Նարեկ Մակարյան. «Փոքր ժամանակ վատ եմ երգել» (լուսանկարներ)

Անուն, ազգանուն` Նարեկ Մակարյան

Ծննդյան օր, ամիս, տարի` 19.08.1992

Սեփականությունները` մազերս :): Ես համեստ տղա եմ, սեփականություններ չունեմ

Ընտանիքի անդամները` հայրս, մայրս

Ծննդավայրը` Երևան

Հոբբին` սպորտ. առողջ ապրելակերպի կողմնակից եմ:

«Հայաստանի ձայնը» հեռուստանախագծում եզրափակիչ փուլի մասնակից Նարեկ Մակարյանն իր երաժշտական գործունեությունը նոր չի սկսել: Նա երգում է տասը տարեկանից. «Առնո Բաբաջանյան» միջազգային մրցույթի հաղթող է, իսկ 2011-ին Հայաստանը ներկայացրել է «Սլավյանսկի բազարին» և զբաղեցրել չորրորդ տեղը, որի մրցանակը եղել է ձայնասակավառակ և տեսահոլովակ թողարկելը: Հենց դրա շրջանակներում է Նարեկը վերջերս ներկայացրել իր առաջին` «Անձրև» ձայնասկավառակն ու համանուն տեսահոլովակը: Այժմ նա սովորում է կոնսերվատորիայի ջազ-վոկալ բաժնի մագիստրատուրայի առաջին կուրսում:

Զրուցակիցս անկեղծորեն նշեց, որ միշտ ցանկացել է հայտնվել «Ե՞ս Yes!»-ի էջերում: Ուրախ ենք իրագործելու նրա երազանքն ու հուսով, որ առաջիկայում այնքան հաջողություններ կունենա, որ նրան անդրադառնալու առիթներ հաճախ կունենանք :)

- Ինչպե՞ս ես սկսել գործունեությունդ: Կպատմե՞ս առաջին հաջողություններիդ մասին:

- Երգել սկսել եմ տասը տարեկանից՝ «Դո-ռե-մի» մանկապատանեկան խմբում: Պիտի ազնվորեն խոստովանեմ, որ այդ ժամանակ լավ չեմ երգել և այդ ժամանակվա տեսաերիզները փակի տակ եմ պահում. միայն ես եմ տեսել :): Կարծում եմ՝ դա քիչ աշխատելու արդյունք էր: Այնուհետև շատ եմ աշխատել ինձ վրա, ինչի շնորհիվ շտկել եմ առկա թերությունները: Տասներեք տարեկանում նույն «Դո-ռե-մի»-ում Հասմիկ Կարապետյանի հետ երգել եմ իր և Անդրեի «Գաղտնի վեպ» երգը: Այդ ժամանակվանից իմ մեջ պրոֆեսիոնալիզմի աճ նկատվեց և սկսվեց կարիերայիս զարգացումը: Միշտ մնալով երաժշտության մեջ՝ հասել եմ այստեղ:

- Ի՞նչ տվեց քեզ «Հայաստանի ձայնը»:

- Ես միշտ զարգացման մեջ եմ. յուրաքանչյուր նախագծում, յուրաքանչյուր համերգից հետո փորձում եմ աճել: Նախագիծն ինձ զարգացրեց, որովհետև ես միշտ մտածված երգեր եմ ներկայացրել, որոնք հատուկ ասելիք ունեին: Եղել են արձագանքներ, որոնք ինձ համար շատ կարևոր էին, քանի որ մեծ պատիվ է երգի կատարման համար Սիրուշոյից դրական արձագանք ստանալը: Իր հետ անձամբ էլ շփվեցի ու հասկացա, որ իրոք տաղանդավոր և շատ լավ երաժիշռտ է: Դե, իսկ մաեստրո Շարլ Ազնավուրի արձագանքն ինձ ուղղակի ցնցեց. շոկի մեջ էի, երբ տեսա, որ արձագանքել է կատարմանս: Նույնիսկ մտածում էի ֆեյսբուքի ֆեյք էջ է, սակայն հետո տեսա, որ իր կայքում էլ է դա դրված: Զանգահարեցի Սոֆիին, ասացի՝ մի բան եմ ուզում ասել, ուղղակի ամաչում եմ, երբ ասացի, որ Շարլ Ազնավուրն է արձագանքել, երկար լռություն տիրեց. Սոֆին ուզում էր հասկանալ՝ կատակո՞ւմ եմ, թե՞ ոչ :):

- Ասում ես՝ երգերիդ ընտրությունը միշտ մտածված էր: Այդպիսի խիստ ընտրությունը նաևորոշակի PR ծրագի՞ր էր:

- Ես PR-ի մասին քիչ եմ մտածել, քանի որ առաջնայինը ժողովրդին լավ երգերով գրավելն էր: Հիմնականում ընտրում էի հայկական երգեր, որովհետև սա «Հայաստանի ձայնն» էր: Անգամ փողոցում ինձ հաճախ էին ասում, որ շատերը երգում են արտասահմանյան երգեր, և իրենք չեն հասկանում դրանք: Կարծում եմ՝ հանդիսատեսին պետք է գրավեն նաև խոսքերը, և ես որոշեցի երգել նաև հայերեն երգեր: Սկսեցի Սիրուշոյի «Հավատում եմ» երգով, որը ներկայացրեցի իմ տարբերակով: Ինչպես Արտոն է ասում՝ պետք է մտածել: Ի դեպ, ինքն ինձ շատ լավ խորհուրդ տվեց, ասաց՝ մտածի: Երգիչը նաև պիտի մտածող լինի, դա և´ երգերի ընտրությանն էր վերաբերում, և´ PR-ին, և´ ասելիքին:

- Երգը նորովի ներկայացնելն ունի իր առավելություններն ու թերությունները: Մի դեպքումհանդիսատեսը հնարավորություն ունի գնահատելու քո տեսակը, մյուս դեպքում՝ նա արդենսովոր է երգի բնօրինակին և, մեկ անգամ լսելով, կարող է խորթություն զգալ, չընկալել քոտարբերակը: Մտավախություններ չունեի՞ր այս հարցում:

- Մտավախություններ շատ եմ ունեցել, քանի որ ներկայացրածս յուրաքանչյուր երգի մեջ իմն եմ դրել: Հաճախ ռիսկի եմ գնում, քանի որ եթե ռիսկի չգնաս, անընդհատ նույնը կանես, իսկ նույնը կրկնել ես չեմ սիրում: Միշտ հետևում եմ արձագանքներին, դրանք հիմնականում դրական էին և կարծում եմ՝ ինչ երգել եմ, ստացվել է:

- Առաջին գալա-համերգից հետո հայտնվեցիր վտանգավոր գոտում և Սոֆին փրկեց քեզ: Դրանից հետո այդ առումով այլևս մարզչիդ օգնության կարիքը չունեցար, քանի որ, եթե ոչ միշտ, ապա գոնե հաճախ ձեր թիմի առավելագույն ձայները քեզ էին բաժին հասնում:«Nosa»-ն չընդունվե՞ց, թե՞ այլ բան փոխվեց այդ ընթացքում: Ո՞րն էր գաղտնիքը:

- Կարծում եմ՝ ամբողջ խնդիրն անմիջականության, պարզության մեջ է:

- «Nosa»-ն անմիջական չէ՞ր:

- Անմիջական էր, սակայն կարծում եմ, որ երգիչը նաև դերասան է և ամեն անգամ ինչ-որ կերպարով է ներկայանում: «Nosa»-ն ուրիշ կերպար էր, «Հավատում եմ»-ը՝ ուրիշ, Սայաթ- Նովան՝ ուրիշ և այդպես շարոււնակ: Կերպարից է կախված՝ հադիսատեսն ինչպես կընդունի քեզ: Մինչև «Nosa»-ն ես երգել եմ այլ կերպարում: Պիտի ասեմ, որ մատուցածս ինձ դուր է եկել, բայց հիմա մտածում եմ, որ գուցե այդ երգն ուղղակի մրցութային չէր կամ... դժվարանում եմ պատասխանել: Ես իսկապես շատ եմ մտածել այդ մասին, բայց առ այսօր չեմ կարողանում գտնել պատասխանը: Ե՞րգն էր սխալ' չէ, պարապա՞ծն էր սխալ՝ չէ, շոո՞ւն էր վատը՝ չէ: Իսկապես չգիտեմ:

- Սովորաբար փորձում եմ չարտահայտել կարծիքս, և դա անում եմ միայն առանձինդեպքերում, բայց պետք է ասեմ, որ եզրափակչում «Երազ իմ երկիր հայրենի» երգի քոկատարումը ցնցող էր: Ի՞նչ ճանապարհ անցար «Nosa»-ից մինչև «Երկիր հայրենին»:

- Միշտ պետք է աճ գրանցել: Եթե դու մտնես շատ ուրժեղ երգով ու չկարողանաս դա պահել, անկում ես գրանցելու: Իմ տարբերակում հակառակը եղավ: Ես քայլ առ քայլ աճում էի, արժանանում լավ գնահատականի: Դա պարապմունքների արդյունքն էր: Ես և Սոֆին ուղղակի տիտանական աշխատանք ենք արել, ու դրա արդյունքը եզրափակիչն էր, որովհետև ինձ շատ են ասում, որ կատարումիցս հուզվել են: Վերջերս Շուշան Պետրոսյանին տեսա, նույնիսկ նա հայտնեց իր գովասանքն իմ կատարման մասին, ինչի համար շատ ուրախ եմ, քանի որ նա և Հայկոն են եղել այդ երգի առաջին կատարողները:

- Յուրաքանչյուր մարդու այցելում է աստղային հիվանդություն ասվածը, հատկապես, երբմիանգամից է մեծ ճանաչում ունենում: Նման զեղումներ ունեցե՞լ ես: Ակնկալում եմ անկեղծպատասխան :):

- Կարծում եմ՝ կարիերան ավարտվում է այն պահին, երբ աստղային հիվանդությունը թակում է դուռը: Եթե դու տառապում ես դրանով ու քեզ ավելի բարձր ես դասում, շատ վատ է: Ճանաչվածությամբ պետք է ուրախանալ, բայց չտարվել: Ես իմ ժողովրդից մեկն եմ ու չեմ առանձնանում նրանից: Անկեղծ ասած, ուրախ եմ, որ այս մտածելակերպն ունեմ ու հուսով եմ՝ չեմ փոխվի: Փառքը ժամանակավոր է. այսօր ճանաչված եմ, բայց հնարավոր է՝ մեկ տարուց ինձ չհիշեն: Պետք է փորձել աշխատել սիրով, որ գործը մնայուն լինի, ինչպես, օրինակ, Առնո Բաբաջանյանի դեպքում:

- Ի՞նչ ես պատրաստվում անել, որ հայկական շոու բիզնեսում քո գործը մնայուն լինի:

- Հրաշալի հարց, որի պատասխանը դեռևս չունեմ: Ժամանակի ընթացքում կհասկանանք՝ դա կստացվի՞, թե' ոչ:

- Այսօր շատ լավ երգեր կան, որոնք հիմանականում մեծ պահանջարկ չունեն: Որքանո՞վ եսկարևորում երգացանկն ընտրելիս պահանջարկը հաշվի առնելը:

- Պահանջարկը ստեղծում է հենց երգիչը: Չեմ կարծում, որ մեր ազգն իրոք սիրում է ռաբիս, չեմ հավատում: Դա մատուցողից է: Օրինակ՝ «Քո սիրո համար» երգը ռաբիս ոճում է, բայց իմ կատարման մեջ ռաբիս ոչինչ չկար: Մենք շատ հարուստ մշակույթ ունենք, ուղղակի խնդիրն այն է, որ շատերը չեն լսել, ծանոթ չեն Սայաթ-Նովային, Կոմիտասին: Կարծում եմ՝ երգիչները պետք է այլընտրանք ստեղծեն:

- Ունես հայտնիության որոշակի մակարդակ, ինչը կարևոր խաղաթուղթ է: Սակայն հաճախնախագծերում փայլած երգիչները դաշտից կորչում են: Դրա պատճառը նաև հնարավորությունների բացակայությունն է: Առաջիկայում՝ գոնե որոշակի շրջան, դիրքերդ ամրապնդելու հնարավորություն ունե՞ս:

- Գոնե որոշակի շրջան գոյատևելու համար հնարավորություն ունեմ, քանի որ ոչինչ չեմ խնայում լավ երաժշտություն մատուցելու համար:

Ըստ իս՝ մարդը պետք է նպատակ ունենա, որի հեռավորությունն իրենից կարևոր չէ: Պետք է ամեն ինչ անել դրան հասնելու համար: Կորչելու հիմնական խնդիրն այն է, որ նպատակը սպառվում է: Իմ նպատակն ավելի բարձր է: Կարծում եմ՝ կարիերաս այսքանով չի ավարտվի, քանի որ ձգտում եմ հանդիսատեսիս մատուցել իմ խոսքն ու երաժշտությունը: Այնպես որ, դեռևս մտադիր եմ շատ-շատ լավ երգեր երգել հանդիսատեսի համար:

- Ի՞նչ անելիքներ ունես:

- Շատ լավ մտքեր կան, բայց ես չեմ սիրում ասել մի բան, որում համոզված չեմ: Շուտով կնկարահանեմ իմ երկրորդ տեսահոլովակը: Երգը կոչվում է «Երազանքի գրկում», որի երաժշտության հեղինակը ես և Դեր Հովան ենք, տեքստը Գրիգոր Կյոկչյանն է գրել: Շատ գեղեցիկ է, կարծում եմ՝ կսիրվի: Այլ անակնկալներ էլ են սպասվում, որոնց մասին չեմ ցանկանում բարձրաձայնել: Հնարավոր է՝ Սոֆիի հետ էլ համագործակցություն լինի: Ես և Սոֆին հրաշալի ենք աշխատում իրար հետ: Ճիշտ է, կան մտքեր, որոնք բախվում են, սակայն դա նորմալ է, ինքն իր մտածելակերպն ունի, ես՝ իմ: Կարևորը՝ գտնում ենք ոսկե միջինն ու ամենաճիշտը: Մեր հաջոողությունը թիմային աշխատանքի շնորհիվ էր, դրա համար ես Սոֆիի հետ աշխատելու մեծ ցանկություն ունեմ: Հուսամ՝ ինքն էլ: