Գ. Ծառուկյանը Ն. Զոհրաբյանին չի արգելել շփվել լրագրողների հետ

ԲՀԿ առաջնորդ Գագիկ Ծառուկյանը ԲՀԿ խմբակցությունում ավանդական նիստ գումարելուց հետո պատասխանեց լրագրողների հարցերին, որոնք գրոհել էին խմբակցության մուտքը: Մասնավորապես հետաքրքրում էր այն հաարցը, թե որքանով են հավաստի շրջանառվող լուրերը, որ ինքը՝ Գ.Ծառուկյանը, արգելել է կուսակցականներին ու մասնավորապես Նաիրա Զոհրաբյանին շփվել լրագրողների հետ.

«Նիստում էլ ինձ ասացին, որ այդ թեմայով լուրեր կան... առաջինը ոչ մի ղեկավար իրավունք չունի իր թիմակիցներին արգելելու, հակառակը` նա պետք է հարգի իր թիմակիցներին, նրանց լսի, որ ճիշտ որոշումներ կայացնի»,- լրագրողներին ասաց Գագիկ Ծառուկյանը:

Ինչ վերաբերում է Ն. Զոհրաբյանի անվան շուրջ շրջանառվող լուրերին, ԲՀԿ առաջնորդը նշեց, որ պատգամավորը Հայաստանին իր նվիրվածությամբ մեծ աշխատանք է կատարում եվրախորհրդարանում և հույս հայտնեց, որ Ն.Զոհրաբյանի պես պատգամավորներ շատ լինեն, որոնք մտածում ու պայքարում են իրենց երկրի հեղինակության համար:

Աղբյուր՝ Panorama.am