Կգնանք կփակենք փողոցները. «Տոնուս»-ի Աշոտի կողմից խաբված քաղաքացիները պատրաստ են ծայրահեղ քայլերի (տեսանյութ)

Արդեն տևական ժամանակ է, ինչ թեժ իրավիճակ է ստեղծվել Դավիթաշեն համայնքի 2-րդ թաղամասում «Տոնուս» շինարարական ընկերության կողմից կառուցվող 44/4 բազմաբնակարան բնակելի շենքի շուրջ:

Նշենք, որ շինարարական ընկերությունը պատկանում է ԲՀԿ-ական Աշոտ Տոնոյանին: Քաղաքացիները պահանջում են իրենց տրամադրել օրինական ճանապարհով «Տոնուս» ՍՊԸ–ից ձեռք բերած բնակարանները։ 2006 թվականից 140 ընտանիք «Տոնուս Քոնսթրաքշնս» ՍՊԸ–ի հետ կնքել են անշարժ գույքի առքուվաճառքի նախնական պայմանագիր, կատարել պարբերական վճարումներ վերը նշված բազմաբնակարան շենքում բնակարան ձեռք բերելու նպատակով: Սակայն վերջերս բնակիչներին հայտարարել են, որ իրենք բնակարանների նկատմամբ իրավունքներ չունեն, քանի որ շենքը գրավ է դրված «ԱՐՑԱԽԲԱՆԿ» ՓԲԸ-ում։ Նշենք, որ շինարարության ավարտը նախատեսվում էր 2012թ. դեկտեմբերի 31-ին, սակայն մինչ օրս ոչ միայն չեն ստացել ո՛չ բնակարանը, ո՛չ էլ դրա սեփականության վկայականը:

Բնակիչները նամակով դիմել էին նախագահին, որտեղից ստացել են պատասխան, թե այս խնդրով զբաղվում է Ֆինանսների նախարարությունը, իսկ ՀՀ ֆինանսների նախարարի խորհրդական Հայկ Դավթյանը շահառուների հետ հանդիպման ընթացքում խորհուրդ է տվել սպասել մինչ շինարարական ընկերության սնանկ ճանաչվելը՝ նշելով, որ որպես գերակա շահ՝ պետությունն աջակցելու է քաղաքացիներին:

Այսօր բնակիչները ևս մեկ անգամ հավաքվել էին «ԱՐՑԱԽԲԱՆԿ»-ի դիմաց, ներկայացուցիչները նաև հրավիրվել էին ներս՝ զրուցելու բանկի իրավաբանների հետ: Նշենք, որ նման հանդիպում կրկին է տեղի ունեցել, սակայն որևէ էական տեղաշարժ գործընթացը չի ունեցել:

«Ո՞նց ապրենք էս երկրում, թողնում փախնում են մարդիկ, անօրեն երկիր ա։ Մեր հաջորդ քայլն էն ա, որ կգնանք կփակենք փողոցները։ Էլ ի՞նչ ունենք կորցնելու, ոչինչ չունենք։ Եթե իմ երեխան 60.000 դոլարը մի կոպեկի նման կորցնում է՝ այսքան տոկոսներ եկած վրան, ոչ մի միջոց չի ձեռնարկվում, ես էլ ոչինչ չունեմ անելու, ես էլ ինչի համար եմ գոյատևում։ Գնալու տեղ ու փող չունեմ, հնարավորություն չունեմ, մեր կյանքը մեր երկրում ա վերջանում՝ մեքենաների տակը»,-Lurer.com-ի թղթակցի հետ զրույցում ասաց «ԱՐՑԱԽԲԱՆԿ»-ի դիմաց հավաքված քաղաքացիներից մեկը: Ներկաներից մեկն էլ զգուշացրեց իշխանություններին, որ եթե համապատասխան քայլեր չձեռնարկվեն, իրենց բնակարանները իրենց չհասնեն, կդիմեն ծայրահեղ քայլերի:

Քաղաքացիների բողոքն առավել մանրամասն առաջարկում ենք դիտել Lurer.com-ի պատրաստած տեսանյութում.