Այսօր ասմունքող Սիլվա Յուզբաշյանի ծննդյան օրն է (լուսանկարներ, տեսանյութ)

Սիլվա Յուզբաշյանը ծնվել է 1954թ. հունիսի 10-ին, Գյումրիում:

1975թ. ավարտել է Երևանի գեղարվեստա-թատերական ինստիտուտի դերասանական բաժինը: 1976-80թթ աշխատել է Երևանի Սունդուկյանի անվան ազգային ակադեմիական թատրոնում` որպես դերասանուհի:

1980-ից Հայաստանի պետական ֆիլհարմոնիայի մենակատար-ասմունքող է:

1984-2005թթ. զուգահեռ աշխատել է Հայաստանի Հանրային ռադիոյի գրական խմբագրությունում` որպես հնչյունային ռեժիսոր-ասմունքող: 1986թ. արժանացել է ՀԼԿԵՄ պետական մրցանակի դափնեկրի կոչմանը:

1991թ. և 1999թ. արժանացել է Հարավային Քալիֆորնիայի «Motion Picture» և «Golden Holo Award» մրցանակներին: Մենահամերգներով բազմիցս հանդես է եկել հայրենիքում և արտերկրում (Կանադա, ԱՄՆ, Արգենտինա, Բրազիլիա, Բեյրութ, Իրան, Սիրիա, Քուվեյթ, ԱՄԷ և այլն): 2004թ. Լոս Անջելեսի «Ալեքս» թատրոնում կայացած մենահամերգից հետո, պարգևատրվել է Գլենդելի քաղաքապետի հատուկ մրցանակով: 2006թ. արժանացել է ՀՀ վարչապետի մրցանակին, 2007թ.` ՀՀ մշակույթի նախարարության ոսկե մեդալի, 2008թ.՝ ՀՀ վաստակավոր արտիստի կոչմանը:

2011թ. պարգևատրվել է ՀՀ սփյուռքի նախարարության «Վիլյամ Սարոյան» մեդալով:

Լուսանկարները` Սիլվա Յուզբաշյանի ֆեսբուքյան էջից