Աշխատավարձերը դժվար թե բարձրանան

«Հայկական ժամանակ»-ը գրում է. ««... Որևէ մեկը չի լսել, որ ես քարոզարշավի ողջ ընթացքում ասեմ, որ մենք կտրուկ բարձրացնելու ենք թոշակները, կտրուկ բարձրացնելու ենք աշխատավարձերը: Եվ դա ես չեմ ասել գիտակցաբար, որովհետև դա էլ եմ կաշառքի մի ձև համարում... Մենք միջին աշխատավարձի չափը բարձրացնելու, թոշակները ավելացնելու, սոցիալական այլ ծրագրեր ունենք: Կառավարությունում հիմա լրջությամբ քննարկվում է 2013թ. այսինքն այս տարվա հուլիսի 1-ից աշխատավարձի չափը բարձրացնելու հարցը»:

Այսպիսի հայտարարություն արեց Սերժ Սարգսյանը այս տարվա մարտի 18-ին՝ մի քանի լրատվամիջոցների ներկայացուցիչների հետ հանդիպման ժամանակ: Ինչպես նկատեցիք, «գիտակցաբար» արված այդ հայտարարությունը հնչեց Երևանի ավագանու ընտրություններին նախորդած շրջանում: Հուլիսի մեկից աշխատավարձերը բարձրացնելու մասին հայտարարություններ հնչեցին ավագանու ընտրությունների բուն քարոզարշավի ընթացքում նույնպես: Սակայն երեկ ՀՀ աշխատանքի և սոցիալական հարցերի նախարար Արտեմ Ասատրյանը վերջակետ է դրել այդ հարցում. «Պետական համակարգի աշխատողների աշխատավարձերի ու կենսաթոշակների չափերին կառա-վարությունը կանդրադառնա 2014 թ. հունվարի 1-ից»,- երեկ Աժում լրագրողների հետ ճեպազրույցի ընթացքում ասել է նախարարը:

Այսպիսով կարելի է արձանագրել, որ ընտրությունների շրջանը ավարտվել է, և հուլիսի մեկից աշխատավարձ բարձրացնելու թեման այլևս փակված է: Հիմա նորից մեջբերենք Սերժ Սարգսյանի, ընդամենը երկուսուկես ամիս առաջ արած հայտարարությունը. «Կառավարությունում հիմա լրջությամբ քննարկվում է 2013թ„ այսինքն այս տարվա հուլիսի 1-ից աշխատավարձի չափը բարձրացնելու հարցը»: Զգում եք չէ՞, թե ինչպես Սերժ Սարգսյանը «գիտակցված» չէր ասում, որ այս տարվա հուլիսի մեկից աշխատավարձերի բարձրացման հարցը կառավարությունը քննարկում է: Հա, բայց հո չի ասել, թե բարձրացնելու է, ասել է՝ քննարկվելու է: Հիմա էլ Արտեմ Ասատրյանը հո չի՞ ասում, որ 2014 թ. հունվարի մեկից բարձրանալու է: Ասում է՝ «կառավարությունը անդրադառնալու է»: Այսինքն, հաջորդ տարվանից աշխատավարձերը բարձրացնելու հարցին կառավարությունը կանդրադառնա ճիշտ այնպես, ինչպես ըստ Սերժ Սարգսյանի կառավարությունը պետք է քննարկեր այս տարվա հուլիսի 1-ից աշխատավարձերը բարձրացնելու հարցը:

Մի խոսքով, ձևակերպումների այս տեղատարափից մի բան է հասկանալի՝ հունվարի մեկից էլ աշխատավարձերը դժվար թե բարձրանան:

Մանրամասները՝ «ՀԺ»-ի այսօրվա համարում: