Թուրքիայում արդարացրել են 5 երեխաների մորը սպանած հանցագործին (տեսանյութ)

Թուրքիայում դաժանորեն սպանված ազգությամբ եզդի, ՀՀ քաղաքացի եւ Գյումրու բնակչուհի Մայայի քույրը դատապարտում է Թուրքիայում իր քրոջ դաժան սպանությունը եւ դիմում է միջազգային հանրությանը՝ ասելով, որ թուրքական արդարադատությունը մեկ ժամվա դատաքննություն է իրականացրել եւ որոշել, որ քրոջը սպանողը պետք է մնա ազատության մեջ: Գրում է Galatv.am-ը:

«Իմ քրոջը սպանել են, սպանելը քիչ է, գնդակահարել են, իսկ հանցագործը այս երեխաների հորեղբայրն է, նրա՝ ազգությամբ թուրք ամուսնու եղբայրը, ով ազատության մեջ է»:

Սպանված կնոջ կրտսեր քույրը պատմեց, որ ինքը ամուսնու եւ երեխաների հետ գնացել է Ստամբուլ՝ երեխաներին կնքելու մուսուլմանական օրենքներով, եւ նրան սպանել են Թուրքիայում:

«Հավաքեց իր երեխաներին, գնաց՝ ուրախ, զվարթ իր մարդու հետ, իրանց մեքենայով, որ ենտեղ երեխու սունատը պտի անեին, այսինքն՝ մուսուլմանական կնունքը՝ ամսի 7-ին: Բայց ամսի 12-ին ինձ զանգեց իրա մարդը ասաց՝ քուրդ շատ վատ ա, արի հասի, ես ասի՝ ուրեմն իրան սպանել եք, միանգամից իմացա, որ խփել են իրան: Չգիտեմ, հիմա ասում են, որ ծիտիկ են ուզեցել խփել»,-պատմեց սպանված կնոջ քույրը:

«Ինքը ամուսնու հետ շատ ջերմ էր, բայց իրան ընդեղ չէին ընդունում, չէին սիրում, որովհետեւ Մայան շատ սիրուն էր, սիրուն էլ հագնվում էր, սաղ նախանձում էին. իրանց կնիկները նման չէին Մայային:

Ես ասում էի՝ մի գնա, որովհետեւ քեզ չեն սիրում, իրանց կնիկները քո նման չեն, սիրուն ես, լավն ես, մի գնա, չէր հավատում: Իրա մարդու խաթրի համար էր անում, ինչ անում էր, մարդու խաթեր համար էր անում: Մարդու խաթեր իրանց կրոնը ընդունեց:

Դե ինքը որ ասում էր՝ ես գնում եմ ենտեղ, շատ են խոսում, ասում են՝ Էրլենիշլի սիրուն կնիկ ունես, սիրտս վախ ուներ, ինչից էր՝ չգիտեմ:

Ես որ թռա Ստամբուլ, ասացին, մարդը չի բողոքել ախպոր վրա, եւ դատն էլ չկա, արդեն փակվել ա, տվեցին ձեռքս, թե՝ տար: Եղավ պրծավ դատ ու դատաստանը մեկ օրվա՝ մեկ ժամվա մեջ, տարան ու հետ բերին, ժամանակ է պետք ինձ, ես տեսնեմ ինչ է լինելու:

Իրանք գիտեին, որ մենք եզդի ենք, ու կարծում էին՝ եզդին էլ նույն քուրդն է, եւ ասում էինք՝ մենք քուրդ չենք, մենք մուսուլման չենք դառնա, իրա մարդը մուսուլման դարձրեց եւ հավատքն էլ ընդունեց քույրս, ասեմ, որ զոռեցին, չէ, ինքն իրա ցանկությամբ ու ուզելով դարձավ ամուսնու նման»: