Ավագանու մանդատը մոտ մեկ միլիոն արժե

Ընտրական մեծ տրիադայից դեռ ուշքի չեկած քաղաքական կուսակցություններն ու գործիչները խումհարի մեջ սկսել են հետընտրական ինվենտարիզացիա անցկացնել, որպեսզի հասկանան' ինչ կորցրին, ինչքան կորցրին, ապաեւ' նախապատրաստվեն գալիք 2017-18-ի ընտրություններին: Վիճակը, ըստ նրանց, ուղղակի ողբերգական է: Պարզվել է, որ նախորդ՝ 2007-ի ընտրությունների համեմատ ուղիղ երկու անգամ ավելացել են մանդատների գները. եթե 2007-ին խորհրդարան մտնելու համար կուսակցությունը համամասնական ամեն պատգամավորի հաշվով ծախսում էր մոտ 500 հազար դոլար, մեծամասնականով ընտրվողը' մի քիչ ավելի, ապա այս ընտրություններում հինգ տոկոս շեմը հաղթահարելու ծախսերը հասել եւ անցել են մեկ միլիոնի շեմը, իսկ մեծամասնականը հասել է միլիոնուկեսի:

Այս մասին գրում է «Հրապարակ»-ը եւ հավելում, որ Էլ ավելի ողբերգական է վիճակը Երեւանի ավագանու ընտրությունների դեպքում. որպեսզի կուսակցությունը հաղթահարի 6 տոկոսի շեմը, պետք է ծախսի-բաժանի 3-4 միլիոն դոլար: Արդյունքում ստանալով ավագանիում 3-4 տեղ՝ ստացվում է, որ ավագանու մանդատը եւս մոտ մեկ միլիոն արժե, եւ դա այն դեպքում, երբ ավագանին չի վարձատրվում՝ աշխատանքները կատարում է հասարակական հիմունքներով: «Ուզում ես փռվել գետնին ու հեկեկալ»,- ասաց ինվենտարիզացիան ավարտած, մեծամասնականով ընտրվել չկարողացած, բայց գումարները ծախսած «չպատգամավորը»: «Բա 2017-ի՞ն ինչ թվեր կլինեն»,- գրեթե հեկեկաց նա:

Մանրամասները՝ թերթի այսօրվա համարում: