Վրացական FlyGeorgia ավիաընկերությունը, 2 օր է. Դուբայում է թողել ՀՀ 7 և Վրաստանի 10 քաղաքացու. ԱԳՆ-ն արձագանքում է

Հայաստան 3 Հունիս, 2013 15:16

Ինչպես Lurer.com-ը տեղեկացավ ՀՀ ԱԳՆ լրատվական ծառայությունից, Դուբայի օդանավակայանում գտնվող ՀՀ քաղաքացիների խնդրի վերաբերյալ Աբու Դաբիում ՀՀ դեսպանությունը տեղյակ է, չնայած այն հանգամանքին, որ իրենք քաղաքացիները մինչ այս պահը չեն ահազանգել դեսպանություն։

Դեսպանատան աշխատակիցները փորձում են կապ հաստատել FlyGeorgia ընկերության ներկայացուցիչների հետ՝ խնդիրը կարգավորելու համար»։

Նշենք, որ այսօր Tert.am -ին են դիմել Հայաստանի Հանրապետության 7 քաղաքացիներ՝ տեղեկացնելով, որ Արաբական Միացյալ էմիրություններում հայտնվել են անելանելի դրության մեջ:

Քաղաքացիներն օգտվել էին վրացական FlyGeorgia ավիաընկերությունից, և Դուբայից հետադարձ թռիչքը պետք է կայանար կիրակի առավոտյան՝ Դուբայ-Թբիլիսի չվերթով, սակայն թռիչքը նրանց համար անհասկանալի պատճառով չի կայացել: Մի քանի ժամ Դուբայի օդանավակայանում սպասելուց հետո տեղի սպասարկող անձնակազմը հայտնել է, որ թռիչքը հետաձգվում է և որ քաղաքացիներին հյուրանոց կտրամադրվի, մինչև թռիչքը կայանա:

«Սակայն արդեն երկրորդ օրն է՝ լուր չունենք: FlyGeorgia ընկերության ներկայացուցիչը չկա, չգիտենք՝ ում հետ կապ հաստատենք,: Դուբայի օդանավակայանը չունի որևէ տեղեկություն դեպի Թբիլիսի թռիչքների մասին: Էլեկտրոնային ժամատախտակներից, անհետացել են Դուբայ-Թբիլիսի բոլոր թռիչքները և պարզ չէ, թե երբ կլինի»,- տեղեկացրել են ՀՀ քաղաքացիները: Նրանք են. Դավիթ Խաչատրյան, Արմեն Սարգսյան, Տաթևիկ Պապյան, Քրիստինե Մուրադյան, Հայկ Սարգսյան, Գարիկ Խաչատրյան, Հակոբ Տերտերյան։

Նրանք գրել և զանգեր են կատարել Թբիլիսի՝ «հետադարձ կապի միջոցներով, սակայն ոչ մի պատասխան»:

Բացի հայաստանցի քաղաքացիներից, նույն վիճակում են հայտնվել նաև Վրաստանի տասը քաղաքացիներ: