբերում է նրան, թե արդյոք դերասանը համաձայն է այն մտքին, որ այսօր երեխաները չեն հասցնում մանկություն ունենալ, նա պատասխանեց.

-Չեմ կարծում: Յուրաքանչյուր ժամանակաշրջան ունի իր յուրահատկությունները և, ըստ իս, այսօր իմ երեխաները ունեն այս ժամանակաշրջանին հարիր մանկություն, ինչը չեմ կարող համեմատել 40-ականների կամ գալիք` 2200-ականների հետ: Յուրաքանչյուրի համար իր մանկության տարիները ամենաքաղցրն են, այդ թվում` այսօրվա մեր փոքրիկների համար:


Ինչպես խոստովանեց հաղորդավարը, ինքն անգամ դեմ չէր լինի, եթե իր մանկության տարիները համընկնեին այս ժամանակաշրջանի հետ:

Lurer.com-ը զրուցեց նաև հումորիստ Հովհաննես Ազոյանի հետ, ում ընտանիքում վերջերս ծնվել է դերասանի երկրորդ դուստրը՝ Վիկտորիան:

Ի տարբերություն Արմենի` Հովհաննեսը մեզ պատմեց, որ երեկ ողջ օրն անցկացրել է ավագ դստեր հետ խաղալով, քանի որ փոքրիկ աղջնակը դեռ ոչինչ չի հասկանում:

Ինչպես խոստովանեց դերասանը, վերջերս փորձում է ավելի շատ ժամանակ հատկացնել իր զավակներին, քանի որ կարծում է՝ կյանքը կարճ է և երեխաների հետ հնարավորինս շատ ժամանակ պետք է անցկացնել. «Տարիները գնում են, մեզ էլ քիչ է մնացել ապրելու,-կեսկատակ հավելեց Հովհաննեսը:-Պետք է հասցնել վայելել այդ հարստությունը»:

 

Ինչ վերաբերում է ընդհանուր հետաքրքրություններին, Հովհաննեսն ասաց.

-Դե, ընկերություն ենք անում...

Անկեղծ գտնվելով` հաղորդավարը նշեց, որ դուստրը դեռևս այնքան էլ չի վստահում հայրիկին իր աղջկական գաղտնիքները, բայց ընկերություն անել ստացվում է: Վերջերս էլ հայր ու դուստր նոր հետաքրքրություններ ունեն. նրանք միասին լսում են էլեկտրոնիկ երաժշտություն, ապա` քննարկում:

Իսկ այն հարցին, թե արդյոք երկու դստրիկների հայրիկը հայ տղամարդկանցից շատերի նման չի ցանկանում անպայման նաև տղա զավակ ունենալ, նա պատասխանեց.

-Եթե անկեղծ, ոչ, քանի որ, ըստ իս, տղա մեծացնել և դաստիարակելը ավելի պատասխանատու գործ է, քան աղջկա դեպքում:

Զրուցեց Ռուբինա Հակոբյանը 

Լուսանկարները՝ Հովհաննեսի և Արմենի անձնական արխիվից և Elbaby ամսագրի

{gallery}2099{/gallery}