Էրիկ Կարապետյան. «Բոլոր իմ նվերները գերադասում եմ ինքս ձեռք բերել»

Այսօր սիրված երգիչ Էրիկ Կարապետյանի ծննդյան օրն է: Երգիչը դարձավ քսանհինգ տարեկան: ArmStar.am-ը շնորհավորեց Էրիկին և փոքրիկ զրույց ունեցավ նրա հետ այն ժամանակ, երբ երգիչը աշխատանքային եռուզեռով մի վայրից մյուսն էր տեղափոխվում իր մեքենայով:

Ինչպես տեղեկացանք, ծննդյան տոնակատարությունը սկսվել է դեռևս երեկ գիշերվանից: “Ծննդյանս օրը երեկվանից է սկսվում: Բոլոր ընկերներս, երկրպագուներս, բոլոր-բոլորը ինձ արդեն շնորհավորել են: Երեկ, երբ “Հավանա” ռեստորանային համալիրում երգում էի, իմ գործընկերներն ինձ անակնկալ մատուցեցին, հետո խնջույքս շարունակեցի իմ ընկերների, հարազատների հետ”,-պատմեց Էրիկը: Երգչի փոխանցմամբ մինչ ուշ գիշեր մտերիմներով տոնել են իր քսանհինգ ամյակը: “Այսօր արդեն կրկին աշխատում եմ: Անգամ շատերն ասում են՝ քսանհինգամյակդ է, ինչու՞ չես նշում, ուղղակի այսօր գործերս այնքան շատ են, որ պիտի ելույթ ունենամ և կարողանամ համատեղել աշխատանքս իմ ուրախության հետ”:

Խոսակցության ողջ ընթացքում Էրիկը ժպտում էր, ծիծաղում, ուներ շատ բարձր, տոնական տրամադրություն: Զրույցի ընթացքում հիշեցինք նաև Էրիկի՝ Վրաստանում գտնվող ծնողներին. “Այսօր ծնողներիս հետ արդեն հասցրել եմ սկայպով խոսել, բարեմաղթանքներ ու շնորհավորանքներ լսել: Ընտանիքիս անդամներից միայն եղբայրս է այստեղ ու, եթե երեկոյան ժամանակ ունենանք տանն էլ կնշենք”:

Էրիկը պատմեց նաև, որ առանձնապես չի սիրում իր ծննդյան օրը, հատկապես վերջին երկու տարիներին: “Ես ճիշտն ասած այնքան էլ չեմ սիրում իմ ծննդյան օրը: Սիրում եմ, որ հավաքվում ենք: Հատկապես վերջին երկու տարիներին զգում եմ, որ տարիներն արագ են անցնում ու չեմ հասցնում անելիքս անել: Բայց լավ է, որ այս տոնը կա, կան ընկերներ, ովքեր իմ ուրախությունը կիսում են”:

Էրիկի համար նվեր ստանալը երբեք կարևոր չի եղել: “Ինձ համար կարևորը վերաբերմունքն է: Ոչ մի նվեր ինձ համար երկրորդական չի եղել, անկախ գույնից, արժեքից: Այն, որ ընկերներս իմ կողքին են այսօր, ինձ համար լավագույն նվերն է”: Նշենք նաև, որ երգիչ Էրիկը մյուսներից առանձնանում է նաև իր գաղտնապահությամբ: Մեր այն հարցին, թե ինչ նվեր է ստացել սիրելիի կողմից, երգիչը պատասխանեց. “Դրա մասին ոչ ոք չի գրում, ես չեմ սիրում անձնականի մասին խոսել”,-ծիծաղով նշեց նա: “Բոլոր այն նվերները, որ մարդիկ ստանում են իրենց ծննդյան օրերին, ես գերադասում եմ ինքս ձեռք բերել: Ես ունեմ երկու բնակարան Վրաստանում, բայց ուզում եմ ինքս ինձ համար տուն գնել,եթե շատերը սպսում են, որ իրենց ծնողներն իրենց համար մեքենա առնեն, ես դա ինքս եմ անում: Ինձ դուր է գալիս ինքնուրույնությունը և Փառք Աստծո: Ինձ համար ծիծաղելի են այն մարդիկ, ովքեր սպսում են, թե ով ինչ իրենց նվեր կտա”,-ծիծաղով ավելացրեց Էրիկը:

Էրիկը չմոռացավ նշել նաև, որ իր ծննդյան օրը ծնվել են իր համար շատ մտերիմ մարդիկ: “Ինձ համար անակնկալ էր, երբ իմացա, որ իմ շատ սիրելի երկու երգիչներն են ծնվել իմ ծննդյան օրը (Բրայան Մակնայթ և Դավիդ Բիսբալ. հեղ.)։ Բացի այդ, այս օրն է ծնվել նաև իմ ընկերներից մեկը: Այսօր մենք փոխադարձ շնորհավորեցինք միմյանց և ռեժիսոր Լուսինե Մարտիրոսյանը, ում հետ միասին մենք պատրաստել են մի անակնկալ իմ երկրպագուներին տեսահոլովակի տեսքով: Ես շնորհավորում եմ իմ ընկերներին”:

ArmStar.am-ը շնորհավորում է Էրիկին իր ծննդյան 25-ամյակի առթիվ, մաղթում մեծ բեմեր, հաջողություններ, նպատակների իրականացում և, որ ամենակարևորն է, երկարակեցություն:

Էրիկը չմոռացավ նաև շնորհակալություն հայտնել ArmStar.am-ին ուշադրության և բարեմաղթանքների համար:

Հոբելյարին շնորհավորեց Աշխեն Մնացականյանը/ArmStar.am/