Ես ինչքան կարողանում եմ, անում եմ. հեր կա, իրա էրեխու համար էտքան բան չի անում. Մանվել Գրիգորյան (տեսանյութ)

Այսօր Տարոն Մարգարյանի երդմնակալության արարողությանը ներկա էր նաև «Երկրապահ» կամավորական միության նախագահ, ԱԺ ՀՀԿ խմբակցության պատգամավոր, գեներալ Մանվել Գրիգորյանը:

Խոսելով Տարոն Մարգարյանի գործունեության մասին՝ գեներալն ասաց. «Ես նրա ծրագրերին լավ ծանոթ չեմ, բայց ամեն ինչ էլ անում է` դպրոցներում շինարարություններ է անում, տրանսպորտի խնդիր է լուծում»:

Դիտարկմանը, թե Երևանում այսօր կան խնդիրներ՝ կապված տրանսպորտի հետ, գեներալն ասաց. «Ալամ աշխարհում տրանսպորտի խնդիր կա: Աշխարհի շատ երկրներում 15 անգամ ավելի վատ է, քան Հայաստանում»:

Հետաքրքրվեցին նաև, թե ինչպես է իր առողջությունը, Մանվել Գրիգորյանը պատասխանեց, որ ինքը լավ է և առողջության հետ խնդիրներ չունի:

Նախընտրական շրջանում շատ էին խոսում Տարոն Մարգարյանի ունեցվածքի մասին։ Ըստ գեներալի՝ դա սխալ է, քանի որ Տարոնը, հնարավոր է, ժառանգություն է ստացել. «Իր հայրը, քանի տարի էր, քաղաքական գործիչ էր՝ ամեն բնագավառում աշխատած, կոմունիստների տարիներից սկսած, մինչև նոր ՀՀ, ժառանգություն կունենա էլի»:

Մանվել Գրիգորյանը զարմանում է՝ ինչու ավելի շատ միլիոներ ունեցողներինը տարօրինակ չի, Տարոնին տարօրինա՞կ է. «Ինչի՞, Տարոնը մի տարվա ընթացքում է կուտակել»:

Ինչ վերաբերում է Ազատության հրապարակում նստադուլ անող ազատամարտիկներին, նա ասաց, որ նախագիծ կա արդեն, այսօր միայն 35 հազար երկրապահ կա, որոնց խնդիրները լուծվում են. «Ես ինչքան կարողանում եմ, անում եմ, այնքան եմ անում, որ հեր կա, իրա էրեխու համար էտքան բան չի անում»,-ասաց գեներալը:

Ինչ վերաբերում է բանակում տեղի ունեցած սպանություններին, գեներալն ասաց. «Կլինի, չեպե էլ կլինի»:

Մանվել Գրիգորյանի հետ ճեպազրույցն առավել մանրամասն կարող եք դիտել Lurer.com-ի պատրաստած տեսանյութում.