Իշխանությունները հակված չեն Սուրեն Խաչատրյանին պաշտոնից ազատելուն

Հունիսի 2-ին Սյունիքի մարզպետ Սուրեն Խաչատրյանի տան մոտ հնչած կրակոցների հետևանքով Գորիսի քաղաքապետի նախկին թեկնածու Ավետիք Բուդաղյանը մահացավ, ևս երկուսը՝ վերջինիս եղբայր Արտակ Բուդաղյանը, ով N զորամասի հրամանատար է, և Սյունիքի մարզպետի թիկնապահներից Նիկոլայ Աբրահամյանը, ստացան հրազենային վնասվածքներ և տեղափոխվեցին հիվանդանոց:

Այս կրակոցները լայն արձագանք ստացան քաղաքացիական ակտիվի կողմից, սկսեցին համեմատականներ տարվել ԱԺ նախկին պատգամավոր Ռուբեն Հայրապետյանին պատկանող «Հարսնաքար» ռեստորանային համալիրում տեղի ունեցած սպանության միջև:

Տեղեկության տարածումից անմիջապես հետո ֆեյսբուքում խումբ ստեղծվեց «Պահանջում ենք Լիսկային ազատել մարզպետի պաշտոնից և պատասխանատվության ենթարկել» կոչով.

Lurer.com-ի թղթակիցը նախաձեռնության վերաբեյալ հարց ուղղեց Դավիթ Սանասարյանին. «Ի՞նչ եք կարծում՝ որպես նախաձեռնության անդամ, որքանո՞վ ազդեցիկ կլինի այս նախաձեռնությունը՝ հասարակական արձագանքը կդառնա՞ Ս. Խաչատրյանի հրաժարականի պատճառ, ինչպես եղավ Ռուբեն Հայրապետյանի դեպքում.

«Նախ ասեմ, որ Խաչատրյանը դեռ հրաժարական չի տվել մարզպետի իր պաշտոնից, դա կեղծ և Բաղրամյան 26-ից շարադրված հայտարարության տեքստ է, որտեղ չի ասվում, որ հրաժարականի դիմում է ներկայացնում, այլ ժամանակավորապես դադարեցնում է իր պարտականությունները, 2-րդ՝ քաղաքացիական ակտիվիստը ոչ թե պետք է գուշակությամբ զբաղվի և ասի՝ հրաժարական կտա այս կամ այն պաշտոնյան, կամ քրեական պատասխանատվության կենթարկվի, այլ՝ կոնկրետ քայլեր իրականացնի սեղանին դրված խնդրին լուծում տալու համար։ Այս պարագայում մենք մեր առաջ դրել ենք խնդիր, բայց ռազմավարություն և մարտավարություն չունենք մշակած, որը կանենք առաջիկա օրերի ընթացքում...»:

Հարցրեցինք նաև, թե, ըստ իրեն, ինչի հետևանք են այս կրակոցները, արդյոք մեր երկրում անպատժելիության մթնոլո՞րտն է շիկացել, վերջինս պատասխանեց.

«Տեղի ունեցածը նորություն չէ Հայաստանի Հանրապետությունում և բնութագրում է ռեժիմն ամբողջությամբ. ցույց է տալիս, թե ինչ կադրային հարստությամբ են փայլում, ու երկրում տեղի ունեցող անպատժելիության և ամենաթողության մթնոլորտի սնողները ռեժիմի հենասյուները պաշտոնյաներն ու թաղային հեղինակություններն են:

Սուրիկ Խաչատրյանը բազմիցս է «փայլել» իր հակաօրինական գործունեությամբ։ Չեմ ցանկանում մանրամասնել, բայց այդ բոլոր դեպքերից ավելի վատ է այն, որ Սյունիքի մարզում վախի մթնոլորտն է գերիշխում, որի արդյունք է նաև այս ողբերգական դեպքը...

Հիմա մենք՝ քաղաքացիական հասարակության ներկայացուցիչներս, չպետք է թողենք, որ այս դեպքն էլ շոու սարքեն, ինչպես ցանկանում էին անել «Հարսնաքարի» դեպքի ժամանակ...Պետք է ոչ միայն պաշտոնից ազատել (որին հակված չեն իշխանությունները), այլև քրեական պատասխանատվության ենթարկել, իսկ դա կլինի միայն սկզբունքային և հետևողական պայքարի արդյունքում...»։