«Լիարժեք կյանք» ՀԿ-ը կազմակերպել էր հունիսմեկյան ֆլեշ-մոբ Ստեփանավանում

Հունիսի 1-ին՝ Երեխաների պաշտպանության միջազգային օրվա առթիվ, Ստեփանավանի Կենտրոնական հրապարակում «Լիարժեք կյանք» ՀԿ-ը՝ ՝ Անդրանիկ Մարգարյանի անվան մշակույթի պալատի հետ կազմակերպեցին հունիսմեկյան տոնական ակցիա: Երեխաներին հայրական օրհնության խոսք փոխանցեց Ստեփանավանի և տարածաշրջանի հոգևոր հովիվ Վռամ աբեղա Ղազարյանը, հնչեցին ողջույնի խոսքեր: Ելույթներով հանդես եկան Ա. Մարգարյանի անվան մշակույթի պալատի վոկալ ստուդիայի սաները: Հանպատրաստից այս միջոցառմանը չխոչընդոտեցին անգամ կարկտաբեր ամպերն ու մերթ ընդ մերթ տեղացող անձրևը: Երեխաները հնարավորություն ունեցան հրապարակում զբաղվել կավճանկարչությամբ, դիտեցին Հովհաննես Թումանյանի «Անխելք մարդը» հեքիաթի բեմականացումը՝ «Հեյֆըր Արմենիա» բարեգործական հկ սաների կողմից՝ Մարիամ Սարգսյանի ղեկավարությամբ: Ամենահետաքրքիրը փուչիկներով ֆլեշմոբն էր, որին երեխաներից բացի մասնակցեցին նաև ծնողները: Սպիտակ փուչիկներով նրանք փորձեցին եզրագծել Երկիր մոլորակը՝ ներսում կարմիր, կապույտ, ծիրանագույն փուչիկներով հատուկ կարիքներ ունեցող և չունեցող երեխաները կազմեցին Հայոց եռագույնը, խորհրդանշելով, որ Երկիր մոլորակում բոլորը հավասար են: «Լիարժեք կյանք» ՀԿ-ը, մեծապես կարևորելով բարենպաստ միջավայրի ապահովումն ու բարեկեցիկ պայմանների առկայությունը երեխաների ներդաշնակ դաստիարակության և զարգացման համար, այս միջոցառմամբ նպատակ ուներ ևս մեկ անգամ հանրության ուշադրությունը բևեռել երեխաների խնդիրներին, ապահովել նրանց հավասար մասնակցությունը համայնքային կյանքին ու միջոցառումներին:

Ըստ ՄԱԿ-ի Մանկական Հիմնադրամի (UNICEF) հրապարակած «Հաշմանդամություն ունեցող երեխաների համար կրթական, առողջապահական եւ սոցիալական պաշտպանության ծառայությունների մատչելիությունը Հայաստանում» զեկույցի /2012 թ./, մեր երկրում հաշմանդամություն ունեցող 5 երեխաներից 1-ն է հաճախում հանրակրթական դպրոց: Հարցազրույցի մեթոդով անցկացված հետազոտությանը մասնակցած 5707 երեխաներից 5322-ը բնակվում են ընտանիքում, 385-ը' մանկատանը: Հետազոտության մասնակից հաշմանդամություն ունեցող երեխաների 12%-ը չունեն ընկերներ, իսկ 33%-ը երբևէ չի մասնակցել իր ապրած համայնքում կազմակերպված որևէ միջոցառման:

Երեխաների պաշտպանության միջազգային օրը հռչակվել է 1949թ-ի նոյեմբերին՝ Կանանց միջազգային դեմոկրատական ֆեդերացիայի կողմից և առաջին անգամ նշվել 1950թ-ին: Մինչ օրս աշխարհի գրեթե բոլոր երկրներում հունիսի 1-ը նշվում է որպես Երեխաների պաշտպանության միջազգային օր: