Նաիրիտում դժբախտ դեպքի մասին լուրերը հաստատվեցին

«Նաիրիտ» ՓԲԸ-ում մայիսի 20-ին տեղի ունեցած արտադրական պատահարի շուրջ «Հրապարակ»-ի հրապարակած տվյալներն ամբողջությամբ հաստատվել են: Այդ օրը քլորի արտադրամասում սանդուղքից վայր էր ընկել «Նաիրիտի» աշխատող վարպետ Սերգեյ Պետրոսյանը և ոտքի կոտրվածքներով տեղափոխվել «Երևան» բժշկական կենտրոն: Գործարանի ղեկավարությունը խոստացել էր իր վրա վերցնել Պետրոսյանի բուժման ծախսերը՝ փոխարենը հրահանգելով նրան թաքցնել իր հետ կատարվածը և ներկայացնել, թե վնասվածքն ստացել է տանը:

Թերթի հրապարակումից հետո ոստիկանները լրացուցիչ քննություն են կատարել և պարզել իրականությունը:

Մայիսի 29-ին Պետրոսյանը լրացուցիչ բացատրություն է տվել, որ վերը նշված վնասվածքն ստացել է «Նաիրիտ» ՓԲԸ-ում: Նշանակվել է փորձաքննություն, կատարվում է հետաքննություն»: Ինչու է Պետրոսյանը դեպքից հետո կեղծ բացատրություն տվել, ով և ինչու է ստիպել նրան կոծկել իրականությունը, ոստիկանության հասարակայնության հետ կապերի և լրատվության վարչության պետ Աշոտ Ահարոնյանը թերթին չի հայտնել: Այս պահին հայտնի չէ նաև, թե կհարուցվի՞ արդյոք քրեական գործ, և ինչ ծավալի են արտաքին աշխարհի համար փակ այդ տարածքում նման խախտումները:

«Հրապարակ»-ի տեղեկություններով, Պետրոսյանը վայր է ընկել 3-4 մետր բարձրությունից, սանդուղքի «փտածության» պատճառով: Գործարանում փնտրում են տեղեկատվական արտահոսքի աղբյուրը, իսկ վարպետ Պետրոսյանը ճնշված հոգեվիճակում է: Բացի ֆիզիկական տանջանքներից, որոնք վարպետը կրել է, հիմա էլ հետաքննիչներն են նրան սպառնացել պատասխանատվության ենթարկել կեղծ տեղեկություններ տրամադրելու համար:

Մանրամասները՝ «Հրապարակ»-ի այսօրվա համարում: