Սասուն Միքայելյան և Լիսկա. աբսուրդ

2009-ին Կոտայքի մարզի առաջին ատյանի դատարանում «Մարտի 1-ի» գործով կալանավորված ԱԺ պատգամավոր, «Սասուն» ջոկատի հրամանատար Սասուն Միքայելյանը դատապարտվեց 8 տարվա ազատազրկման։

Վերջինս մեղավոր էր ճանաչվել ՔՕ 225 հոդվածի առաջին մասով (զանգվածային անկարգությունների կազմակերպում) և 235-րդ հոդվածի 2-րդ մասով (ապօրինի զենք-զինամթերք պահելը կամ կրելը մի խումբ անձանց կողմից նախնական համաձայնությամբ՝ պատժվում են ազատազրկմամբ՝ 2-6 տարի ժամկետով):

2011-ի մայիսի 27-ին Սասուն Միքայելյանը ազատ է արձակվել դատապարտյալների հիվանդանոցից:

Երեկ՝ հունիսի 2-ին, ոստիկանության աշխատակիցները Սյունիքի մարզում՝ մի խումբ անձանց տներում, հայտնաբերել են մեծ քանակի զենք-զինամթերք։ Հիմնական զինամթերքը հայտնաբերվել է Սյունիքի մարզպետ Սուրեն Խաչատրյանի (Լիսկա) և նրա մերձավորների բնակարաններում։

Թե այս տարիների ընթացքում քանի անգամ է Սուրեն Խաչատրյանն առնչվել այս կամ այն հանցագործության հետ, լավ գիտեն իրավապահ մարմինները, ովքեր կատարվածը խնամքով «կոծկել են»:

Զուգահեռ անցկացնելով երկու միջադեպերի միջև՝ իրավապահ մարմիններից ակնկալում և պահանջում ենք արդարացի որոշում Սուրեն Խաչատրյանի պատժի վերաբերյալ և սպասում ենք Սերժ Սարգսյանի որոշմանը, այն է՝ Սյունիքի մարզպետի հրաժարական:

Ստորև ներկայացնում ենք նաև տեսանյութ, որում Սասուն Միքայելյանը 2009-ին իր 8 տարվա դատապարտման դատավճիռը լսելիս, արհամարհելով դատարանին, սկսում է երգել (դիտե՛լ 3-րդ րոպեից):

Գայանե Համբարձումյան