Վարդան Մինասյան. Ոչ մեկ թող չկարծի, թե Մալթային հեշտ է հաղթելը

Հայաստանի հավաքականի գլխավոր մարզիչ Վարդան Մինասյանն այսօր՝ հունիսի 6-ին հանդիպել է լրագրողների հետ, որի ընթացքում խոսել է Մալթայի դեմ կայանալիք ընտրական խաղի մասին:

- Պարոն Մինասյան, վերջին ասուլիսից հետո Դուք ասացիք, որ խնդիր չեք դրել դուրս գալ եզրափակիչ փուլ: Կոնկրետ ի՞նչ խնդիր է հետապնդում Հայաստանի հավաքականը:

- Մեր խնդիրը ցանկացած խաղում հաղթելն է:

- Ինչպե՞ս եք պատրաստվում Մալթայի ընտրանու հետ խաղին:

- Մի փոքր խնդիր ունի Կառլեն Մկրտչյանը, բայց հույս ունեմ, որ նա կհասցնի վերականգնվել: Որոշ խաղացողներ խաղային պրակտիկա չունեն, ինչն անհանգստացնող հանգամանք է:

- Մալթան ամենաթույլ թիմն է այս խմբում: Դա կազդի՞ Ձեր թիմի մոտիվացիայի վրա:

- Իհարկե, կա որոշ ճնշում, բայց մենք կփորձենք հաղթահարել այդ խնդիրը: Մեզ համար կարեւոր չէ, թե մրցակիցն ինչ ուժ ունի: Մենք պետք է լավ խաղանք:

- Յուրա Մովսիսյանը 1 օր ուշացումով միացավ ազգային հավաքականին: Հատուկ կարգավիճա՞կ կա նրա համար:

- Ոչ, ես տեղյակ էի, որ նա ուշ է գալու: Ոչ մեկ հատուկ կարգավիճակ չունի: Նա ԱՄՆ-ում մարզվում էր, պարզապես այնտեղից ժամանելն ավելի բարդ է:

- Նորայր Ասլանյանի մասին ի՞նչ կասեք:

- Նա հիմնական կազմի խաղացող չէ, սակայն պոտենցիալ ունի:

- Մեր հավաքականը 2 խաղերում տարբեր մարտավարությա՞մբ է հանդես գալու:

- Բնականաբար՝ այո: Տարբեր մարտավարություններ կլինեն, կազմում էլ կլինեն փոփոխություններ:

- Հենրիխ Մխիթարյանը ներողություն է խնդրել հավաքականի թիմակիցներից: Ինչպե՞ս կմեկնաբանեք նրա նախորդ հայտարարությունը, որի համար ներողություն է խնդրել:

- Ես չեմ ցանկանում մեկնաբանել նրա հայտարարությունը: Հավանաբար, նա այդպես է արտահայտվել անհաջող խաղից հետո, իսկ լրատվամիջոցներն էլ ցանկանում են ուռճացնել ամեն ինչ: Ես գտնում եմ, որ ցանկացած դեպքում պետք է լավ մթոնոլորտ լինի կոլեկտիվում: Դա իմ աշխատելաոճն է:

- Երիտասարդականից կա՞ն խաղացողներ, որոնք կմիանան ազգայինին:

- Վարազդատ Հարոյանը եւ Կարեն Մուրադյանը կմասնակցեն երիտասարդականի խաղին, իսկ վաղը՝ կմիանան մեզ:

- Մալթայի կազմում կա՞ն խաղացողներ, որոնցից զգուշանում եք:

- Այո, 9 համարը:

- Հենրիխ Մխիթարյանի երեկվա արտահայտությունն արդյո՞ք նշանակում է, որ կան խնդիրներ թիմի ներսում:

- Եթե խնդիրներ լինեն կոլեկտիվում, ապա չի կարող լինել հաջողություն: Առաջին պայմանը պետք է լինի միասնությունը:

- Արդյ՞ոք Մալթայի հետ խաղում խնայելու եք ուժերը, որպեսզի հաջող հանդես գաք Դանիայում:

- Ոչ մեկ թող չկարծի, թե Մալթային հեշտ է հաղթելը: Պարզապես պետք է զգույշ լինենք, քանի որ, օրինակ, Յուրա Մովսիսյանը դեղին քարտ ունի:

Աղբյուր՝ Armsport.am