Երևանի ավագանու արտահերթ նիստը թեժ է. «Բարև Երևանը»` ընդդիմադիր, ԲՀԿ-ն` այլընտրանք

Այսօր Երևան քաղաքի ավագանու արտահերթ նիստ էր գումարվել, որը բավականին թեժ ընթացք ունեցավ: Նիստը սկսվեց առանց օրակարգի հաստատման, որը առաջացրեց «Բարև Երևան» դաշինքի ղեկավար Անահիտ Բախշյանի զայրույթը: Վերջինս արձանագրեց, որ առանց օրակարգի հաստատման՝ քննարկումը և ընդունումը օրենքի կոպիտ խախտում է, և փորձեց այն հիմնավորել, նույն կարծիքին էր նաև ավագանու անդամ Ստյոպա Սաֆարյանը: ԲՀԿ խմբակցության ղեկավար Թամարա Պողոսյանն էլ հանդես եկավ առաջարկությամբ` հետաձգել նիստը 20 օրով, որպեսզի քննարկում անցկացվի:

Անահիտ Բախշյանին և Ստյոպա Սաֆարյանին Տարոն Մարգարյանը խորհուրդ տվեց ավելի ուշադիր կարդալ կանոնադրությունը: Իհարկե, այստեղ Անահիտ Բախշյանի բարկությունը կրկնապատկվեց, և նա սկսեց կանոնադրությունը բարձրաձայն կարդալ` հիմնավորելով իր կողմից մատնանշած օրենքի խախտումը: Նշենք, որ արտահերթ նիստում հաստատման էր դրված Երևանի քաղաքապետարանի և Վարչական շրջանի ղեկավարի աշխատակազմերի կառուցվածքը, հաստիքացուցակը, Երևանի քաղաքապետի, նրա տեղակալների, խորհրդականների, օգնականների, մամուլի քարտուղարի և այլ աշխատատեղերի մեջ փոփոխություններ կատարելու մասին: Անահիտ Բախշյանն իր ելույթում հարց բարձրացրեց՝ արդյոք քաղաքապետի՝ 19 խորհրդատու ունենալը ուռճացված չէ, ինչքանով է այն արդյունավետ: Նույն հարցի շուրջ ելույթ ունեցան նաև նույն խմբակցության անդամներ Արմեն Մարտիրոսյանն ու Ստյոպա Սաֆարյանը:

«Ես միտում եմ տեսնում այս ուռճացված աշխատակազմը այսպես հրատապ հաստատման դնելու մեջ: Աշխատավարձերը ուռճացված են, հաստիքացուցակները վերանայման ենթակա են: Այս հաստիքացուցակը Երևանի բյուջեի հաշվին ինչ-որ ընտանիքներ պահելու ցուցակ է: Բայց դա չէ մեր հիմնական խնդիրը: Ես կարծում եմ՝ այս հաստիքացուցակը չպետք է հաստատվի. ես ինքս դեմ եմ քվեարկելու»,- իր ելույթում հայտարարեց ավագանու անդամ Ստյոպա Սաֆարյանը:

Ինչևէ, հարցը դրվեց քվեարկման. 42 կողմ` ՀՀԿ-ական, 6 դեմ` «Բարև Երևան», 16 ձեռնպահ՝ այլընտրանքային ԲՀԿ. որոշումն ընդունված է: