Հայ-ֆրանսիական ուսումնավարժություն` Երևանում

Այսօր ՀՀ ԱԻ նախարարությունը` Հայաստանում Ֆրանսիայի դեսպանատան հետ համատեղ կազմակերպել էր «Ուժեղ երկրաշարժի դեպքում ֆրանսահպատակ քաղաքացիների ազդարարում, հավաք և տարհանման կազմակերպում» թեմայով ուսումնավարժություն։

Նպատակներն են`

• կատարելագործել ՀՀ-ում ֆրանսիական դեսպանատան պատասխանատուների գործնական հմտությունները ազդարարման և հավաքի գործընթացը կազմակերպելու ուղղությամբ.

• ներդաշնակեցնել փոխգործակցությունը` ՀՀ ԱԻՆ և Ֆրանսիայի դեպանատան միջև:

Ուսումնավարժությանը մասնակցեցին ՀՀ ԱԻՆ ճգնաժամային կառավարման կենտրոնը, ԱԻ արձագանքման խումբը, 2 մեկական մարտական հաշվարկ, 1 ավտոսանդուղք, հատուկ նշանակության փրկարարական աշխատանքների իրականացման կենտրոնից մեկ հաշվարկ, ՀՀ-ում ֆրանսիական դեսպանատան աշխատակիցներ, ֆրանսահպատակ քաղաքացիներ, ՀՀ ճանապարհային ոստիկանության 3 հաշվարկ, Երևանի քաղաքապետարանի «Շտապբուժօգնություն» ՓԲԸ-ից 3 բրիգադ:

Ըստ մտահղացման` Կոտայքի մարզի Գառնի գյուղից 12 կմ հյուսիս-արևմուտք տեղի է ունեցել 7.1 մագնիտուտով ուժեղ երկրաշարժ, որի ուժգնությունը էպիկենտրոնային գոտում կազմել է 10 բալ, հիպոկենտրոնը գտնվում է 15 կմ խորության վրա: Երկրաշարժի հետևանքով առավել մեծ «ավերածություններ» են գրանցվել ՀՀ Կոտայքի, Արարատի մարզերում և Երևանում: Մայրաքաղաքում ամբողջությամբ փլուզվել է մոտ 15 հազար շենք-շինություն, բռնկվել է 28 խոշոր հրդեհ, կոմունալ-էներգետիկ ցանցում առկա են բազմաթիվ խոշոր վթարներ, փլվածքների հետևանքով փակվել են փողոցներ և ճանապարհներ: Մասնավորապես՝ Երևանում շենք-շինությունների փլուզման հետևանքով ամբողջությամբ փակ են Սեբաստիա և Կիևյան փողոցները, Բաղրամյան ու Արշակունյաց պողոտաները, Կիևյան կամուրջը վնասվել է և վտանգ է ներկայացնում տրանսպորտային միջոցներով երթևեկության համար:

Երկրաշարժի հետևանքով հրդեհ էր բռնկվել նաև Երևանի Նար-Դոսի 2 հասցեում գտնվող տարրական դպրոցում, որտեղ ուսանում են ֆրանսահպատակ քաղաքացիների երեխաները։ Կան պայմանական տուժածներ։

Ներսում գտնվող մանկավարժներն ու դպրոցի աշակերտներն արագ կարգով տարհանվեցին, ինչից հետո դպրոցի տնօրենի ահազանգով դեպքի վայր ժամանած հրշեջ-փրկարարական մարտական հաշվարկներն իրականացրեցին հետախոզություն և սկսեցին հրդեհաշիջման աշխատանքները։ Հրշեջ-փրկարարներն «այրվող» շենքի երկրորդ հարկի պատուհանից պայմանական տուժածներից երկուսին դուրս բերեցին ավտոսանդուղքի, իսկ չորսին' պարանների միջոցով։ «Տուժածներին» առաջին բուժօգնություն ցուցաբերելուց հետո վերջիններս շտապօգնութան մեքենաներով տեղափոխվեցին համապատասխան բուժհիմնարկներ:

Հրդեհաշիջման աշխատանքների ավարտից հետո դպրոցի տնօրեն Մարտին Բեքերն իր կարծիքը հայտնեց միջոցառման վերաբերյալ.

- Նման ուսումնավարժությունները շատ կարևոր են մեզ համար, քանի որ Հայաստանում հաճախ են երկրաշարժեր տեղի ունենում: Այս մեկը հերթական անգամ ապացուցեց, որ հայ հրշեջ-փրկարարները հիանալի են կատարում իրենց աշխատանքը:

Այդ ընթացքում դեսպանատան ներկայացուցիչը գալիս է ՀՀ ԱԻՆ ՃԿԿ, արբանյակային կապ հաստատում դեսպանատան հետ և, տեղում ծանոթանալով ստեղծված իրավիճակին, պարբերաբար տեղեկություններ հաղորդում դեսպանին։

Սցենարի համաձայն` ՀՀ ԱԻՆ ճգնաժամային կառավարման կենտրոնի ազդարարումից հետո Հայաստանում Ֆրանսիայի դեսպանը որոշում է օդային ճանապարհով տարհանել ֆրանսահպատակ քաղաքացիներին։ Վերջիններս հավաքվում են նախապես որոշված վայրերում («Թումո» կենտրոնի, Մերգելյան ինստիտուտի և Նար-Դոսի 2 հասցեում գտնվող տարրական դպրոցի մոտ), որտեղից էլ սահմանված երթուղով տեղափոխվում «Էրեբունի» օդանավակայան։

Ուսումնավարժության բոլոր մասնակիցների` 94 հոգի, որոնցից 22-ը երեխա, պայմանական տարհանման վայր հասնելուց հետո ՀՀ ԱԻՆ ՓԾ տնօրենի տեղակալ, գեներալ-մայոր Վ. Գաբրիելյանը ՀՀ ԱԻ նախարար Ա. Երիցյանին զեկուցեց միջոցառման ավարտի և ուսումնավարժության բարեհաջող ընթացքի մասին:

Անդրադառնալով միջոցառմանը` Հայսատանում Ֆրանսիայի դեսպան Անրի Ռենոն մասնավորապես ասաց.

- Սա շատ կարևոր օր է մեզ համար, քանի որ մենք ստուգեցինք մեր աշխատակիցների պատրաստականության մակարդակը: Ուսումնավարժության բոլոր գործողությունները վերահսկվել են ԱԻ նախարարության կողմից և ես, օգտվելով առիթից, ուզում եմ իմ հարգանքն ու երախտիքը հայտնել ԱԻ նախրար Ա. Երիցյանին ու այս միջոցառումը կազմակերպած բոլոր անձանց: Սա հաջողված ուսումնավարժություն էր, ինչից մենք օգտակար դասեր քաղեցինք: Մեզ համար գերագույն հաճույք է համագործակցել ՀՀ ԱԻ նախարարության հետ:

Ամփոփելով ուսումնավարժության արդյունքները` ՀՀ ԱԻ նախարար Ա. Երիցյանն ասաց.

- Նման ուսումնավարժություններ պետք է էլ ավելի հաճախ կազմակերպվեն: Այս տիպի միջոցառումներ մենք կանցկացնենք նաև այլ դեսպանատների հետ համատեղ: Պետք է բոլորը պատրաստված լինեն, քանի որ մենք ապրում ենք սեյսմոակտիվ գոտում:

Ուսումնավարժությանը ներկա էր նաև Երևանում Եվրամիության ներկայացուցիչ Տրայան Հրիստեան, ով միջոցառման ավարտին Ա. Երիցյանին իր շնորհակալությունը հայտնեց բարձր մակարդակով կազմակերպված ուսումնավարժության համար' ընդգծելով նմանօրինակ միջոռաումների կարևորությունը: