«Մենք ենք, մեր հայեր»-ի հաղորդավարուհի Հերմինե Ստեփանյան. «Աշխատանքից դուրս այդ աստիճան անտանելի չեմ» (լուսանկարներ, տեսանյութ)

«Դար 21» հեռուստաընկերության եթերից արդեն երեք տարի է՝ մեր ուշադրությանն է արժանանում «Մենք ենք, մեր հայերը» նախագիծը՝ հաղորդավարուհի Հերմինե Ստեփանյանի գլխավորությամբ: Այդ ուշադրությունը վերջերս կրկնապատկվել է, քանի որ Հերմինեն այլևս մենակ չի վարում հաղորդումը: Նրան օգնում է իր ապագա բալիկը, ով, կարելի է ասել, վերջին ժամանակներում ավելի շատ է ուշադրության և քննարկման արժանանում, քան իր մայրիկը:

Այս հաղորդման շրջանակներում արծարծվում են երիտասարդությանն ու բոլորիս հետաքրքրող թեմաներ: Առաջադրված անվանակարգերում իրենց ակտիվ «մրցակցությունն» են վարում հայ առաջադեմ աստղերը: Հաղորդաշարը «Դար 21»-ի եթերում է 2006 թվականից: ArmStar.am-ը այս անգամ էլ իր ուշադրությունը սևեռեց «Մենք ենք, մեր հայեր»-ի և հաղորդավարուհի Հերմինե Ստեփանյանի վրա: «Առաջին մի քանի հաղորդումը եթեր էր հեռարձակվում այլ հաճախականությամբ: Ամանորի նախաշեմին ներկայացնում էինք տարվա ցանկալի հարսնացուներին ու փեսացուներին»,-ասաց Հերմինե Ստեփանյանը, ում արդեն 3 տարուց ավելի վստահված է հաղորդաշարերի պատրաստման գործընթացը:

Այս երեք տարիների ընթացքում չի եղել դեպք, որ եթեր չգնա նոր թեմայով նոր հաղորդում: «Յուրաքանչյուր ամիս չորս շաբաթ (երբեմն հինգ) եթեր է հեռարձակվում «Մենք ենք, մեր հայերը» հաղորդաշարի նոր հաղորդում: Միայն հին ու բարի ավանդույթի համաձայն տարեվերջին պարտադիր երկու թեմա կրկնվել է' «ցանկալի հարսնացուներ» և «ցանկալի փեսացուներ»»,-ավելացրեց Հերմինեն: Ինչ վերաբերում է անվանակարգերին և ընդգրկված արտիստներին, ապա Հերմինեն հստակ բոլորը մտաբերել չկարողացավ, փոխարենը հիշեց հետևյալը. «Հիմնականում շատ են ընդգրկվել այն արտիստները, ովքեր մշտապես աշխատանքի մեջ են եղել, ովքեր ակտիվ են եղել իրենց կենսակերպով ու աշխատասիրությամբ: Հիշում եմ, որ 2012 թվականը ամփոփելիս մի թեմա պատրաստեցինք այն աստղերի մասին, ովքեր մեկ տարվա ընթացքում ամենաշատն են հայտնվել մեր հիթ շքերթում: Առաջին հորիզոնականում Լիլիթ Հովհաննիսյանն էր»,-մտաբերեց Հերմինեն:

Արդեն ավանդույթ է դարձել հաղորդման բացումը. «Եթե նկատել եք, հաղորդման ամենասկզբում ես միշտ նշում եմ «Հայկական հեռուստաեթերի ամենապրոֆեսիոնալ հիթ-շքերթը», դա պատահական չէ: Յուրաքանչյուր շաբաթ, մինչ եթերում հայտնվելը, հաղորդաշարը բավական երկար ճանապարհ է անցնում: Ժամանակի ընթացքում մտածում ենք թեմաներ, որոնք ժողովների ժամանակ հաղորդման ստեղծագործական խումբը քննարկում է, ինչի արդյունքում որոշ թեմաներ փոփոխվում, են, որոշները դուրս են գալիս, մի քանիսը ժամանակավրեպ են լինում, այնուամենայնիվ, վերջին մեկ ամսվա համար չորս թեման պահպանվում ու մշակվում են»,-ներկայացրեց հաղորդավարուհին:

Հերմինեն ArmStar.am-ի հետ զրույցում ներկայացրեց նաև իր կարծիքը այդ ժողովների մասին. «Այդ ժողովները ամենաանտանելին են, սակայն առանց դրանց չի կարող պատրաստվել ոչ մի թեմա»,-կատակեց հաղորդավարուհին: Ինչ վերաբերում է մտահղացումներին, ապա ArmStar.am-ին հաղորդավարուհին պատմեց, որ թեմայի միտքը կարող է ծնվել տարբեր բաներից և իրավիճակներից: «Օրինակ, երբ տեսա Արմոյի և Գևորգ Մարտիրոսյանի «Շնորհավոր» երգի տեսահոլովակը Սոնայի մասնակցությամբ, ծնվեց «Աստղերը Աստղերի տեսահոլովակներում» թեման: Ստեղծագործական աշխատանքը հետաքրքիր է հենց նրանով, որ միտքդ չի հանգստանում անգամ քնած ժամանակ»,-ավելացրեց հաղորդավարուհին:

Ի դեպ Հերմինե Ստեփանյանը ArmStar.am-ին պատմեց նաև, որ նկարահանումներն ու աշխատանքը բավական հետաքրքիր են անցնում. «Երբ մի քանի ստեղծագործ մարդ հավաքվում են նույն տարածության մեջ, ապա զավեշտալի դեպքերն անսահման են: Ինքներդ պատկերացրեք՝ օպերատորներ, ռեժիսոր, հաղորդավար... ամենակարևորն այն է, որ յուրաքանչյուր անդամ կարողանում է ծիծաղել ինքն իր վրա: Ի դեպ «Դար 21»-ի «Եթեր OFF» հաղորդաշարից դուք արդեն հասկացել եք, թե ինչ մթնոլորտում են անցնում մեր նկարահանումները (ծիծաղում է): Վերջին շրջանում իհարկե իմանալով, որ տեսախցիկները միացված են՝ կատակով անդադար խոսում եմ նրա մասին, որ օպերատորները հեռախոսներով խաղ են խաղում նկարահանման ընթացքում (ծիծաղում է)»: Հեմինեն մտաբերեց նաև զավեշտալի մի դեպք. «Զավեշտալի մի դեպք եղավ վերջերս, իհարկե այդ պահին լաց էինք լինում: Պետք է նկարահանում անեինք ռեստորաններից մեկում, որի հետ ադմինիստրատորը նախապես պայմանավորվել էր: Ողջ տեխնիկայով և խմբով գնացինք, պարզվեց այնտեղ դեռ հյուրեր կան, որորնք միտք էլ չունեն հեռանալու (ժպտում է): Եվ մենք մեքենայի մեջ նստած փորձում ենք հասկանալ, թե ինչ կարող ենք անել: Բոլոր սրճարաններն ու ռեստորանները, որոնք մեզ հետ սիրով աշխատել էին մինչ այդ, կամ փակ էին կամ մարդաշատ: Արդեն երեկոյան ութն էր: Նկարահանումը չկորցնելու համար զանգահարեցի ընկերուհուս և ասացի. «Չգիտեմ հիմա ինչ ես անում, որտեղ ես, հարմար է, թե' ոչ, բայց մենք գալիս ենք ձեր տուն նկարահանում անենք»: Հիշում եմ, ինչ համեղ տաք խաչապուրիներ հյուրասիրեց, օպերատորները ամեն շաբաթ ասում են' եկեք այնտեղ անենք նկարահանումները»,-ծիծաղելով պատմեց Հերմինեն:

ArmStar.am-ի այն հարցին, թե ինպիսին է Հերմինե Ստեփանյանը աշխատանքից դուրս, հաղորդավարուհին պատասխանեց. «Հերմինե Ստեփանյանն աշխատանքից դուրս այդ աստիճան անտանելի չէ (ծիծաղում է): Ես գիտեմ, որ աշխատանքում սարսափելի ծանր եմ, պահանջկոտ: Ինքս լինելով պարտաճանաչ՝ չեմ կարողանում տանել որևէ մեկի անպատասխանատվությունը, սարսափելի բծախնդիր եմ, դա կհաստատեն իմ դիմահարդարը, վարսահարդարը, ոճաբանը: Ինքս երբեք իմ քիթը չեմ խոթում մյուսի գործերի մեջ, գուցե սա գալիս է նրանից, որ ես վստահում եմ ինձ հետ աշխատող մարդկանց. ունեմ պրոֆեսիոնալ խմբագիր, պրոդյուսեր, ծրագրերի տնօրեն, որոնցից յուրաքանչյուրը իր գործը լավ գիտի: Իրական կյանում սարսափելի թեթև եմ, ոչ պրոբլեմատիկ, մարդկային հարաբերությունների մեջ թեթև և երբևէ չեմ սիրում մեղադրել կամ քննադատել: Մի բան հստակ է, բոլորս էլ սխալվելու իրավունք ունենք և յուրաքանչուր ոք ազատ է, ապրում է այնպես, ինչպես ինքն է ուզում»,-ավելացրեց հաղորդավարուհի Հերմինե Ստեփանյանը:

Զրուցեց Աշխեն Մնացականյանը/ArmStar.am/

Լուսանկարները՝ Հերմինե Ստեփանյանի ֆեյսբուքյան էջից