Լիսկային մանդատ տվող չկա

Այսօր Ազգային ժողովում լրագրողներից շատերը փորձում էին առանձին պատգամավորներից Սյունիքի մարզպետ Սուրիկ Խաչատրյանի վերաբերյալ մեկնաբանություններ ստանալ: Ինչպես և կարելի էր սպասել, այդպես էլ չգտնվեց որևէ մեկը (խոսքը ընդդիմադիրներին չի վերաբերում), որ Խաչատրյանի հասցեին ինչ-որ բան ասեր: Սյունիքի մարզպետի մասին դրական գնահատական հնչեցրած պատգամավորներից մեկը մասնավոր խոսակցության ժամանակ, արդարանալով «գովեստի» հաշվով, հայտնեց, թե՝ «պատգամավոր էղած վախտը հրավիրել ա Գորիս, կերցրել-խմցրել, հո չէ՞ի դնի վատ բան ասի»:

Դեռ մինչև վերջին իրադարձությունները խոսակցություն կար արդեն, որ Սյունիքի մարզպետը պաշտոնանկ է լինելու և որ նա, իմանալով գլխի գալիքը, արդեն իսկ նախապատրաստական աշխատանքներ է տանում: Մասնավորապես, պլանը հետևյալն էր՝ Խաչատրյանի կողմից ԱԺ ուղարկված պատգամավոր Հայկ Գրիգորյանը մանդատը վայր էր դնելու, կազմակերպվելու էին նոր ընտրություններ, որոնցում, բնականաբար, հաղթելու էր Սուրիկ Խաչատրյանը, և հենց այդ ճանապարհով էլ լուծվելու էր վերջինիս՝ օրենսդիր մարմին գործուղվելու և անձեռնմխելիություն ստանալու հարցը:

Երբ այս մասին հայտնեցինք պատգամավոր Հայկ Գրիգորյանին, վերջինս բավական զարմացավ և հայտնեց, որ մտադիր չէ մանդատը վայր դնել:

- Դուք՝ լրագրողներդ, պետք է լավ իմանաք՝ ով է ԱԺ մեծամասնական թեկնածուին, նաև համամասնական թեկնածուին լիազորում մանդատով: Հիմա ես Ձեզ պատասխան հարց եմ տալիս՝ ինձ ո՞վ է լիազորել Ազգային ժողով:

- Դե՛, լիազորելը՝ հայտնի է ով է լիազորել... այսինչ ընտրատարածքում ընտրվել եք և ստացել Ձեր լիազորությունը:

- Ես էդ ի նկատի ունեի՝ բնակչությունը լիազորել է: Բնակիչը իրա նշումը իմ անվան դիմաց կատարելով՝ կարող ենք համարել, որ բնակիչը ինձ լիազորել է: Կարող ա՝ բառը ճիշտ չասացի՝ չակերտներով:

- Այո՛, միանշանակ, պաշտոնապես էդպես է:

- Եթե ինչ-որ մեկը ինձ լիազորել է Ազգային ժողով, հիմա ես Ձեզ հարց եմ տալիս՝ ո՞ր դեպքում ես կարող եմ իմ մանդատը վայր դնել:

- Այս դեպքում ես Ձեզ օրինակ բերեմ: Երբ խնդիր դրվեց Հովիկ Աբրահամյանին դարձնել Ազգային ժողովի նախագահ, նրա եղբայր Ջոնիկ Աբրահամյանը վայր դրեց ժողովրդի կողմից իրեն տրված մանդատը, իրեն ընձեռնված լիազորությունները, որից հետո եղբայրը նույն ընտրատարածքից կազմակերպված ընտրություններում ընտրվեց պատգամավոր և Ձեր նշած այդ բոլոր խոսակցությունները իրականացան:

- Նախ սկսեմ նրանից, որ Ձեր նշած էդ ընտրակարգը ինձ հայտնի չէ: Ինձ նույնիսկ հայտնի չէ, որ Ջոնիկ Աբրահամյանը վայր է դրել մանդատը: Ինչ վերաբերում է իմ մասին, ես յուրաքանչյուր ամսվա մեջ երկու օր հանդիպում եմ ունենում բնակիչների հետ և վստահաբար կարող եմ ասել, նայել Ձեր աչքերի մեջ ու ասել՝ չկասկածեք իմ անկեղծության վրա, այն, որ եթե բնակիչը գա, ես զգամ իմ թուլությունը, իմ ոչ հզորությունը՝ բնակչի հարցը, բնակչի խնդիրները բարձրացնելու վերին ատյանի, գործադիր մարմնի առջև, ես առանց ինչ-որ մեկի պարտադրանքի, ես իմ մանդատը վայր կդնեմ, որովհետև ես միշտ սովոր եմ իմ աշխատանքը ճիգերի գերագույն լարումով լավ անել:

- Ես Ձեր աշխատանքը քննարկման չեմ ենթարկում, չեմ ասում՝ վատ եք աշխատել:

- Չէ՛, եթե ես զգամ, ես վատ եմ կատարում իմ աշխատանքը, ես չեմ սպասելու՝ ինձ որևէ մեկը պարտադրի կամ չպարտադրի: Եվ բացի դրանից, ինձ միայն իմ բնակիչը՝ 37 ընտրատարածքի իմ ընտրողը կարող է ինչ-որ բան պարտադրել:

- Սուրիկ Խաչատրյանը չի՞ կարող պարտադրել:

- Նորից եմ ասում՝ այն մարդը, մարդկանց այն խումբը՝ բնակիչները, ովքեր ինձ լիազորել են, միայն նրանք կարող են ինձ պարտադրել մանդատը վայր դնել:

- Իսկ մարդկանց այդ խումբը, կարծում եք, չի՞ «դավաճանի» Ձեզ և նախապատվությունը չի՞ տա՝ տվյալ դեպքում իրենց մարզպետին:

- Ես չեմ կարծում, որ սյունեցին ընդունակ ա դավաճանել: Նոնսենս ա:

- Դե՛, դավաճանությունն ուղիղ իմաստով մի ընկալեք, չակերտավոր ի նկատի ունեմ:

- Դավաճանություն հասկացություն չեմ հասկանում դավաճանությունը ինչ ա: Այլ հարց ա, որ կարող ա հանկարծ բնակիչները իմ առջև պարտադրանք, խնդրանք դնի, թե՝ գիտե՛ք, Դուք թերանում եք Ձեր գործում, խնդրում ենք Ձեր տեղը ազատեք, ես չգիտեմ էլ ում համար՝ ո՞վ իմ տեղը կզբաղեցնի: Իսկ Ձեր ասած խոսակցությունները ուղղակի խոսակցություններ են՝ կենցաղային բնույթի խոսակցություններ:

- Ուղղակի, գիտե՞ք, քաղաքական դաշտում շատ հաճախ այդ խոսակցություններն իրականանում են:

- Ես վերլուծություն եմ կատարում ու տեսել եմ, որ եթե ձեր ասածը իրականանում էլ ա, դա տևում ա մի քանի տարիներ, և դա ընդամենը 100-ից 10-ը դեպք ա, էն 90-ը չի իրականանում:

- Դե՛, ամեն դեպքում էնպես չի, թե ես հենց Սուրիկ Խաչատրյանին եմ ուզում տեսնել էստեղ:

- Գիտե՛ք, Ձեր ուզելը-չուզելը էստեղ ընդհանրապես նշանակություն չունի: Ստեղ գորիսեցու, սիսիանցու ուզելով ա:

- Այսինքն՝ Սիսիանում և Գորիսում ամեն ինչ հենց սիսիանցու ու գորիսցու ուզելո՞վ է լինում: Էն վախի մթնոլորտը...

- Էդ վախի մթնոլորտը, էդ ամեն ինչը Դուք ընդհանրապես, Երևանում Դուք շատ հեռու եք գտնվում մեր Սյունիքի մարզից: Միգուցե տարածությունից է, գալիս են Ձեզ ինչ-որ խոսակցություններ հասնում, Ձեզ խորհուրդ կտամ անձամբ այցելեք, մի քանի օր, մի 10 օր և Ձեր աչքով տեսնել:

Թե որքանով են պատգամավոր Հայկ Գրիգորյանի վերլուծություններն իրատեսական, որքանով է պատգամավորը ծանոթ հայաստանյան քաղաքական կյանքի ինտրիգներին և, ի վերջո, կկարողանա՞ երիտասարդը դիմադրել Սուրիկ Խաչատրյանի ցանկություններին, կերևա առաջիկայում: Ամեն դեպքում, մեր կանխատեսումների առաջին դրվագը՝ պաշտոնանկության պահով, արդեն իսկ իրականացել է:

Լուսինե Կեսոյան