Գորիսեցիները՝ Բուդաղյան եղբայրների եւ գորիսյան վերջին դեպքի մասին

Գորիսի բնակիչները մեծ հարգանքով են խոսում Բուդաղյան եղբայրների մասին եւ մեծ ափսոսանք ու ցավ հայտնում հունիսի 1-ի կատարվածի վերաբերյալ, նշելով, որ գորիսեցիների համար իսկապես մեծ կորուստ էր Ավետիք Բուդաղյանի մահը: «Ճանաչում եմ, որպես մարդ եղել ա լավ մարդ, լավ քաղաքացի, ափոս․․․ Շատ լավ տղա էր, ոչ թե ցավում ենք, այլ կսկծում ենք, նույնիսկ հեծկլտում․․․», – ասում են Գորիսի բնակիչները՝ գրում է «Առավոտ»–ը։

Գորիսեցիները դատապարտում են կատարվածը, ավելին քննադատում են Սուրեն Խաչատրյանի եւ նրա շրջապատի շնորհիվ Սյունիքում ստեղծված վախի մթնոլորտը, անպատվաբեր համարում Գորիսի ու Զանգեզուրի համար: Իսկ շատերը դեռեւս խուսափում են արտահայտվել, չեն հավատում արդարադատությանը, քանի որ մինչեւ օրս կատարված բազմաթիվ դեպքեր անպատիժ են մնացել, սանձարձակ արարքների հեղինակները օրենքի առաջ պատասխանատվություն չեն կրել եւ խիստ կասկածում են, որ վերջին դեպքից հետո էլ ինչ-որ պատժող քայլ կարվի այդ ուղղությամբ: Ասում են, որ կորցրել են վստահությունն ու հավատը արդարադատության հանդեպ, իսկ ներկայումս տիրող ոչ բարոյական մթնոլորտը, անպատվաբեր են համարում Գորիսի ու Զանգեզուրի համար:

«Գորիսի ժողովրդի մեջ արդեն ահ ու սարսափ ես տեսնում, դա Գորիսի, Զանգեզուրի պատիվն է, հաճելի չի․․․ Մեր խելքի պան չի, հինչ կարաս գիդաս, ամեն ձեւ հինչ օզում անում են, մենք հո՞ւվ ենք ստեղ, պատար որ խոսանք վատամարդ կտառնանք, տիր ա հետի ալ չենք խոսում», -նշում են գորիսեցիները: