Արտագաղթ, համատարած աղքատություն, թանկացումներ, և այս պայմաններում հրապարակի վերակառուցո՞ւմ

Օրերս Երևանի քաղաքապետարանը հայտարարեց Երևանի Հանրապետության հրապարակի վերակառուցման հայեցակարգային նախագծի հանրապետական բաց մրցույթ: Հայտարարությունը անմիջապես քննարկումների կիզակետում հայտնվեց: Քաղաքացիները տարբեր տեսակետներ հայտնեցին այն մասին, թե ինչքանով է վերակառուցման ծրագիրը լավ մտահղացում Քաղաքապետարանի կողմից:

Lurer.com-ի թղթակցի հետ զրույցում իր տեսակետն արտահայտեց նաև Շինարարների միության տնօրեն Գուրգեն Մինասյանը:

«Կարծում եմ` դա շատ լուրջ քննարկման թեմա է, պետք է բարձրացված ծրագրի մեջ խորանալ: Ունեմ ոչ մասնագիտական կարծիք` առայժմ նպատակահարմար չեմ գտնում՝  հաշվի առնելով մեր երկրում տիրող ֆինանստատնտեսական իրավիճակը, ի վերջո, մենք շատ այլ կարևոր խնդիրներ ունենք: Հրապարակի ամեն մի շենքը պատմամշակութային հուշարձան է մեր հանրապետության համար, դրանք մեր Երևանի դիմագիծն են, գրեթե ավարտուն տեսք ունեն:  Այսօր միջամտելը խիստ մասնագիտական խնդիր է,և այդքան էլ պահանջված չէ»:

Գուրգեն Մինասյանը կարծիք հայտնեց, որ այս ընթացքում, մեր երկրի սոցիալ-տնտեսական ներկա դրությունում աննպատակահարմար է վերակառուցել կամ նման ծրագիր մշակել հրապարակի համար, քանի որ այն գրեթե ավարտուն տեսք ունի և արդեն իսկ դարձել է մեր քաղաքի խորհրդանիշներից մեկը:

«Կարծում եմ` այդ միջամտությունը պետական ծրագրերով չի կատարվում, դա ինվեստորների մոտեցում է, իսկ եթե պետական ծրագրով է, ուրեմն մենք պետք է ավելի լուրջ ուշադրություն դարձնենք ոչ թե այդ մի փոքր կենտրոնի, այլ՝ Երևանից դուրս առկա խնդիրների վրա, մեր գյուղերի վերականգման, վերակառուցման, ոռոգման և խմելու ջրերի խնդիրներ ունենք, ճանապարհների,  կոյուղիների լուծման հստակ պրոբլեմներ կան, արտագաղթ, համատարած աղքատություն, թանկացումներ: Այս սոցիալական լուրջ խնդիրների պարագայում ինչքանո՞վ է կարևոր վերակառուցել հրապարակը, եթե դրա կարիքն առանձնապես չի զգացվում:  Եթե ինվեստորներն են, դա արդեն այլ քաղաքականությունն է»: