Նանսենի հայրենակիցների առաջ սեւերես չենք մնա

Հինգ տարի առաջ Սկանդինավյան երկրներից Հայաստան էր եկել մի տարօրինակ, բայց շատ հետաքրքիր՝ քարտեզների կողմնորոշման սպորտաձեւով զբաղվող խումբ: Այս մարդիկ քարտեզների օգնությամբ պտտվում են աշխարհե աշխարհ, հասնում քաղաքներ, փորձում իրենց, թե ինչպես են կողմնորոշվում տարածքում քարտեզի օգնությամբ:

Եվ ահա, այս տարի եւս 75 մարդուց կազմված մի խումբ քարտեզի օգնությամբ Վրաստանից եկել հասել է ուղիղ Նոյեմբերյան: Խմբում ներգրավված են եղել նորվեգացիներ, որոնց շատ հետաքրքրել է իրենց հայրենակցի՝ Ֆրիտյոֆ Նանսենի սիրո, հոգատարության եւ ուսումնասիրությունների երկիրը: Բնական է, որ նրանք փորձել են իրենց մեծ հայրենակցի մասին պատմող ինչ-ինչ հիշողություններ, մասունքներ գտնել:

Բարեբախտաբար, կարող ենք ասել, որ սեւերես չենք մնա մեծ հայասերի հայրենակիցների առաջ:

Երեւանում, ինչպես գիտեք, Նանսենի անվան այգի կա։ Վաստակավոր բժիշկներ Կառլեն եւ Սառա Եսայանների հովանավորությամբ շատ շուտով կբացվի նույն այգում կառուցված Նանսենի հուշարձանը, թանգարանը, եկեղեցին, որի հարեւանությամբ տեղադրված են լինելու խաչքարեր:

Այնպես որ, վաղը՝ ժամը 10-11-ին, նորվեգացի հետաքրքրասերների խումբը կլինի Երեւանում: Այս մասին գրել է hayeli.am-ը։

Աշխարհում պատահականություններ չեն լինում: Եվ չկա ավելի խորհրդանշական զուգադիպություն, քան այն, որ մեծ հայասերի անունը կրող այգում բացվելիք հուշակոթողների առաջին այցելուները հենց նրա հայրենակիցներն են լինելու:

Հիշեցնենք, որ անցյալ տարի՝ այս օրերին, այգու հարակից շենքերի բնակիչները աղմուկ էին բարձրացրել՝ անհանգստանալով, որ այգում ընթացող շինարարությունը բնավ էլ թանգարան ու եկեղեցի կառուցելու նպատակով չէ, այլ հերթական զվարճանքի շինություն է լինելու:

Սա եւս, այն եզակի բացառություններից է, երբ բնակիչների տագնապներն իզուր էին. Կարճ ժամանակից Եսայան ընտանիքների շնորհիվ Նանսենի անվան այգում կլինի մեծ հայագետի թանգարանի, հուշարձանի եւ եկեղեցու, հարակից խաչքարերի բացումը: