Կոմիտասի համար փող չկա (տեսանյութ)

2012 թվականի նոյեմբերին հայտնաբերված Կոմիտաս վարդապետի բացառիկ ձեռագրերը այդպես էլ Հայաստան չեն հասել: Պատճառը մեկն է՝ ֆինանսավորում չկա: Ռուսաստանի բնակիչները՝ ձեռագրերի անհայտ տերերը, դրանց համար 7000 դոլար են պահանջել:

Կոմիտասագետ Արթուր Շահնազարյանը հանձն է առել գործը, դիմել է քաղաքապետարան, մշակույթի նախարարություն, սակայն ապարդյուն. «Քաղաքապետարանը խոսք տվեց, որ կտրամադրի միջոցներ: Դեկտեմբերից մինչեւ մայիս այսօր-վաղը, այսօր-վաղը ասեցին ու չտվեցին: Ես աղաչեցի- պաղատեցի, նույնիսկ մի էջը տարա ցույց տվեցի, բայց ոչ մի բան»: Գրում է «Ա1+»-ը:

Վաճառվող նմուշները բնագիրը չեն, այլ արտագրված 30-ական թվականներին, սակայն Արթուր Շահնազարյանը վստահեցնում է, որ ձեռագրերն անգին են. «Այդ թղթում գրված է, թե Կոմիտասի մյուս ձեռագրերը, որտեղ են, դա բացառիկ հնարավորություն է գտնել Կոմիտասի ձեռագրերի բացառիկ նմուշները»:

Բացի պետական մարմիններից Արթուր Շահնազարյանը դիմել է նաեւ հայազգի մեծահարուստներին, սակայն կրկին մերժում ստացել։
Նա ամենից շատ ցավ է ապրում, որ այդ մարդիկ պատրաստ են 7000 դոլար վճարել մեկ ռաբիս երգչին, բայց Կոմիտասի ձեռագրի համար գումար չունեն. «Հարցն արդեն Կոմիտասի ձեռագրերը չեն, հարցը այն է, որ մարդիկ տգետ են, չեն հասկանում դրանց իրական արժեքը»:
36 էջից բաղկացած Կոմիտասի «Տետրակը», կոմիտասագետի տվյալներով, արդեն վաճառվել է: Գնորդը հայտնի չէ, սակայն Արթուր Շահնազարյանը մտադիր է նրանց էլ գտնել, ինչպես նաեւ հույսը չի կորցնում, որ ֆինանսներ կհայթայթի՝ Կոմիտասի բացառիկ ձեռագրերը Հայաստանի վերադարձնելու համար։