«Հյուսիս-հարավ» ՊՈԱԿ-ն անդրադառնում է Վերահսկիչ պալատի արած բացահայտումներին

Վերահսկիչ պալատի՝ ապրիլի 16-ի, մայիսի 14-ի ու մայիսի 17-ի ուսումնասիրությունները ցույց են տվել, որ «Հյուսիս-հարավ» ճանապարհի շինարարության ժամանակ չեն պահպանվել բետոնի պահանջվող հաստությունը, բետոնի որակը ցածր է, բացի այդ, շինարարությունն իրականացվել է տեխնիկական թերություններով: Վերահսկիչ պալատի արած ստուգումները խայտառակ պատկեր են արձանագրել:

Հիշեցնենք, որ ճանապարհի շինարարությունն իրականացնում է իսպանական «Իզոլյուքս կորսան» ընկերությունը, իսկ տեխնիկական վերահսկողության պատասխանատուն ֆրանսիական «Սոֆեժ» ընկերությունն է:

Լուրեր.com-ը փորձեց կապ հաստատել «Հյուսիս-հարավ ճանապարհային միջանցքի ներդրումային ծրագիր» ՊՈԱԿ-ի ներկայացուցիչների հետ։ Հանրային կապերի պատասխանատու Նանե Աճեմյանը մեզ հետ զրույցում ասաց, որ այս պահի դրությամբ գործընթացը գտնվում է Կապի և տրանսպորտի նախարարության և Ասիական զարգացման բանկի հսկողության տակ, իսկ շինարարության կապալառու «Իզոլյուքս Կորսան» ընկերության կողմից իրականացված աշխատանքները, որոնց մասին խոսք էր եղել այդ ստուգումների մեջ, դեռևս իրենց կողմից ընդունված չեն, և մինչ օրս դրանց դիմաց վճարումներ չեն իրականացվել։

«Օրերս Կապի և տրանսպորտի նախարարի մոտ, ինչպես կապալառուի, այնպես էլ ծրագրի շինարարության վերահսկողությունն իրականացնող «Սաֆեժ» ընկերությունների կողմից ընդունվել է նշված խնդիրների առկայությունը, նշվել է, որ դրանք համատարած բնույթ չեն կրում և չեն անդրադառնա ծրագրի իրականացման ամբողջ գործընթացի վրա, սակայն մտահոգության առարկա են և հրատապ շտկման կարիք ունեն, ինչի համար և մշակվել է համապատասխան գործողությունների ծրագրեր և տրվել են բանավոր երաշխավորություններ. արդյունքում՝ նախարարի կողմից նրանց այդ գործողությունների ծրագրերը հավանության են արժանացել, և կապալառուին ու շինարարության վերահսկողին տրվել է 1 ամիս ժամանակ՝ ապացուցելու այդ ծրագրերի արդյունավետությունն ու իրականացումը»,-ասաց Նանե Աճեմյանը։