Մեկ օր՝ զինվորի կյանքով (լուսանկարներ, տեսանյութեր)

ՀՀ պաշտպանության նախարարությունը հունիսի 7-8-ին կազմակերպել էր լրատվամիջոցների ներկայացուցիչների այցելություն ՀՀ Տավուշի մարզ՝ Նոյեմբերյանում տեղակայված զորամաս: Զորամաս և առաջնագիծ այցելությանը նախորդեց սեմինար-քննարկում՝ բանակային թեմաների լուսաբանման վերաբերյալ։

Զորամասի ընտրությունը պատահական չէր. լրագրողներն այցելել էին այն զորամաս, որտեղ մայիսի 15-ին մահացել էր ժամկետային զինծառայող Լյուքս Ստեփանյանը։ Զորամասի ընտրությունն ինքնանպատակ չէր. լրագրողներն անձամբ ծանոթացան զորամասին, հրամանատարական կազմին և զինվորների կենսապայմաններին։

Հնարավորություն տրվեց լինել այն տեղում, որտեղ եղել էր միջադեպը զինծառայողների միջև։ Զորամասի հրամանատար Վահագն Ասատրյանը ներկայացրեց դեպքից որոշ մանրամասներ:

Ժամկետային զինծառայողները, նախապես իմանալով, որ զորամաս են այցելելու նաև իգական սեռի ներկայացուցիչ լրագրողներ, վերջիններիս համար պատրաստել էին անակնկալ։ Զինծառայողները վարդեր նվիրեցին լրագրողներին։

Լրագրողները ականատես եղան ուսումնական վարժանքների, ինչպես նաև շրջայց կատարեցին զորամասում և ծանոթացան զինծառայողի առօրյային։

Լրագրողները եղան նաև առաջնագծում, որտեղ էր նաև Պաշտպանության նախարար Սեյրան Օհանյանը։ Այցին հաջորդեց Սեյրան Օհանյանի մամլո ասուլիսը։ Հունիսի 8-ին լրանում էր Սեյրան Օհանյանի վերանշանակման 50-րդ օրը:

«Երկրորդ անգամ նշանակումը պարտավորեցնող է Պաշտպանության նախարարության ողջ անձնակազմի և անձամբ իմ համար, որպեսզի կրկնակի ջանքերով, կրկնակի եռանդով ես իմ աշխատանքը շարունակեմ»,-ասաց Սեյրան Օհանյանը։

Ազատուհի Արասխանյան

{gallery}zoramas{/gallery}