ԱԻՆ առաջընթացը ճանաչվել է ամբողջ աշխարհում

ՀՀ ԱԻ նախարար Արմեն Երիցյանն այսօր ընդունել է Հայաստանում ՄԱԿ-ի նորանշանակ մշտական համակարգող, ՄԱԶԾ մշտական ներկայացուցիչ Բրեդլի Բուզետտոյին:

ԱԻ նախարարը, ողջունելով հյուրին և շնորհավորելով նշանակման առթիվ, մասնավորապես ասաց.

- ՄԱԿ-ի նախորդ հանձնակատարի հետ մենք շատ արդյունավետ համագործակցություն ենք ունեցել, ու կարծում եմ, որ Ձեզ հետ էլ լավ կաշխատենք։ Վերջերս էլ Ժնևում կայացած ԱՌՆ գլոբալ պլատֆորմի հանդիպմանը, ուր մեզ հետ էին նաև ՄԱԿ-ի ներկայացուցիչները, ես ներկայացրել եմ մեր կատարած աշխատանքներն ու առաջընթացը, որի մեջ մեծ է նաև ՄԱԿ-ի ներդրումը։ ՄԱԿ-ն այստեղ շատ լավ թիմ ունի, որի հետ մենք համագործակցում ենք գրեթե բոլոր ուղղություններով։

Երևի արդեն լսել եք, որ վերջերս մեր գյուղերում կարկտահարության դեպքեր են գրանցվել, որը գլոբալ տաքացման հետևանք է։ Ես արդեն հանձնարարել եմ, որ այդ ուղղությամբ ուսումնասիրություն արվի, և մեր աշխատակիցներն էլ ներգրավվեն այդ խնդիրների լուծման գործընթացում։

Բրեդլի Բուզետտոն, շնորհակալության հայտնելով ջե

րմ ընդունելության համար և իր հերթին շնորհավորելով նախարարին պաշտոնում վերանշանակման կապակցությամբ, հավելեց.

- Շնորհավորում եմ այն կատարված աշխատանքի համար, որն իրականացվել է ԱՌՆ ոլորտում Ձեր ղեկավարությամբ։ Դա ճանաչվել է ամբողջ աշխարհի մակարդակով։ Ես երկար տարիներ աշխատել եմ ճգնաժամային կառավարման և ԱՌն ոլորտում։ Օրինակ՝ Ինդոնեզիայի ցունամիից հետո ղեկավարել եմ արձագաքման գործողությունները և օգնել տեղական իշխանություններին՝ ԱԻ պլան մշակելու հարցում։ Ինչ վերաբերում է կարկտահարությանը, ապա ես տեղյակ եմ, որ ՄԱԶԾ աջակցությամբ որոշ համայնքներում կարկտից պաշտպանող ցանցեր են տեղադրվել, և մենք պատրաստ ենք շարունակել աջակցությունը։

ՄԱԿ-ի նորանշանակ հանձնակատարը նաև նշեց, որ հաճելիորեն զարմացած է և ուրախ՝ իմանալով, որ ԱԻ նախարարությունը լուրջ համագործակցություն է ծավալել նաև մասնավոր ընկերությունների հետ։

Նախարար Ա. Երիցյանն ընդգծեց, որ գործընկերները հավատում և վստահում են նախարարությանը, որը մասամբ պայմանավորված է նաև միջազգային հեղինակավոր կազմակերպությունների հետ արդյունավետ աշխատանքով։

Հանդիպման ավարտին Բ. Բուզետտոն կարճ շրջայց կատարեց ԱԻ նախարարությունում՝ ծանոթանալով ժամանակակից տեխնիկական հնարավորություններով հագեցած դահլիճում, աշխատանքային սենյակներում։

Հեռանալիս ՄԱԿ-ի մշտական համակարգողը խոստացավ, որ մոտ ժամանակներս կրկին կայցելի ԱԻՆ՝ առավել հանգամանալից ծանոթանալու նախարարության աշխատանքին ու հնարավորություններին։