Լավ կլինի, եթե կարողանանք 1 միավոր տանել Երևանից. Մալթայի մարզիչ

Մալթայի հավաքականի գլխավոր մարզիչ Պիետրո Գեդինն այսօր՝ հունիսի 6-ին մամուլի ասուլիս տվեց՝ խոսելով վաղը Հայաստանի հավաքականի հետ կայանալիք 2014թ. աշխարհի առաջնության ընտրական փուլի հանդիպման մասին:

- Ինչպե՞ս է Մալթան նախապատրաստվում Հայաստանի դեմ խաղին՝ Իտալիայի հետ մարտին կայացած խաղից հետո:

- Մենք շատ լրջորեն ենք պատրաստվում Հայաստանի հետ խաղին, քանի որ մրցակիցն ունի շատ ուժեղ եւ երիտասարդ խաղացողներ:

- Մալթայի հավաքականում բացակայում են 4 լեգեոներներ: Ի՞նչ կասեք այդ կապակցությամբ:

- Իհարկե, լավ չէ, որ նրանք բացակայում են, բայց ունենք նրանց փոխարինողներ եւ պատրաստվելու ենք նույն ոճով:

- Ինչպե՞ս են ֆուտբոլիստներն իրենց զգում երկար մրցաշրջանից հետո:

- Ֆուտբոլիստները բավական ուժ ունեն, թեեւ մրցաշրջանն իրոք երկար էր:

- Մալթան կարո՞ղ է խլել միավորներ Հայաստանից: Ըստ Ձեզ, արդյո՞ք, Հայաստանը կարող է դուրս գալ խմբից:

- Նախորդ ընտրական փուլում Հայաստանը 17 միավոր վաստակեց: Այս ընտրական փուլն էլ Հայաստանը հաջող սկսեց, բայց հետո եղան խնդիրներ: Ինձ համար Հայաստանը շարունակում է մնալ խմբի ուժեղագույն թիմերից մեկը: Մենք ամեն ինչ կանենք, որ լավ խաղանք: Ֆուտբոլն անկանխատեսելի է եւ ցանկացած 11 մետրանոց, կամ անկյունային՝ կարող է ազդել խաղի ելքի վրա:

- Մալթան միավոր չունի: Արդյո՞ք սա լավ հնարավորություն է՝ առաջին միավորը վաստակելու:

- Մենք տուրիստների կարգավիճակով չենք ժամանել Հայաստան: Եթե կարողանանք 1 միավոր տանել Երևանից, ապա լավ կլինի: Ամեն ինչ կանենք՝ լավ հանդես գալու համար:

- Ընտրական փուլերի մեկնարկներից առաջ ի՞նչ խնդիրներ են դրվում Մալթայի հավաքականի առջև:

- Մեր խնդիրը՝ յուրաքանչյուր խաղում լավ հանդես գալն է: Մենք զբոսանքի դուրս չենք գալիս: Ցանկանում են լավ արդյունքի հասնել, մենք միշտ պայքարում ենք:

-Որո՞նք են Հայաստանի ուժեղ կողմերը:

- Նրանք ունեն 5-6 շատ ուժեղ ֆուտբոլիստներ, որոնք խաղում են եվրոպական լավ թիմերում:

- Միֆսուդը մոտ 10 տարի Մալթայի առաջատարն էր, բայց ընթացիկ ընտրական փուլն անհաջող է դասավորվում նրա համար: Որո՞նք են պատճառները:

- Բոլոր դեպքերում՝ նա թիմի ավագն է եւ մեկ խաղի համար նա կարող է հավաքել ու ցուցադրել իր լավագույն խաղը:

- Հայաստանի հավաքականի խաղացողներից ավելի շատ ումի՞ց եք վտանգ սպասում:

- Բոլորից:

- Ինձ հետաքրքրում է, թե Մալթայի ակումբներն ի՞նչ բյուջե ունեն եւ ինչպե՞ս են գոյատեւում ընդհանրապես:

- Մալթայի ակումբները շատ հարուստ են:

- Իսկ ո՞րն է ամենահարուստ թիմը:

- Գաղտնիք է:

armsport.am