«Ազատամարտիկը չի ծախվում». ակցիա

Այսօր կառավարության շենքի առջև բողոքի ակցիա էին կազմակերպել իրենց սոցիալական վիճակի բարելավման համար պայքարող ազատամարտիկները: «Պահանջում ենք մեր խնդիրների կարգավորում» վանկարկումներով Ազատության հրապարակում նստացույց անող ազատամարտիկները Կառավարության շենքի դիմաց պահանջեցին կենսաթոշակային հարցերի լուծում, անվճար բուժօգնություն, անվճար երթևեկելու հնարավորություն: Ազատամարտիկները պահանջեցին վարչապետ Տիգրան Սարգսյանից, որպեսզի իջնի ներքև և անձամբ իրենց ընդունի, բայց այդպես էլ ազատամարտիկների պահանջը վարչապետը չիրականացրեց, այլ միայն առաջարկ եղավ վաղը հանդիպել 3-4 ազատամարտիկի հետ:

«Մենք այլևս չենք կարողանում այսպես գոյատևել: Ուզում են հրապարակը վերակառուցել, մեզ չեն կարողանում տարրական պայմաններով բավարարել, հրապարա՞կ են վերակառուցում»,-բարկացած ասում էին ազատամարտիկները: 

Նրանց ձեռքին կային «Ազատամարտիկը պետության հովանու ներքո», «Կառավարությունից պահանջում ենք պետական մոտեցում», «Ազատամարտիկը չի ծախվում», «Զինծառայողին արժանապատիվ կենսաթոշակ» գրություններով պաստառներ և դրոշներ:

Նշենք, որ ազատամարտիկները կոչ արեցին իրենց ընկերներին միանալ և միասին պայքարել իրենց իրավունքների համար։