Արմավիրի մարզպետ. Դուք ինձ ի՞նչ տվեցիք, որ ես Ձեզ ինչ տամ

Կարկտահարությունից տուժած արմավիրցի հողագործներին կառավարության խոստացած աջակցությունը դեռ չի հասել: Ավելի կոնկրետ՝ հասել է, բայց միայն սածիլի ու սերմացուի տեսքով: Հիշեցնենք, որ գյուղացիներն ի սկզբանե մերժում էին այսօրինակ օգնությունը՝ հիմնավորելով կրկնակի ցանքսի աննպատակահարմարությամբ: Բայցեւայնպես, բոստանային մշակաբույսեր աճեցնողների զգալի մասն արդեն սածիլ ու սերմացու ստացել է: Սակայն դա այն չէ, ինչը, թերեւս, կարող է որոշակիորեն փոխհատուցել հողագործի ստացած վնասի գոնի չնչին մասը:

Մինչ կարկուտից տուծաժ գյուղերի բնակիչների մի մասը Հայաստանը լքելու ուղիներ է որոնում՝ այլեւս անիմաստ համարելով կառավարության խոստացած օգնությանն սպասելը, մի շարք մեծ ու փոքր հանձնաժողովներ դեռ շարունակում են ցուցակներ կազմել: Ցուցակ են կազմում վարկերի համար, մեկ այլ խումբ էլ զբաղված է հիմնադրամի համար ցուցակ գրելով, երրորդները՝ սոցծառայության ցուցակ են կազմում, չորրորդները՝ ֆոնդերի, այլոք՝ ջրի վարձի զիջման, մյուսները՝ հողի հարկի: Կան նաեւ բարերարների համար ցուցակ գրողներ, եւ այսպես շարունակ:

Կարելի է ասել, որ մի ամբողջ մարզ ու որոշ գերատեսչություններ գրեթե մեկ ամիս միայն գրում ու ջնջում են, հետո նորից գրում ու նորից ջնջում….

Հանձնաժողովականներին հասկանալ, թերեւս, կարելի է. ցուցակները կազմելիս պետք է այնքան աչալուրջ լինել, որ ընտրություններում նախագահի ՀՀԿ թեկնածուին ձայն տված համայնքները հանկարծ սխալմամբ չհայտնվեն կառավարության աջակցության 50 տոկոսանոց փաթեթի մեջ:

Որքան էլ անհեթեթ է մարդկանց նյութական ու բարոյական կորստի վրա քաղաքական խաղեր տալը, բայց խաղն սկսել է Արմավիրի մարզպետն ինքը: Աշոտ Ղահրամանյանը, կարկուտից անմիջապես հետո, երբ մարզպետարանում արտակարգ խորհրդակցություն էր հրավիրել, պահը չկորցնելով՝ գյուղապետերին ասել էր. փետրվարի 19-ին դուք ինձ ի՞նչ տվեցիք, որ ես ձեզ ինչ տամ:

Առավել մանրամասն՝ «Հրապարակ»-ի հունիսի 4-ի համարում: