Առաջարկ՝ բաղկացած երկու կետից

Ազգային ժողովն այսօր շարունակեց իր աշխատանքը։ Նիստին ներկա պատգամավորների թիվը 115 է։ Մինչ ընդհատված հարցի քննարկմանն անցնելը, քվեարկության դրվեց «Դիլիջանի միջազգային դպրոց» ծրագրի շրջանակներում հարկային և մաքսային արտոնություններ տրամադերլու մասին նախագիծն առաջին ընթերցմամբ ընդունելու հարցը։

Ելույթով հանդես եկավ ՀԱԿ խմբակցության ղեկավար Արամ Մանուկյանը, ասելով, որ այդ հարցն իրենք քննարկել են և ունեն առաջարկ։

«Առաջարկը կազմված է երկու կետից։ Լեզվի հետ կապված խնդրի լուծման վերաբերյալ առաջարկ ենք ներկայացնում, որը մեզ ներկայացրել են ՀԿ-ները։ Դիպլոմների հայերեն տեղայնացումը, որը շատ հետ գործ է, ամբողջովին լուծում է և՛ Սահմանդրության հարցը, և՛ մեր խնդիրը, այսինքն՝ տեղայնացումը։ Հայերենը միայն հայաստանցի հայ ուսանողների համար խնդիրն ամբողջությամբ լուծում է։ Այս և նաև մյուս տարբերակը, որը հնչել է երեկ դահլիճում, ծրագիրը կիսով չափ է ներկայացված, ամբողջականը ներկայացնում ենք և երկրորդ ընթերցման ժամանակ քվեարկում ենք կողմ»,-ասաց Արամ Մանուկյանը։

«Ժառանգություն» խմբակցության ղեկավար Ռուբեն Հակոբյանը նշեց, որ շատ շահեկան և նորմալ առաջարկություններ կան. «Կխնդրեինք, որ ուշադրությամբ ընթերցեիք, և կարծում եմ, որ սա բավականին կմեղմի բոլոր այն տրամադրությունները, որոնք դեմ են տրամադրված այս օրենքին», - ասաց Հակոբյանը։

«Բարգավաճ Հայաստան» խմբակցության քարտուղար Նաիրա Զոհրաբյանը նշեց, որ իրենց խմբակցության պատգամավորները երեկ երեկոյան հանդիպել են նույն նախաձեռնության ներկայացուցիչների հետ։

«Առաջարկն իրապես խիստ տրամաբանական է, և մենք ևս կարծում ենք, որ առաջինից երկրորդ ընթերցում այն անպայմանորեն պետք է ներառվի, այն բացառապես բխում է ՀՀ այն աշակերտների շահերից, որոնք սովորելու են այդ դպրոցներում»,-ասաց Զոհրաբյանը։

Արմեն Ռուստամյանն էլ իր հերթին նշեց, որ առաջին ընթերցման ժամանակ ՀՅԴ-ն ձեռնպահ կքվեարկի նախագծին։

Նախագիծը, դրվելով քվեարկության, ստացավ 87 կողմ, 20 ձեռնպահ և 5 դեմ ձայներ։