Ձվերի արտաքին տեսքի փոփոխությունները` ածան հավերի մոտ խանգարումների արդյունք

Ի պատասխան ս.թ. հունիսի 4-ից 5-ը ՀՀ զանգվածային լրատվամիջոցներով շրջանառվող տեղեկատվության այն մասին, որ Հայաստանի Հանրապետության մի քանի մարզերում և Երևան քաղաքի Չարբախ թաղամասի խանութներից մեկում վաճառվում են վնասակար ձվեր՝ ներքոնշյալ լուսանկարներով, և դրանք վնասակար են՝

ՀՀ ԳՆ սննդամթերքի անվտանգության պետական ծառայություն հայտնում են, որ համաձայն սննդամթերքի անվտանգության ոլորտը կարգավորող ՀՀ օրենսդրության՝ առանց համալիր լաբորատոր հետազոտությունների իրականացման, միայն մասնագետի զգայական հետազոտությամբ (դիտման միջոցով) սննդամթերքը, այդ թվում՝ ձուն, վտանգավոր կամ վնասակար ճանաչել չի կարելի:

Բացի այդ, լուսանկարներում պատկերված ձվերի արտաքին տեսքի փոփոխությունները կարող են առաջանալ ածան հավերի մոտ նյութափոխանակության որոշակի խանգարումների արդյունքում, որոնք վարակիչ հիվանդություն չեն հանդիսանում և մարդու համար անվտանգ են: 

Սակայն ձուն պետք է լինի մակնշված, մաքուր և առանց անորակության բացահայտ նշանների (ՀՀ կառավարության որոշումը «Ձվի եւ ձվամթերքի տեխնիկական կանոնակարգը հաստատելու մասին» 29 սեպտեմբերի 2011 թվականի N 1438-Ն):

Եվ քանի որ, լուսանկարներից դատելով, ձվերի վրա առկա է մակնշման պահանջների խախտում, կոչ ենք անում ՀՀ բնակիչներին և զանգվածային լրատվության միջոցներին նման ձվերի հանդիպելու դեպքում անմիջապես հայտնել ՀՀ ԳՆ սննդամթերքի անվտանգության պետական ծառայությանը դրանց վաճառքի վայրի մասին՝ Ծառայության կողմից համապատասխան գործողություններ կատարելու համար: Հիշեցնում ենք կապի միջոցները՝

Թեժ գիծ»՝ 010 434040, ամեն աշխատանքային օր՝ ժամը 9:00-18:00,
Էլեկտրոնային փոստի հասցե՝ [email protected], շուրջօրյա: