Սուրեն Խաչատրյանի տունը խուզարկվում է

Հունիսի 2-ին Սյունիքի մարզպետ Սուրեն Խաչատրյանի տան մոտ հնչած կրակոցների հետեւանքով Գորիսի քաղաքապետի նախկին թեկնածու Ավետիք Բուդաղյանը մահացել է, եւս երկուսը' վերջինիս եղբայր Արտակ Բուդաղյանը, ով N զորամասի հրամանատար է, եւ Սյունիքի մարզպետի թիկնապահներից Նիկոլայ Աբրահամյանը ստացել հրազենային վնասվածքներ եւ տեղափոխվել Գորիսի հիվանդանոց: Նրանց առողջական վիճակը գնահատվում է ծանր եւ տեղափոխվել են Երեւան:

Դեպքի առթիվ հարուցվել է քրեական գործ` ՀՀ քրեական օրենսգրքի 104-րդ հոդվածի 2-րդ մասի 6-րդ կետով` սպանություն շատերի կյանքի համար վտանգավոր եղանակով եւ 235-րդ հոդվածով (ապօրինի զենք-զինամթերքի ձեռք բերում, պահում):

Իրավապահներին հաջողվել է արդեն պարզել դեպքերի զարգացման ժամանակագրությունն ու ընթացքը: «Փաստինֆո» գործակալության ունեցած հավաստի տեղեկությունների համաձայն՝ իրադարձությունների հանգուցալուծումն ամբողջությամբ տեսագրված է:

Կրակոցները տեղի են ունեցել Սյունիքի մարզպետ Սուրեն Խաչատրյանի առանձնատան մոտ, որտեղ առկա են տեսախցիկներ, որոնց միջոցով էլ ամեն ինչ արձանագրվել է: Մեր աղբյուրների փոխանցմամբ՝ տեսագրություններն արդեն առգրավվել են եւ հետազոտվում են նախաքննական մարմնի կողմից; Տեսագրության համաձայն՝ Բուդաղյան եղբայրները իրենք են եկել մարզպետի տան մոտ եւ առաջացած վիճաբանության ժամանակ, ըստ տեսագրության, առաջինը կրակել է Արտակ Բուդաղյանը: Փոխադարձ կրակոցների հետեւանքների մասին արդեն հայտնի է:

Ներկայումս խուզարկություններ են կատարվում մի շարք անձանց բնակարաններում, այդ թվում` Սյունիքի մարզպետի տանը: