Նաիրիտի հարցը ԱԺ-ո՞ւմ

Դաշնակցական պատգամավոր Արծվիկ Մինասյանն առաջարկում է ստեղծել ժամանակավոր հանձնաժողով: Այս մասին ԳԱԼԱ-ի լրագրողի հետ զրույցում ասել է ՀՅԴ անդամը և ներկայացրել այն խնդիրները, որոնք իր առջև դնելու է ժամանակավոր հանձնաժողովը:

«Գաղտնիք չէ, որ Նաիրիտը Հայաստանի տնտեսական համակարգում որպես ձեռնարկություն, ըստ էության, արդյունաբերության հիմնական քիմիական ճյուղի հիմքն է, և Նաիրիտի՝ որպես համակարգաստեղծ ձեռնարկության դերը մեր տնտեսության մեջ, եթե թվային տվյալներով ասենք, ապա դա աշխատատեղերի շուրջ 10-15 տոկոսն է կազմում, մյուս կողմից ՀՆԱ-ի հսկայական պաշար է ապահովում, և երրորդ՝ Հայաստանը արդյունաբերական երկիր վերածելու իրական քայլ է: Խնդիրն այն չէ, թե այս պահի դրությամբ, այսպես ասեմ, Նաիրիտը կա, ինչու չի աշխատում, խնդիրն այն է, թե ինչու է անտեր, որովհետև անտերության արդյունք է, որ առանձին պաշտոնատար անձանց, ովքեր որ Նաիրիտը օգտագործելով հարստացել են, պետության ռեսուրսը օգտագործելով անձնական միջոցներ են հավաքել»:

Հարցին, թե ում նկատի ունի, Արծվիկ Մինասյանն ասել է. «Ես նկատի ունեմ բոլոր այն հրապարակումներում նշված անձանց, որոնց ուղղակիորեն մեղադրանք է ներկայացված: Բայց այս պահին ես չեմ կարող ասել, թե այդ մեղադրանքները որքանով են արդարացի, դրա համար առաջարկում եմ, որպեսզի ստեղծվի ժամանակավոր հանձնաժողով»:

Ըստ ՀՅԴ պատգամավորի՝ այդ հանձնաժողովը նախ ուսումնասիրելու է Նաիրիտի անհրաժեշտությունը երկրի տնտեսության մեջ, այսինքն՝ այս, թե այլ վիճակում պետք է Նաիրիտը գործունեություն ծավալի:

«Այս խնդիրը առկա է արդեն երեք տարի, որից օգտվում են առանձին մարդիկ,- ասել է Արծվիկ Մինասյանը՝ հավելելով,- ովքեր փորձում են Նաիրիտից ինչ-որ բաժիններ պոկել և տանել: Պետք է անտերությանը վերջ տալ, պետք է լինի մի մարմին, որը ասելու է, որ Նաիրիտի հարցը գտնվում է պետության ուշադրության տակ, և երկրորդը՝ քննարկվի Նաիրիտի հետագա հարցը, և երրորդը՝ նշի, թե ովքեր են եղել այն մարդիկ, ովքեր անարդյունավետ են աշխատել և պետք է պատասխանատվություն կրեն»:

Նաիրիտի հարցը, ըստ պատգամավորի, հասարակական հնչեղության հարց է, և Ազգային Ժողովը չպետք է անտարբերություն ցուցաբերի:

Փայլակ Ֆահրադյան